കന്നി സെഞ്ചുറിയുമായി സല്മാന് നിസാറിന്റെ 'രക്ഷാപ്രവര്‍ത്തനം'; പത്ത് വിക്കറ്റുമായി ജലജ് സക്സേനയുടെ പ്രത്യാക്രമണവും; ബിഹാറിനെ ഇന്നിംഗ്സിനും 169 റണ്‍സിനും തകര്‍ത്ത് സച്ചിനും സംഘവും; ആറ് വര്‍ഷത്തെ ഇടവേളയ്ക്കു ശേഷം കേരളം രഞ്ജി ട്രോഫി ക്വാര്‍ട്ടറില്‍
ആറ് വര്‍ഷത്തെ ഇടവേളയ്ക്കു ശേഷം കേരളം രഞ്ജി ട്രോഫി ക്വാര്‍ട്ടറില്‍
തിരുവനന്തപുരം: എലൈറ്റ് ഗ്രൂപ്പ് സിയിലെ അവസാന മത്സരത്തില്‍ ബിഹാറിനെ ഇന്നിംഗ്സിനും 169 റണ്‍സിനും കീഴടക്കി രഞ്ജി ട്രോഫിയുടെ ക്വാര്‍ട്ടര്‍ ഫൈനല്‍ ഉറപ്പിച്ച് കേരളം. ആറു വര്‍ഷത്തെ ഇടവേളയ്ക്കു ശേഷമാണ് കേരളം രഞ്ജി ട്രോഫി ക്വാര്‍ട്ടര്‍ ഫൈനല്‍ ബര്‍ത്ത് ഉറപ്പിക്കുന്നത്. തികച്ചും ഏകപക്ഷീയമായി മാറിയ അവസാന ഗ്രൂപ്പ് മത്സരത്തില്‍ ബിഹാറിനെ ഇന്നിങ്‌സിനും 169 റണ്‍സിനും തകര്‍ത്താണ് കേരളത്തിന്റെ ക്വാര്‍ട്ടര്‍ പ്രവേശം. ഒന്നാം ഇന്നിങ്‌സില്‍ വെറും 64 റണ്‍സിനു പുറത്തായി ഫോളോഓണ്‍ ചെയ്ത ബിഹാര്‍, രണ്ടാം ഇന്നിങ്‌സിലും കൂട്ടത്തോടെ തകര്‍ന്നടിഞ്ഞ് 41.1 ഓവറില്‍ 117 റണ്‍സിനു പുറത്തായതോടെയാണ് കേരളം കൂറ്റന്‍ വിജയം സ്വന്തമാക്കിയത്.
സ്‌കോര്‍: കേരളം 351, ബിഹാര്‍ 64 & 118.
മത്സരത്തിന് മുമ്പ് ആറ് മത്സരങ്ങളില്‍ നിന്ന് 21 പോയിന്റാണ് കേരളത്തിനുണ്ടായിരുന്നത്. ബിഹാറിനെതിരെ ഇന്നിംഗ്സ് ജയം നേടിയതോടെ കേരളത്തിന് 28 പോയിന്റായി. കര്‍ണാടകയ്ക്കെതിരായ മത്സരത്തില്‍ ഹരിയാന തോറ്റാല്‍ ഗ്രൂപ്പ് ചാംപ്യന്മാരായി തന്നെ കേരളത്തിന് ക്വാര്‍ട്ടറിലെത്താം. ഹരിയാന, കര്‍ണാടക, ബംഗാള്‍, ഉത്തര്‍പ്രദേശ്, മധ്യപ്രദേശ് തുടങ്ങി ആഭ്യന്തര ക്രിക്കറ്റിലെ വമ്പന്‍മാര്‍ ഉള്‍പ്പെടുന്ന എലൈറ്റ് ഗ്രൂപ്പ് സിയില്‍ നിന്നാണ് കേരളം തകര്‍പ്പന്‍ പ്രകടനവുമായി ക്വാര്‍ട്ടറില്‍ കടന്നത്. ഈ വിജയത്തോടെ കേരളം ഗ്രൂപ്പില്‍ ഒന്നാം സ്ഥാനത്തെത്തി. ഇപ്പോള്‍ നടന്നുവരുന്ന ഹരിയാന കര്‍ണാടക മത്സരം കൂടി പൂര്‍ത്തിയായെങ്കില്‍ മാത്രമേ കേരളത്തിനൊപ്പം ഗ്രൂപ്പില്‍നിന്ന് ആരാണ് ക്വാര്‍ട്ടറിലേക്ക് മുന്നേറുന്നത് എന്ന കാര്യത്തില്‍ അന്തിമ ചിത്രമാകൂ.
