ഭക്തര്ക്ക് ദര്ശനപുണ്യവുമായി ശബരിമലയില് ഇന്ന് മകരവിളക്ക്; ഒന്നര ലക്ഷത്തോളം ഭക്തര് ഇന്ന് അയ്യനെ കണ്ട് തൊഴാന് എത്തും: തിരുവാഭരണ ഘോഷയാത്ര വൈകുന്നേരത്തോടെ ശരംകുത്തിയില് എത്തിച്ചേരും
ദര്ശനപുണ്യവുമായി ശബരിമലയില് ഇന്ന് മകരവിളക്ക്
പത്തനംതിട്ട: ഭക്തര്ക്ക് ദര്ശനപുണ്യവുമായി ശബരിമലയില് ഇന്ന് മകരവിളക്ക് മഹോത്സവം. മകരവിളക്ക് മഹോത്സവത്തിനായി ശബരിമല സന്നിധാനം സജ്ജമായിക്കഴിഞ്ഞതായി തിരുവിതാംകൂര് ദേവസ്വം ബോര്ഡ് പ്രസിഡന്റ് കെ ജയകുമാര് അറിയിച്ചു. ഇതിനുള്ള ശുദ്ധിക്രിയകള് ഉള്പ്പെടെ സന്നിധാനത്ത് പൂര്ത്തിയായി. മകരവിളക്കിന്റെ പുണ്യം നുകരാനും അയ്യനെ കണ്ട് വണങ്ങാനും പതിനായിരങ്ങള് ഇന്ന് ശബരിമലയിലേക്ക് ഒഴുകി എത്തും. ഇന്ന് ഉച്ചയ്ക്ക് 2.50 നാണ് മകര സംക്രമ പൂജകള്ക്ക് തുടക്കമാവുക.
തിരുവാഭരണ ഘോഷയാത്ര പരമ്പരാഗത പാതയിലൂടെ വൈകുന്നേരം അഞ്ചരയോടെ ശരംകുത്തിയില് എത്തിച്ചേരും. 6:20 ഓടെ ഘോഷയാത്ര സന്നിധാനത്ത് എത്തും. തുടര്ന്ന് തിരുവാഭരണം ചാര്ത്തിയുള്ള ദീപാരാധന നടക്കും. ശേഷം പൊന്നമ്പലമേട്ടില് മകരജ്യോതി തെളിയും. മരുതമനയില് ശിവന്കുട്ടിയാണ് ഇത്തവണ മുതല് തിരുവാഭരണ വാഹക സംഘത്തിന്റെ ഗുരുസ്വാമി. പന്തളം കൊട്ടാരത്തെ പ്രതിനിധീകരിച്ചുള്ള രാജപ്രതിനിധിയും യാത്രയെ അനുഗമിക്കുന്നുണ്ട്. പി.എന്. നാരായണവര്മ്മയാണ് രാജപ്രതിനിധി.
ശരണമന്ത്രങ്ങളാല് മുഖരിതമായ അന്തീരക്ഷത്തിലാണ് തിരുവാഭരണ ഘോഷയാത്രയുടെ സഞ്ചാരം. മൂന്ന് പേകടങ്ങളാണ് ഘോഷയാത്രയിലുള്ളത്. ആദ്യത്തേതില് അയ്യപ്പവിഗ്രത്തില് ചാര്ത്താനുള്ള തിരുമുഖം ഉള്പ്പെടെ ആഭരണങ്ങള്. രണ്ടാമത്തെ പേടകത്തില് കളഭാഭിഷേകത്തിനുള്ള സ്വര്ണ്ണകുടമാണുള്ളത്. മൂന്നാം പേടകത്തില് എഴുന്നള്ളിപ്പിനുള്ള ജീവതയും നെറ്റിപട്ടവും കൊടികളും.
