കെ ടി ജലീലിന്റെ വീഡിയോക്ക് താഴെ മുസ്ലീം വിരുദ്ധ വിദ്വേഷ പരാമര്‍ശം; 'മുസ്ലീങ്ങളെ ആകെ ക്രിമിനല്‍ സ്വഭാവക്കാരായി ചിത്രീകരിച്ചത് തീര്‍ത്തും തെറ്റായിപ്പോയി': വിവാദമായതോടെ കമന്റ് ഡിലീറ്റ് ചെയ്ത് ക്ഷമാപണം നടത്തി സിപിഎം ലോക്കല്‍ കമ്മിറ്റി സെക്രട്ടറി; തളളിപ്പറഞ്ഞ് പാര്‍ട്ടിയും
മുസ്ലീം വിദ്വേഷ പരാമര്‍ശവുമായി സിപിഎം ലോക്കല്‍ കമ്മിറ്റി സെക്രട്ടറി; ത
കൊച്ചി: മുസ്ലീം വിദ്വേഷ പരാമര്‍ശവുമായി സിപിഎം ഏരിയാകമ്മിറ്റിയംഗം. മൂവാറ്റുപുഴ ആവോലി ലോക്കല്‍ കമ്മിറ്റി സെക്രട്ടറി ഫ്രാന്‍സിസ് എംജെയാണ് വിദ്വേഷ പരാമര്‍ശം നടത്തിയത്. ഫേസ്ബുക്ക് കമന്റിലാണ് വിദ്വേഷ പരാമര്‍ശം. കെ. ടി ജലീലിന്റെ പ്രസംഗത്തിന്റെ വീഡിയോക്ക് കീഴിലാണ് എം. ജെ ഫ്രാന്‍സിസിന്റെ കമന്റ്.
നോമ്പെടുത്താല്‍ ഒരു വര്‍ഷം പ്ലാന്‍ ചെയ്ത കുറ്റങ്ങള്‍ക്ക് പരിഹാരമായെന്നാണ് ചിലര്‍ കരുതുന്നതെന്നും കമന്റില്‍ ആരോപണമുണ്ട്. 'ഈ സമൂഹത്തില്‍ ഏറ്റവും കൂടുതല്‍ ക്രിമിനല്‍ സ്വഭാവം ഉള്ളത് മുസ്ലീങ്ങള്‍ക്കാണ്. അവരെ പഠിപ്പിക്കുന്നത് എന്ത് തെറ്റ് ചെയ്താലും പള്ളിയില്‍ പോയി അഞ്ചുനേരം പ്രാര്‍ഥിച്ചാല്‍ മതി. അതുപോലെ എല്ലാവര്‍ഷവും നോമ്പ് നോറ്റ് പകല്‍ മുഴുവന്‍ ഉമിനീര് രാത്രി നല്ല ഭക്ഷണം കഴിച്ച് ഉറങ്ങിയാല്‍ ഒരു വര്‍ഷക്കാലം പ്ലാന്‍ ചെയ്ത കുറ്റങ്ങള്‍ക്ക് പോരായ്മകളും പരിഹാരങ്ങളും ഉണ്ടാകും എന്നാണ് മതപുരോഹിതന്മാര്‍ പഠിപ്പിക്കുന്നത്' എന്നും കമന്റില്‍ പറയുന്നു. വിവാദമായതോടെ കമന്റ് ഡിലീറ്റ് ചെയ്തു.
അതേസമയം, ഫ്രാന്‍സിസിന്റേത് സിപിഎം സിപിഎമ്മിന്റെ ഔദ്യോഗിക നിലപാടല്ലെന്നും വ്യക്തിപരമായ അഭിപ്രായമെന്നും മൂവാറ്റുപുഴ ഏരിയ സെക്രട്ടറി അഡ്വ.അനിഷ് മാത്യു വ്യക്തമാക്കി. ഫ്രാന്‍സിസിനോട് വിശദീകരണം ചോദിച്ചിട്ടുണ്ടെന്നും സിപിഎം നേതൃത്വം വ്യക്തമാക്കി. പിന്നാലെ ഫ്രാന്‍സിസ് ഫെയ്‌സ്ബുക്കിലെ തന്റെ അക്കൗണ്ട് വഴി പരസ്യമായി ക്ഷമാപണം നടത്തി.