തിരുവനന്തപുരം, ഗ്രീന്‍ഫീല്‍ഡ് സ്റ്റേഡിയത്തില്‍ നടന്ന മത്സരത്തില്‍ ടോസ് നേടി ആദ്യം ബാറ്റ് ചെയ്ത കേരളം 351 റണ്‍സാണ് നേടിയത്. മറുപടി ബാറ്റിംഗില്‍ ആദ്യ ഇന്നിംഗ്സില്‍ ബിഹാര്‍ 64ന് പുറത്തായി. പിന്നാലെ ഫോളോഓണിന് വിധേയരായ ടീം രണ്ടാം ഇന്നിംഗ്സില്‍ 118 റണ്‍സിനും പുറത്തായി. അഞ്ച് വിക്കറ്റ് നേടിയ ജലജ് സക്സേനയാണ് ബിഹാറിനെ തകര്‍ത്തത്.
സ്‌കോര്‍ സൂചിപ്പിക്കും പോലെ രണ്ടാം ഇന്നിംഗ്സിലും മോശം തുടക്കമായിരുന്നു ബിഹാറിന്. ഓപ്പണര്‍ മംഗള്‍ മഹ്റോര്‍(5), ശ്രമണ്‍ നിഗ്രോധ്(15), ആയുഷ് ആയുഷ് ലോഹാറുക (9) എന്നിവരുടെ വിക്കറ്റുകള്‍ തുടക്കത്തില്‍ തന്നെ അവര്‍ക്ക് നഷ്ടമായി. 31 റണ്‍സെടുത്ത സാക്കിബുള്‍ ഗനി, 30 റണ്‍സെടുത്ത ക്യാപ്റ്റന്‍ വീര്‍ പ്രതാപ് സിംഗ് എന്നിവര്‍ക്ക് മാത്രമാണ് ബിഹാര്‍ ഇന്നിംഗ്സില്‍ അല്‍പമെങ്കിലും പിടിച്ചുനില്‍ക്കാന്‍ സാധിച്ചത്. മറ്റാര്‍ക്കും രണ്ടക്കം കാണാന്‍ പോലും സാധിച്ചില്ല. കേരളത്തിന് വേണ്ടി സക്സേനയ്ക്ക് പുറമെ ആദിത്യ സര്‍വാതെ മൂന്നും നിധീഷ് എം ഡി, വൈശാഖ് ചന്ദ്രന്‍ എന്നിവര്‍ ഓരോ വിക്കറ്റും വീഴ്ത്തി.
