പാലക്കാട്ടെ പണ വിവാദത്തില് വയോധികയുടെ വെളിപ്പെടുത്തല്; കൈയിലുണ്ടായിരുന്നത് പെന്ഷന് തുകയെന്ന് ദേവു; തിരഞ്ഞെടുപ്പ് കമ്മീഷന് റിപ്പോര്ട്ട് തേടി; പാലക്കാട് ബിജെപി പ്രവര്ത്തകര് വോട്ടര്മാര്ക്ക് പണം നല്കുന്നതായി ആരോപിച്ച് കോണ്ഗ്രസ് പ്രവര്ത്തകര് പുറത്തുവിട്ട വീഡിയോ വന് വിവാദത്തില്; ശോഭാ സുരേന്ദ്രനെതിരെ അന്വേഷണം വരും; കള്ള പ്രചരണമെന്ന് ബിജെപിയും
പാലക്കാട്: വോട്ടെടുപ്പിന് മണിക്കൂറുകള് മാത്രം ബാക്കിനില്ക്കെ പാലക്കാട് മണ്ഡലത്തില് ബിജെപി പ്രവര്ത്തകര് പണം വിതരണം ചെയ്തെന്ന ആരോപണം പുതിയ വഴിത്തിരിവില്. കണ്ണാടി പഞ്ചായത്തിലെ തരുവാക്കുറിശ്ശി സ്വദേശിനി ദേവു എന്ന വയോധികയ്ക്ക് എന്ഡിഎ സ്ഥാനാര്ത്ഥി ശോഭാ സുരേന്ദ്രന്റെ സാന്നിധ്യത്തില് പണം നല്കിയെന്ന കോണ്ഗ്രസ് ആരോപണം വയോധിക തന്നെ നിഷേധിച്ചു. തന്റെ കൈയിലുണ്ടായിരുന്നത് പെന്ഷന് തുകയായിരുന്നുവെന്നും ബിജെപി പ്രവര്ത്തകര് പണം നല്കിയിട്ടില്ലെന്നുമാണ് ദേവുവിന്റെ പുതിയ വെളിപ്പെടുത്തല്.
പാലക്കാട് ബിജെപി പ്രവര്ത്തകര് വോട്ടര്മാര്ക്ക് പണം നല്കുന്നതായി ആരോപിച്ച് കോണ്ഗ്രസ് പ്രവര്ത്തകര് പുറത്തുവിട്ട വീഡിയോ വലിയ ചര്ച്ചയായിരുന്നു. ശോഭാ സുരേന്ദ്രന് കാറിലിരിക്കെ കൂടെയുണ്ടായിരുന്ന പ്രവര്ത്തക വയോധികയ്ക്ക് പണം നല്കിയെന്നായിരുന്നു കോണ്ഗ്രസ് വാദം. എന്നാല്, പണം നല്കിയെന്ന് ദേവു നേരത്തെ പറഞ്ഞിരുന്നതായി റിപ്പോര്ട്ടുകള് ഉണ്ടായിരുന്നുവെങ്കിലും ഇപ്പോള് അവര് അത് നിഷേധിച്ചതോടെ വിവാദം സങ്കീര്ണ്ണമായിരിക്കുകയാണ്.
സംഭവത്തിന്റെ ഗൗരവം കണക്കിലെടുത്ത് കേന്ദ്ര തിരഞ്ഞെടുപ്പ് കമ്മീഷന് പാലക്കാട് ജില്ലാ കളക്ടറോട് അടിയന്തര റിപ്പോര്ട്ട് തേടിയിട്ടുണ്ട്. പരാതി ഉയര്ന്നതിന് പിന്നാലെ തിരഞ്ഞെടുപ്പ് കമ്മീഷന്റെ ഫ്ലയിങ് സ്ക്വാഡ് സ്ഥലത്തെത്തി പ്രാഥമിക പരിശോധനകള് നടത്തി. വയോധികയുടെ മൊഴിയും ദൃശ്യങ്ങളും പരിശോധിച്ച ശേഷം മാത്രമേ സംഭവത്തില് വോട്ടര്മാരെ സ്വാധീനിക്കാനുള്ള ശ്രമം നടന്നിട്ടുണ്ടോ എന്ന് സ്ഥിരീകരിക്കാന് കഴിയൂ എന്ന് അധികൃതര് വ്യക്തമാക്കി.