സന്നിധാനത്ത് വലിയരീതിയിലുളള തീര്ത്ഥാടക നിയന്ത്രണമുണ്ട്. വെര്ച്വല് ക്യൂ വഴി 30000 പേര്ക്കും സ്പോട്ട് ബുക്കിംഗ് വഴി 5000 പേര്ക്കുമാണ് സന്നിധാനത്തേക്ക് പ്രവേശനം. രാവിലെ 11 മുതല് പമ്പയില് നിന്ന് തീര്ത്ഥാടകരെ കയറ്റിവിടില്ല. ഒന്നരലക്ഷത്തോളം പേരെങ്കിലും മകരവിളക്ക് ദര്ശനത്തിനെത്തുമെന്നാണ് കണക്ക്.
സന്നിധാനത്തും പരിസരത്തും ഒരു ലക്ഷത്തോളം ഭക്തര് തമ്പടിച്ചിട്ടുണ്ട്. എരുമേലി കാനനപാത വഴി തീര്ത്ഥാടകര് എത്തിക്കൊണ്ടിരിക്കുകയാണ്. തിരക്ക് നിയന്ത്രിക്കാന് പോലീസ് സര്വസജ്ജമാണ്. തിരുമുറ്റത്തും ഫ്ലൈ ഓവറുകളിലും നിന്ന് മകരജ്യോതി ദര്ശിക്കുന്നതിന് കര്ശന നിയന്ത്രണമാണ് ഏര്പ്പെടുത്തിയിരിക്കുന്നത്. ദേവസ്വം ബോര്ഡ് ഫോട്ടോ പതിച്ച തിരിച്ചറിയില് പാസ് നല്കിയവര്ക്ക് മാത്രമേ ഈ സ്ഥലങ്ങളില് നില്ക്കാന് കഴിയുകയുള്ളൂ. പാസ് ഒരു കാരണവശാലും മറ്റെരാള്ക്ക് കൈമാറാന് കഴിയില്ല.
മകരജ്യോതി ദര്ശനം കഴിഞ്ഞ് തിരിച്ചിറങ്ങാന് തീര്ത്ഥാടകര് തിരക്ക് കൂട്ടുന്ന പ്രവണതയുണ്ട്. തിരിച്ചിറങ്ങുന്നതിന് തിരക്ക് കൂട്ടേണ്ടതില്ല. കൂടുതല് കെഎസ്ആര്ടിസി ബസുകള് പമ്പയില് ഏര്പ്പെടുത്തിയിട്ടുണ്ടെന്നും പ്രസിഡന്റ് പറഞ്ഞു. മുന്വര്ഷങ്ങളില് ഭക്തര്ക്ക് തങ്ങാന് മുറി ലഭിക്കാത്ത പ്രശ്നമുണ്ടായിരുന്നു. ഈ വര്ഷം മുറി ബുക്ക് ചെയ്യുന്നതിന് ഓണ്ലൈന് സംവിധാനം ഏര്പ്പെടുത്തി. ഭക്തരെ ഒരു തരത്തിലുമുള്ള ചൂഷണത്തിന് വിധേയമാക്കുന്ന സാഹചര്യവും ശബരിമലയില് ഉണ്ടാകില്ല.
പത്തനംതിട്ടയിലും ഇടുക്കിയിലും അവധി
ശബരിമല മകരവിളക്ക് മഹോത്സവം നടക്കുന്ന നാളെ പത്തനംതിട്ട ജില്ലയില് പ്രാദേശിക അവധി പ്രഖ്യാപിച്ചു. ജില്ലാ കളക്ടറാണ് അവധി പ്രഖ്യപിച്ച് ഉത്തരവിട്ടത്. പത്തനംതിട്ട ജില്ലയിലെ എല്ലാ സര്ക്കാര് ഓഫീസുകള്ക്കും വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിച്ചിട്ടുണ്ട്. മുന്കൂട്ടി നിശ്ചയിച്ച പൊതുപരീക്ഷകള്, സര്വകലാശാലാ പരീക്ഷകള് എന്നിവയ്ക്ക് മാറ്റമുണ്ടായിരിക്കില്ല. അവശ്യ സര്വീസുകളില് ജോലി ചെയ്യുന്ന ജീവനക്കാര്ക്കും ഈ അവധി ബാധകമല്ല എന്ന് കളക്ടറുടെ ഉത്തരവിലുണ്ട്.