നേരത്തെ കേരളത്തിന്റെ ഒന്നാം ഇന്നിംഗ്സ് സ്‌കോറിന് മറുപടി പറയാനിറങ്ങിയ ബിഹാര്‍ 64 റണ്‍സിന് ഓള്‍ ഔട്ടാവുകയായിരുന്നു. 40-1 എന്ന ഭേദപ്പെട്ട സ്‌കോറില്‍ നിന്നാണ് ബിഹാര്‍ 24 റണ്‍സ് കൂടി കൂട്ടിച്ചേര്‍ക്കുന്നതിനിടെ 64 റണ്‍സിന് ഓള്‍ ഔട്ടായത്. 21 റണ്‍സെടുത്ത ശ്രമണ്‍ നിഗ്രോധ് ആണ് ബിഹാറിന്റെ ടോപ് സ്‌കോറര്‍. ശ്രമണിന് പുറമെ ആയുഷ് ലോഹാറുക(13), ഗുലാം റബ്ബാനി(10) എന്നിവര്‍ മാത്രമാണ് ബിഹാര്‍ നിരയില്‍ രണ്ടക്കം കടന്നത്. കേരളത്തിനായി ജലജ് സക്സേന 19 റണ്‍സിന് അഞ്ച് വിക്കറ്റെടുത്തപ്പോള്‍ എം ഡി നിധീഷ് രണ്ടും വൈശാഖ് ചന്ദ്രനും ആദിത്യ സര്‍വാതെയും ഓരോ വിക്കറ്റ് വീതവും വീഴ്ത്തി. സക്സേന ഒന്നാകെ 10 വിക്കറ്റ് നേടി.
രണ്ടാം ദിനം ഒമ്പത് വിക്കറ്റ് നഷ്ടത്തില്‍ 302 റണ്‍സെന്ന നിലയില്‍ ക്രീസിലിറങ്ങിയ കേരളത്തിനായി സല്മാന് നിസാര്‍ 150 റണ്‍സടിച്ച് പുറത്തായപ്പോള്‍ അഞ്ച് റണ്‍സുമായി വൈശാഖ് ചന്ദ്രന്‍ പുറത്താകാതെ നിന്നു. ആദ്യ ദിനം 111 റണ്‍സുമായി പുറത്താകാതെ നിന്ന സല്മാന് നിസാര്‍ രണ്ടാം ദിനം തുടക്കത്തില്‍ തന്നെ തകര്‍ത്തടിച്ച് 39 റണ്‍സ് കൂടി കൂട്ടിച്ചേര്‍ത്ത് കേരളത്തെ 350 കടത്തി. ഷോര്‍ റോജര്‍ (59), അക്ഷയ് ചന്ദ്രന്‍ (38), നിധീഷ് എം ഡി (30) എന്നിവരും കേരളത്തിന് വേണ്ടി മികച്ച പ്രകടനം പുറത്തെടുത്തു.
രണ്ടാം ദിവസം വീണത് 21 വിക്കറ്റുകള്‍
ആദ്യ ഇന്നിങ്‌സില്‍ ബാറ്റു ചെയ്യാനിറങ്ങിയ ബിഹാര്‍ 23.1 ഓവറില്‍ 64 റണ്‍സെടുത്തു പുറത്തായതോടെ, ബിഹാറിനെ കേരളം ഫോളോ ഓണിനു വിടുകയായിരുന്നു. രണ്ടാം ഇന്നിങ്‌സിലും കൂട്ടത്തോടെ തകര്‍ന്നടിഞ്ഞ് 41.1 ഓവറില്‍ 117 റണ്‍സുമായി ബിഹാര്‍ കൂടാരം കയറി. ആദ്യ ഇന്നിങ്‌സില്‍ കേരളത്തിന്റെ ഓള്‍റൗണ്ടര്‍ ജലജ് സക്സേന അഞ്ചു വിക്കറ്റുകള്‍ വീഴ്ത്തിയതോടെയാണ് ബിഹാര്‍ തകര്‍ന്നടിഞ്ഞത്. രണ്ടാം ഇന്നിംഗ്സിലും ജലജ് സക്‌സേനയായിരുന്നു ബിഹാറിന്റെ അന്തകരായത്. രണ്ടാം ദിനത്തില്‍ ബിഹാറിന്റെതടക്കം 21 വിക്കറ്റുകളാണ് വീണത്. ഇതില്‍ ഭൂരിഭാഗവും സ്വന്തമാക്കിയത് സ്പിന്നര്‍മാരായിരുന്നു.
