54% വരുന്ന ഹൈന്ദവ വോട്ടുകളിലും 45% വരുന്ന ന്യൂനപക്ഷ വോട്ടുകളിലുമാണ് തിരഞ്ഞെടുപ്പ് വിജയത്തിന്റെ രഹസ്യം ഒളിഞ്ഞിരിക്കുന്നു; ഈഴവ-ദളിത് വോട്ടുകളുടെ കരുത്തില് ഹാട്രിക് സ്വപ്നം കാണുന്ന പിണറായി; മുസ്ലിം-ക്രിസ്ത്യന് വോട്ടുകള് യുഡിഎഫിന്റെ കണക്കില് 'ഫിക്സഡ് ഡിപ്പോസിറ്റ്'; വിള്ളലുണ്ടാക്കി 25 ശമാനം വോട്ട് പിടിക്കാന് ബിജെപിയും; വിജയിയെ സമദൂരവും സമുദായവും നിശ്ചയിക്കും
തിരുവനന്തപുരം: കേരളത്തിന്റെ രാഷ്ട്രീയ വിധി നിര്ണ്ണയിക്കുന്നതില് ജാതി-മത സമുദായ സമവാക്യങ്ങള് എക്കാലവും നിര്ണ്ണായകമാണ്. 2026-ലെ നിയമസഭാ തിരഞ്ഞെടുപ്പിലും ഈ സമുദായ വോട്ടുകള് ആര്ക്കൊപ്പം നില്ക്കും എന്നതാണ് ഉറ്റുനോക്കപ്പെടുന്നത്. എല്.ഡി.എഫും യു.ഡി.എഫും തങ്ങളുടെ പരമ്പരാഗത വോട്ട് ബാങ്കുകള് കാത്തുസൂക്ഷിക്കാന് കിണഞ്ഞു ശ്രമിക്കുമ്പോള്, ഈ സമവാക്യങ്ങളിലേക്ക് കടന്നുകയറി നിര്ണ്ണായക ശക്തിയാകാനാണ് ബിജെപി നയിക്കുന്ന എന്.ഡി.എ ലക്ഷ്യമിടുന്നത്. മെയ് മാസത്തില് ഫലം വരുമ്പോള് ഈ ജാതി-മത സമവാക്യങ്ങള് ആര്ക്കൊപ്പം നില്ക്കും എന്നത് കേരളത്തിന്റെ ഭാവി നിശ്ചയിക്കും.
കേരളത്തിലെ 54% വരുന്ന ഹൈന്ദവ വോട്ടുകളിലും 45% വരുന്ന ന്യൂനപക്ഷ വോട്ടുകളിലുമാണ് തിരഞ്ഞെടുപ്പ് വിജയത്തിന്റെ രഹസ്യം ഒളിഞ്ഞിരിക്കുന്നത്. ഈഴവ വിഭാഗത്തിന്റെയും ദളിത് വിഭാഗങ്ങളുടെയും ശക്തമായ പിന്തുണയാണ് ഇടതുപക്ഷത്തിന്റെ കരുത്ത്. ഇതോടൊപ്പം ന്യൂനപക്ഷ വോട്ടുകളില് കഴിഞ്ഞ തവണ ഉണ്ടായ വര്ദ്ധനവ് ഇത്തവണയും നിലനിര്ത്താന് പിണറായി വിജയന് ലക്ഷ്യമിടുന്നു. മുസ്ലിം-ക്രിസ്ത്യന് വോട്ടുകള് തങ്ങളുടെ 'ഫിക്സഡ് ഡിപ്പോസിറ്റ്' ആണെന്ന് യു.ഡി.എഫ് വിശ്വസിക്കുന്നു. എന്.എസ്.എസ് പോലുള്ള സംഘടനകളുടെ പിന്തുണയും മധ്യകേരളത്തിലെ ക്രൈസ്തവ വോട്ടുകളും തിരിച്ചുപിടിക്കാനാണ് കോണ്ഗ്രസ് നീക്കം. കഴിഞ്ഞ ലോക്സഭാ തിരഞ്ഞെടുപ്പിലെ മുന്നേറ്റത്തിന് പിന്നാലെ, ഇത്തവണ സമുദായ സംഘടനകളുമായി നേരിട്ട് സംവദിക്കാനാണ് ബിജെപി നീക്കം.
മധ്യകേരളത്തില് നിര്ണ്ണായകമായ ക്രൈസ്തവ വോട്ടുകള് ലക്ഷ്യമിട്ട് ബിജെപി പ്രത്യേക പ്രചാരണം നടത്തുന്നുണ്ട്. സഭാ നേതൃത്വവുമായി ബിജെപി നേതാക്കള് നടത്തുന്ന ചര്ച്ചകള് യു.ഡി.എഫിന് ആശങ്കയുണ്ടാക്കുന്നു. ഹൈന്ദവ വോട്ടുകളുടെ ഏകീകരണം ലക്ഷ്യമിട്ട് സമുദായ സംഘടനകളുമായി അടുക്കാനാണ് ബിജെപി ശ്രമം. ബി.ഡി.ജെ.എസ് വഴിയുള്ള ഈഴവ വോട്ട് ബാങ്ക് രാഷ്ട്രീയവും എന്.എസ്.എസ് തുടരുന്ന രാഷ്ട്രീയ സമദൂര നിലപാടും തങ്ങള്ക്ക് അനുകൂലമാകുമെന്ന് ബിജെപി കണക്കുകൂട്ടുന്നു. ഇത്തവണ വോട്ട് വിഹിതം 25 ശതമാനത്തില് എത്തിക്കുക എന്ന ലക്ഷ്യത്തോടെയാണ് ബിജെപി സംഘം നീങ്ങുന്നത്. നഗരമേഖലകളിലെ മധ്യവര്ഗ വോട്ടുകളും വികസന താല്പര്യമുള്ള യുവ വോട്ടുകളും ഇതിനായി അവര് ലക്ഷ്യം വെക്കുന്നു.
