'പേടിച്ചു പോയെന്ന് പറഞ്ഞേക്ക്...', വി ഡി സതീശന്റെ മുന്നറിയിപ്പിന് നികേഷ് കുമാറിന്റെ മറുപടി സതീശന്റെ ഡയലോഗ് കടമെടുത്ത്

തിരുവനന്തപുരം: പ്രതിപക്ഷ നേതാവ് വി.ഡി.സതീശന്റെ മുന്നറിയിപ്പിന് മറുപടിയുമായി സിപിഎം നവമാധ്യമ മേധാവി എം.വി.നികേഷ് കുമാര്‍. 'പേടിച്ചു പോയെന്ന് പറഞ്ഞേക്ക്' എന്നാണ് നികേഷിന്റെ മറുപടി. വി ഡി സതീശന്‍ പറഞ്ഞു ഹിറ്റായ ഡയലോഗ് കടമെടുത്താണ് നികേഷിന്റെ മറുപടി.

തനിക്കെതിരെ ദിവസവും പത്ത് വ്യാജ പ്രചാരണ കാര്‍ഡുകള്‍ എകെജി സെന്ററിലിരുന്ന് അടിച്ചിറക്കുകയാണെന്നും ഒരു ഒറിജിനല്‍ കാര്‍ഡ് വരുന്നുണ്ടെന്നും സതീശന്‍ മുന്നറിയിപ്പ് നല്‍കിയിരുന്നു. ഇതിനോടുള്ള പ്രതികരണമായാണ് നികേഷിന്റെ ഫെയ്‌സ്ബുക്ക് പോസ്റ്റ്.

'ഞാന്‍ പണം തട്ടിയെന്നാണ് വ്യാപകമായി പ്രചരണം നടത്തുകയാണ്. സി.പി.എമ്മിന്റെ ഒരാള്‍ അവിടെ ഇരുന്ന് എല്ലാ ദിവസവും പത്ത് കാര്‍ഡ് ഇറക്കുന്നുണ്ടല്ലോ. കെ.പി.സി.സിക്ക് സംഭാവനയായി ലഭിച്ച പണം ഞാന്‍ അടിച്ചു മാറ്റിയെന്നതാണ് കഴിഞ്ഞ ദിവസം ഇറക്കിയ ഒരു കാര്‍ഡ്. പിണറായി വിജയന്‍ പാര്‍ട്ടി സെക്രട്ടറിയായി ഇരുന്ന 16 വര്‍ഷവും സി.പി.എം പിരിച്ച ഫണ്ടൊക്കെ അദ്ദേഹം വീട്ടില്‍ കൊണ്ട് പോകുകയായിരുന്നോ?

ഞാന്‍ നൂറു കോടി രൂപ കൊണ്ടു പോയെന്നാണ് പ്രചരിപ്പിക്കുന്നത്. എ.കെ.ജി സെന്ററില്‍ നിങ്ങള്‍ ചുമതലപ്പെടുത്തിയിരിക്കുന്ന ഒരാളുടെ നേതൃത്വത്തില്‍ എല്ലാ ദിവസവും പത്ത് കാര്‍ഡ് ഇറക്കുകയാണ്. അയാളോട് പറഞ്ഞേക്ക്, എല്ലാം കഴിയുമ്പോള്‍ അയാള്‍ക്കെതിരെ ഒര്‍ജിനല്‍ കാര്‍ഡ് വരുന്നുണ്ടെന്ന്' നികേഷ് കുമാറിന്റെ പേര് പറയാതെ സതീശന്‍ പറഞ്ഞു.

ഇതിന് പിന്നാലെ ഫെയ്സ്ബുക്ക് പോസ്റ്റിലൂടെയാണ് നികേഷ് മറുപടി നല്‍കിയിരിക്കുന്നത്. സതീശന്‍ മുന്നറിയിപ്പ് നല്‍കുന്ന വീഡിയോയും നികേഷ് പങ്കുവെച്ചിട്ടുണ്ട്.