47 പന്തില്‍ 21 റണ്‍സെടുത്ത ശ്രമണ്‍ നിഗ്രോധാണ് ബിഹാറിന്റെ ടോപ് സ്‌കോറര്‍. ആയുഷ് ലോഹാരുക (21 പന്തില്‍ 13), ഗുലാം റബ്ബാനി (13 പന്തില്‍ 10) എന്നിവരും ബിഹാറിന്റെ ആദ്യ ഇന്നിങ്‌സില്‍ രണ്ടക്കം കടന്നു. 7.1 ഓവറുകള്‍ പന്തെറിഞ്ഞ ജലജ് സക്സേന 19 റണ്‍സ് മാത്രം വഴങ്ങിയാണ് അഞ്ച് വിക്കറ്റ് നേട്ടത്തിലെത്തിയത്. കേരളത്തിനായി എം.ഡി. നിധീഷ് രണ്ടും വൈശാഖ് ചന്ദ്രന്‍, ആദിത്യ സര്‍വാതെ എന്നിവര്‍ ഓരോ വിക്കറ്റുകള്‍ വീതവും വീഴ്ത്തി.
രണ്ടാം ദിവസം 101.2 ഓവറില്‍ 351 റണ്‍സെടുത്താണു കേരളം പുറത്തായത്. ആദ്യ ദിവസം സെഞ്ചറി പൂര്‍ത്തിയാക്കിയ സല്മാന് നിസാര്‍ 236 പന്തില്‍ 150 റണ്‍സെടുത്തു പുറത്തായി. വാലറ്റത്ത് എം.ഡി. നിധീഷ് (43 പന്തില്‍ 30), വൈശാഖ് ചന്ദ്രന്‍ (54 പന്തില്‍ അഞ്ച്) എന്നിവരെ കൂട്ടുപിടിച്ച് 140 റണ്‍സാണ് സല്മാന് നിസാര്‍ കേരളത്തിനായി ചേര്‍ത്തത്. അവസാന വിക്കറ്റില്‍ വൈശാഖ് ചന്ദ്രന്റെ പ്രതിരോധം കേരളത്തെ തുണച്ചു.
ഒന്നാം ദിനം കളി നിര്‍ത്തുമ്പോള്‍ 9 വിക്കറ്റ് നഷ്ടത്തില്‍ 302 റണ്‍സെന്ന നിലയിലായിരുന്നു കേരളം. ടോസ് നേടി ബാറ്റിങ് തിരഞ്ഞെടുത്ത കേരളത്തിനായി ഓപ്പണര്‍ അക്ഷയ് ചന്ദ്രന്‍ (38) ഭേദപ്പെട്ട പ്രകടനം കാഴ്ചവച്ചപ്പോള്‍ രോഹന്‍ കുന്നുമ്മലും (3) ആനന്ദ് കൃഷ്ണനും (11) സച്ചിന്‍ ബേബിയും (4) പെട്ടെന്നു പുറത്തായി. സല്‍മാനും ഷോണ്‍ റോജറും (59) ചേര്‍ന്നുള്ള 89 റണ്‍സിന്റെ അഞ്ചാം വിക്കറ്റ് കൂട്ടുകെട്ടാണ് കേരളത്തെ രക്ഷിച്ചത്.
പിന്നീട് 9ാം വിക്കറ്റില്‍ എം.ഡി.നിധീഷ് (30) മികച്ച പിന്തുണ നല്‍കിയതോടെ സല്മാന് സെഞ്ചറി തികയ്ക്കാനായി. 79 റണ്‍സാണ് ഇരുവരും ചേര്‍ന്നു നേടിയത്. ബിഹാര്‍ ബോളര്‍മാര്‍ നല്‍കിയ 25 എക്‌സ്ട്രാ റണ്‍സും കേരളത്തിനു തുണയായി.