മരണവീട് സന്ദര്ശിക്കാനെത്തിയപ്പോഴാണ് ശോഭാ സുരേന്ദ്രനും സംഘവും തൊട്ടടുത്ത വീട്ടിലെ വയോധികയുമായി സംസാരിച്ചത്. ഈ സമയം പണം കൈമാറുന്ന ദൃശ്യങ്ങള് പകര്ത്തിയ കോണ്ഗ്രസ് പ്രവര്ത്തകര്ക്ക് നേരെ സ്ഥാനാര്ത്ഥി ക്ഷുഭിതയായി സംസാരിക്കുന്നതും ഫോണ് തട്ടിയെടുക്കാന് ശ്രമിക്കുന്നതും വീഡിയോയിലുണ്ട്. സ്ഥാനാര്ത്ഥിയുടെ ഈ പെരുമാറ്റം ദുരൂഹത വര്ദ്ധിപ്പിക്കുന്നു എന്നാണ് കോണ്ഗ്രസ് ആരോപിക്കുന്നത്.
പാലക്കാട് നഗരസഭ മുന് ചെയര്പേഴ്സണ് പ്രമീള ശശിധരന് ഉള്പ്പെടെയുള്ള ബിജെപി നേതാക്കളും സംഭവസമയത്ത് സ്ഥാനാര്ത്ഥിക്കൊപ്പം ഉണ്ടായിരുന്നു. പണം വിതരണം നടന്നിട്ടില്ലെന്നും വ്യക്തിപരമായ സന്ദര്ശനത്തെ രാഷ്ട്രീയമായി ദുരുപയോഗം ചെയ്യാനാണ് കോണ്ഗ്രസ് ശ്രമിക്കുന്നതെന്നും ബിജെപി നേതൃത്വം പ്രതികരിച്ചു. വയോധികയുടെ വെളിപ്പെടുത്തല് തങ്ങളുടെ വാദത്തിന് കരുത്തേകുന്നതാണെന്ന് ബിജെപി അവകാശപ്പെടുന്നു.
അതേസമയം, വയോധികയെ സ്വാധീനിച്ചാണ് മൊഴി മാറ്റിച്ചതെന്നാണ് കോണ്ഗ്രസിന്റെ ആരോപണം. പണം കൈപ്പറ്റിയ കാര്യം വയോധിക ആദ്യം സമ്മതിച്ചിരുന്നുവെന്നും പിന്നീട് ഭീഷണിക്ക് വഴങ്ങിയാണ് പെന്ഷന് തുകയാണെന്ന് പറയുന്നതെന്നും കോണ്ഗ്രസ് പ്രവര്ത്തകര് കുറ്റപ്പെടുത്തുന്നു. തിരഞ്ഞെടുപ്പ് അട്ടിമറിക്കാനുള്ള ബിജെപിയുടെ സംഘടിത നീക്കമാണിതെന്ന് കാണിച്ച് കോണ്ഗ്രസ് പരാതിയില് ഉറച്ചുനില്ക്കുകയാണ്. ഈ സാഹചര്യത്തില് അന്വേഷണം ശോഭയ്ക്കെതിരേയും നടക്കും.
കടുത്ത ത്രികോണ മത്സരം നടക്കുന്ന പാലക്കാട് മണ്ഡലത്തില് ഓരോ വോട്ടും നിര്ണ്ണായകമാണ്. ജില്ലാ കളക്ടറുടെ റിപ്പോര്ട്ട് ലഭിച്ച ശേഷം തിരഞ്ഞെടുപ്പ് കമ്മീഷന് എടുക്കുന്ന നിലപാട് ശോഭാ സുരേന്ദ്രന്റെ സ്ഥാനാര്ത്ഥിത്വത്തെ പോലും ബാധിക്കാന് സാധ്യതയുണ്ട്. പണം നല്കി വോട്ടര്മാരെ സ്വാധീനിക്കാന് ശ്രമിച്ചു എന്ന് തെളിഞ്ഞാല് പെരുമാറ്റച്ചട്ട ലംഘനത്തിന് കേസെടുക്കാന് കമ്മീഷന് പോലീസിന് നിര്ദ്ദേശം നല്കും. ഇത് തിരഞ്ഞെടുപ്പിന് ശേഷം നിയമനടപടികളിലേക്ക് നീങ്ങാനും സാധ്യതയുണ്ട്.