ഭർത്താവ് മരിക്കുന്നതിന് മുൻപ് പാകം ചെയ്ത കറി യുവതി സൂക്ഷിച്ചത് 2 വർഷം; എന്നേക്കുമായി സൂക്ഷിക്കണം എന്നതായിരുന്നു തീരുമാനം; പിന്നാലെ മനം മാറ്റം; കറി ഭക്ഷിക്കുന്ന യുവതിയുടെ വീഡിയോ വൈറൽ

രണ്ടു വര്‍ഷം മുമ്പ് മരിച്ചുപോയ തന്‍റെ ഭര്‍ത്താവുണ്ടാക്കിയ ഭക്ഷണം കഴിക്കുന്ന യുവതിയുടെ വികാരനിർഭരമായ ഒരു വീഡിയോ സമൂഹമാധ്യമങ്ങളിൽ വൈറലായിരിക്കുകയാണ്. സബ്റീന ടോണി എന്ന യുവതിയാണ് ഭർത്താവ് പാകം ചെയ്ത കറി കഴിക്കുന്ന ഇൻസ്റ്റ​ഗ്രാമിൽ വീഡിയോ പങ്ക് വെച്ചിരിക്കുന്നത്. ഭർത്താവുണ്ടാക്കിയ ജാപ്പനീസ് വിഭവം യുവതി കഴിക്കുന്നതാണ് വീഡിയോയിലുള്ളത്.

മരിക്കുന്നതിന് മുമ്പ് ഭര്‍ത്താവ് ടോണി അവസാനമായുണ്ടാക്കിയ കറിയാണ് ഭാര്യ സബ്റീന കേടുവരാതെ സൂക്ഷിച്ച് വെച്ചത്. രണ്ട് വർഷത്തോളമായി യുവതി കറി ഫ്രീസ് ചെയ്ത് സൂക്ഷിക്കുകയായിരുന്നു. ഭർത്താവുണ്ടാക്കിയ കറി എന്നേക്കുമായി സൂക്ഷിച്ചു വയ്ക്കാനായിരുന്നു ആദ്യം സബ്റീന തീരുമാനിച്ചിരുന്നത്. എന്നാൽ ഇരുവരും താമസിച്ചിരുന്ന വീട്ടില്‍ നിന്നും സബ്റീന മാറി താമസിക്കാന്‍ പോവുന്നതിനാൽ തീരുമാനം മാറ്റുകയായിരുന്നു. തുടർന്നാണ് കറി സബ്റീന കഴിക്കുന്നത്. തന്റെ ഭർത്താവിനെ കുറിച്ചുള്ള ഓർമകളും സബ്റീന വികാരനിർഭരയായി പറയുന്നത് വിഡിയോയിൽ കാണാം.

വീഡിയോയിൽ, തന്‍റെ ഭർത്താവ് ടോണി നന്നായി പാചകം ചെയ്യുമായിരുന്നുവെന്ന് സബ്റീന പറയുന്നുണ്ട്. "ഞാൻ എന്തെങ്കിലും കഴിക്കണമെന്ന് ആഗ്രഹിക്കുമ്പോഴെല്ലാം, അദ്ദേഹം എനിക്കായി അത് ഉണ്ടാക്കിത്തരും, ഈ വീട്ടിലെ എന്‍റെ അവസാനത്തെ ഭക്ഷണത്തിന് നന്ദി ടോണി'', അവർ വീഡിയോയിൽ പറയുന്നു. അഞ്ച് ദശലക്ഷത്തിലധികം പേരാണ് വീഡിയോ ഇതിനോടകം കണ്ടത്.