അഫ്രിദി 351 സിക്സറുകള് പറത്തിയത് 398 മത്സരങ്ങളില് നിന്ന്; നൂറിലേറെ മത്സരങ്ങളുടെ കുറവില് ഹിറ്റ്മാന് മറികടന്നത് രണ്ടര ദശാബ്ദം നീണ്ട റെക്കോര്ഡ്; ഏകദിനത്തിലെ സിക്സര് രാജാവ് ഇനി രോഹിത് ശര്മ്മ; 'ഹിറ്റ്മാന്' പേര് അന്വര്ത്ഥമാക്കുമ്പോള്
അഫ്രിദി 351 സിക്സറുകള് പറത്തിയത് 398 മത്സരങ്ങളില് നിന്ന്
റാഞ്ചി: കുതിച്ചു വരുന്ന പന്തുകളെ നിലം തൊടാതെ അതിര്ത്തി കടത്തുക എന്നത് ഇത്ര ലളിതവും സുന്ദരവുമാണെന്ന് തോന്നുന്നത് ഹിറ്റ്മാന് രോഹിത് ശര്മ്മയുടെ ബാറ്റില് നിന്ന് സിക്സറുകള് പറക്കുമ്പോഴാണ്.അത്ര സുന്ദരവും അനായാസവുമാണ് രോഹിത് ശര്മ്മയുടെ സിക്സറുകള്.അ മികവിന് അംഗീകാരമായി ഏകദിനത്തില് ഏറ്റവും കൂടുതല് സിക്സറുകള് എന്ന നേട്ടം ഇനി രോഹിത്തിന്റെ പേരില്.
ദക്ഷിണാഫ്രിക്കയ്ക്ക് എതിരായ ഒന്നാം ഏകദിനത്തില് 3 സിക്സറുകള് കൂടി പറത്തിയതോടെയാണ് നേട്ടം രോഹിത്തിനെ തേടിയെത്തിയത്.മത്സരം ആരംഭിക്കുന്നതിന് മുന്പ് ഒന്നാം സ്ഥാനത്തുള്ള അഫ്രീദിയെക്കാള് 2 സിക്സിന് പിറകിലായിരുന്നു രോഹിത്.ദക്ഷിണാഫ്രിക്കന് ബൗളര്മാര്ക്കെതിരെ അനായാസം ബാറ്റ് വീശിയ ഹിറ്റ്മാന്, 15-ാം ഓവറില് പ്രെനലന് സുബ്രയനെതിരെ തുടര്ച്ചയായി രണ്ട് സിക്സറുകള് നേടി റെക്കോര്ഡിനൊപ്പമെത്തി. പിന്നീട് മാര്ക്കോ യാന്സനെതിരെ ഒരു സിക്സര് കൂടി നേടി ചരിത്രനേട്ടം സ്വന്തം പേരിലാക്കി.
398 മത്സരങ്ങളില് നിന്നാണ് 351 സിക്സുകള് ഷാഹിദ് അഫ്രീദി നേടിയത്. എന്നാല് 277 ഏകദിന മത്സരങ്ങളില് നിന്ന് 352 സിക്സുകളുമായി രോഹിത് റെകോര്ഡ് മറികടന്നു.നുറിലേറെ കുറവ് മത്സരങ്ങളില് നിന്നാണ് ഹിറ്റ്മാന്റെ നേട്ടം.?ക്രിസ് ഗെയ്ല് (331), സനത് ജയസൂര്യ (270), എം.എസ്. ധോണി (229) എന്നിവരാണ് ഈ പട്ടികയില് രോഹിത്തിനും അഫ്രീദിക്കും പിന്നിലുള്ളത്. രാജ്യാന്തര ക്രിക്കറ്റിലെ എല്ലാ ഫോര്മാറ്റിലുമായി ഏറ്റവും കൂടുതല് സിക്സറുകള് നേടിയ താരമെന്ന റെക്കോര്ഡും രോഹിത് ശര്മ്മയുടെ പേരിലാണ്.
ആകെ 645 സിക്സറുകളാണ് രോഹിത്തിന്റെ സമ്പാദ്യം. 553 സിക്സറുകളുമായി ക്രിസ് ഗെയ്ലാണ് പട്ടികയില് രണ്ടാമത്. ചരിത്രമെഴുതിയ മത്സരത്തില് 51 പന്തില് നിന്ന് 57 റണ്സെടുത്താണ് താരം പുറത്തായത്. അഞ്ചു ഫോറുകളും മൂന്ന് സിക്സറുമടങ്ങുന്നതായിരുന്നു ഇന്നിങ്സ്. ഒടുവില് ദക്ഷിണാഫ്രിക്കന് പേസര് മാര്കോ ജാന്സന്റെ പന്തില് വിക്കറ്റിന് മുന്നില് കുരുങ്ങിയാണ് രോഹിത് പുറത്തായത്.
