യുഡിഎഫ് അധികാരത്തിലെത്തിയാല് കോണ്ഗ്രസില് ഒരു പ്രശ്നങ്ങളും ഉണ്ടാകില്ല; ജനഹിതം മാനിക്കാതെ പോയാല് ശരിയാവില്ലെന്ന തിരിച്ചറിവ് എല്ലാവര്ക്കുമുണ്ട്; കാലം മാറിയതിന് അനുസരിച്ച് തിരിച്ചറിവ് വന്നുവെന്ന് പി കെ കുഞ്ഞാലിക്കുട്ടി
യുഡിഎഫ് അധികാരത്തിലെത്തിയാല് കോണ്ഗ്രസില് ഒരു പ്രശ്നങ്ങളും ഉണ്ടാകില്ല
മലപ്പുറം: യുഡിഎഫ് അധികാരത്തിലെത്തിയാല് കോണ്ഗ്രസില് ഒരു പ്രശ്നങ്ങളും ഉണ്ടാകില്ലെന്ന് മുസ്ലിംലീഗ് നേതാവ് പി കെ കുഞ്ഞാലിക്കുട്ടി. ജനഹിതം മാനിക്കാതെ പോയാല് ശരിയാവില്ലെന്ന തിരിച്ചറിവ് എല്ലാവര്ക്കുമുണ്ട്. കാലം മാറിയതിന് അനുസരിച്ച് തിരിച്ചറിവ് വന്നു. ഗ്രൂപ്പ് തിരിഞ്ഞ വടം വലി ഒന്നും ഉണ്ടാവില്ല. കോണ്ഗ്രസില് വളരെ അച്ചടക്കം വന്നുവെന്നും അദ്ദേഹം ഒരുു മാധ്യമത്തോട് പ്രതികരിച്ചു.
പോളിങ്ങിന് മുന്പ് ഒരു തര്ക്കവും ഉണ്ടായില്ലെന്നും കോണ്ഗ്രസ് എല്ലാ തെരഞ്ഞെടുപ്പ് പ്രവര്ത്തനങ്ങളും ഭംഗിയായി പൂര്ത്തിയാക്കിയെന്നും അദ്ദേഹം കൂട്ടിച്ചേര്ത്തു. യുഡിഎഫിന്റെ തിരിച്ചു വരവ് ഇടത് ബിജെപി ക്യാമ്പുകള് സമ്മതിച്ചുകഴിഞ്ഞുവെന്നും പി കെ കുഞ്ഞാലിക്കുട്ടി പറഞ്ഞു. ന്യൂനപക്ഷ ഭൂരിപക്ഷ വ്യത്യാസമില്ലാതെ എല്ഡിഎഫ് സര്ക്കാരിനെതിരെ ഏകീകരണം ഉണ്ടായി. സര്ക്കാരിനെതിരെ വിരുദ്ധ വികാരം ശക്തമാണെന്നും കുഞ്ഞാലിക്കുട്ടി വ്യക്തമാക്കി.
തരംഗമുണ്ടെങ്കില് ലീഗ് മത്സരിച്ച 27 സീറ്റിലും വിജയിക്കുമെന്നും കുഞ്ഞാലിക്കുട്ടി ആത്മവിശ്വാസം പ്രകടിപ്പിച്ചു. ഗുരുവായൂര് എന്തായാലും ലീഗ് ജയിക്കുമെന്നും അദ്ദേഹം കൂട്ടിച്ചേര്ത്തു. ഉപമുഖ്യമന്ത്രി പദവി അടക്കം ചോദിച്ച് മുസ്ലിം ലീഗ് സമ്മര്ദ്ദം ചെലുത്തുമെന്ന ആരോപണത്തിനും പി കെ കുഞ്ഞാലിക്കുട്ടി മറുപടി നല്കി. സമ്മര്ദം ഉണ്ടാകുമെന്ന് പറയുന്നത് എതിരാളികള് ഉപയോഗിക്കുന്ന തന്ത്രം മാത്രമാണ്.
അത് ഇത്തവണ വില പോകില്ല. മുസ്ലിം ലീഗ് ഒരുവിധ സമ്മര്ദ്ദവും ചെലുത്തില്ലെന്ന് ലോകത്തിന് മനസിലാകുമെന്നും അങ്ങനെ സമ്മര്ദ്ദം ചെലുത്തുന്ന പാര്ട്ടിയല്ല മുസ്ലിം ലീഗെന്നും കുഞ്ഞാലിക്കുട്ടി പറഞ്ഞു. മെറിറ്റ് നോക്കിയിട്ട് ലീഗ് പോകൂ. ലീഗിന്റെ തെരെഞ്ഞെടുപ്പ് പ്രചാരണ രീതി പ്രൊഫെഷനല് ആണെന്ന് എല്ലാവരും കണ്ടതാണെന്നും അദ്ദേഹം പറഞ്ഞു.
സംസ്ഥാനത്ത് എണ്പത്തിയഞ്ചിലധികം സീറ്റുകള് നേടി യുഡിഎഫ് അധികാരത്തില് വരുമെന്നാണ് മുസ്ലിം ലീഗിന്റെ വിലയിരുത്തല്. ലീഗ് മത്സരിച്ച 27 മണ്ഡലങ്ങളില് 21 മുതല് 24 വരെ സീറ്റുകളില് വിജയിക്കുമെന്നാണ് കണക്കുകൂട്ടല്.