മുന്നണികള് സമുദായ നേതാക്കളെ കാണുന്നതും പിന്തുണ തേടുന്നതും പതിവാണെങ്കിലും, കേരളത്തിലെ വോട്ടര്മാര് രാഷ്ട്രീയ ബോധത്തോടെയാണ് വോട്ട് രേഖപ്പെടുത്താറുള്ളത്. ജമാഅത്തെ ഇസ്ലാമി, എസ്.ഡി.പി.ഐ തുടങ്ങിയ സംഘടനകളുടെ നിലപാടുകളും തിരഞ്ഞെടുപ്പ് ഫലത്തെ സ്വാധീനിക്കും. ന്യൂനപക്ഷ വോട്ടുകള് യു.ഡി.എഫിലേക്കും എല്.ഡി.എഫിലേക്കും കേന്ദ്രീകരിക്കപ്പെടുമോ അതോ ബിജെപിയുടെ ഇടപെടല് ഈ വോട്ടുകളില് വിള്ളലുണ്ടാക്കുമോ എന്നതാണ് പ്രധാന ചോദ്യം.
രാജ്യം കാത്തിരിക്കുന്ന നിയമസഭാ തിരഞ്ഞെടുപ്പ് പ്രഖ്യാപനം ഇന്ന് ഉണ്ടാകും. കേരളം, തമിഴ്നാട്, പശ്ചിമ ബംഗാള്, അസം എന്നീ സംസ്ഥാനങ്ങളിലും കേന്ദ്രഭരണ പ്രദേശമായ പുതുച്ചേരിയിലുമുള്ള തിരഞ്ഞെടുപ്പ് തീയതികള് വൈകിട്ട് 4 മണിക്ക് കേന്ദ്ര തിരഞ്ഞെടുപ്പ് കമ്മീഷന് പ്രഖ്യാപിക്കും. ഡല്ഹിയിലെ വിജ്ഞാന് ഭവനില് നടക്കുന്ന വാര്ത്താസമ്മേളനത്തില് മുഖ്യ തിരഞ്ഞെടുപ്പ് കമ്മീഷണര് ഗ്യാനേഷ് കുമാറാണ് വിജ്ഞാപനം പുറത്തിറക്കുക. ഇതോടെ കേരളം ഉള്പ്പെടെയുള്ള സംസ്ഥാനങ്ങളില് മാതൃകാ പെരുമാറ്റച്ചട്ടം നിലവില് വരും. മേയ് 23-നാണ് നിലവിലെ കേരള നിയമസഭയുടെ കാലാവധി അവസാനിക്കുന്നത്.
2021-ല് ഭരണവിരുദ്ധ വികാരം അതിജീവിച്ച് തുടര്ഭരണം നേടിയ എല്ഡിഎഫ് ഇത്തവണ 'ഹാട്രിക്' വിജയമാണ് ലക്ഷ്യമിടുന്നത്. പിണറായി വിജയന്റെ കരുത്തുറ്റ നേതൃത്വവും സര്ക്കാരിന്റെ വികസന നേട്ടങ്ങളും ഉയര്ത്തിക്കാട്ടിയാകും പ്രചാരണം. കേന്ദ്ര സര്ക്കാരിന്റെ സാമ്പത്തിക അവഗണന മുഖ്യ രാഷ്ട്രീയ ആയുധമാക്കാന് സിപിഎം ഒരുങ്ങുന്നു. ഭരണവിരുദ്ധ വികാരവും അഴിമതി ആരോപണങ്ങളും വോട്ടാക്കി മാറ്റി അധികാരം തിരിച്ചുപിടിക്കാനാണ് യുഡിഎഫ് നീക്കം. കഴിഞ്ഞ തദ്ദേശ തിരഞ്ഞെടുപ്പിലെ മുന്നേറ്റം അവര്ക്ക് വലിയ ആത്മവിശ്വാസം നല്കുന്നുണ്ട്. തൃശ്ശൂരിലെ വിജയത്തിന് ശേഷം നിയമസഭയില് കൂടുതല് സീറ്റുകള് ലക്ഷ്യമിട്ട് ബിജെപി നേതൃത്വത്തിലുള്ള എന്ഡിഎയും സജീവമാണ്.
തീയതി പ്രഖ്യാപനത്തിന് പിന്നാലെ മുന്നണികള് സ്ഥാനാര്ത്ഥി പട്ടിക പുറത്തിറക്കും. വാര്ത്താസമ്മേളനം കഴിയുന്നതോടെ കേരളം ഔദ്യോഗികമായി തിരഞ്ഞെടുപ്പ് അങ്കത്തട്ടിലേക്ക് മാറും. പിണറായിസത്തിന്റെ കരുത്ത് പരീക്ഷിക്കപ്പെടുന്ന ഈ തിരഞ്ഞെടുപ്പില് ജനം ആര്ക്കൊപ്പം നില്ക്കും എന്നതാണ് പ്രധാനം.