'സഞ്ജു എന്ത് തെറ്റാണ് ചെയ്തത്..?, ഇത് സങ്കടകരമാണ്, ഏകദിന ശരാശരി 57 ആണ്, ധ്രുവ് ജൂറേല്‍ എങ്ങനെ ടീമിലെത്തി? ദക്ഷിണാഫ്രിക്കയ്ക്ക് എതിരായ ഏകദിന ടീമില്‍ മലയാളി താരത്തെ ഉള്‍പ്പെടുത്താത്തതില്‍ വിമര്‍ശനവുമായി മുന്‍ ഇന്ത്യന്‍ താരം
'സഞ്ജു എന്ത് തെറ്റാണ് ചെയ്തത്..?, ഇത് സങ്കടകരമാണ്, ഏകദിന ശരാശരി 57 ആണ്, ധ്രുവ് ജൂറേല്‍ എങ്ങനെ ടീമിലെത്തി?
ചെന്നൈ: ദക്ഷിണാഫ്രിക്കക്കെതിരായ ഇന്ത്യന്‍ ഏകദിന ടീമില്‍ മൂന്ന് വിക്കറ്റ് കീപ്പര്‍മാരെ പരിഗണിച്ചിട്ടും മലയാളി താരം സഞ്ജു സാംസണെ ഉള്‍പ്പെടുത്താത്തതിനെതിരെ നിരവധി പേര് പ്രതികരണങ്ങളുമായി രംഗത്തുവന്നിരുന്നു. സഞ്ജുവിനെ ഉള്‍പ്പെടുത്താത്തത് നിരാശാജനകവും സങ്കടകരവുമാണെന്ന് മുന്‍ ഇന്ത്യന്‍ താരം സുബ്രഹ്‌മണ്യം ബദരീനാഥ് പറഞ്ഞു.
നവംബര്‍ 30 ന് ആരംഭിക്കുന്ന ദക്ഷിണാഫ്രിക്കക്കെതിരായ ഏകദിന ടീമില്‍ കെ.എല്‍. രാഹുല്‍, ഋഷഭ് പന്ത്, ധ്രുവ് ജുറല്‍ എന്നീ മൂന്ന് വിക്കറ്റ് കീപ്പര്‍മാരാണ് ഇടംപിടിച്ചത്. ദക്ഷിണാഫ്രിക്കെതിരായ കഴിഞ്ഞ ഏകദിനത്തില്‍ സെഞ്ച്വറി നേടിയ സഞ്ജുവിനെ ഒഴിവാക്കിയത് എന്ത് അടിസ്ഥാനത്തിലാണെന്ന് ബദരീനാഥ് ചോദിച്ചു.
' സഞ്ജു സാംസണെ ഓര്‍ത്ത് എനിക്ക് വളരെ സങ്കടമുണ്ട്.. കഴിഞ്ഞ ഏകദിനത്തില്‍ അദ്ദേഹം സെഞ്ച്വറി നേടി. അദ്ദേഹത്തിന്റെ ഏകദിന ശരാശരി 57 ആണ്. പക്ഷേ അദ്ദേഹത്തിന് ഇന്ത്യന്‍ ഏകദിന ടീമില്‍ ഇടം ലഭിച്ചില്ല. അദ്ദേഹം എന്ത് തെറ്റാണ് ചെയ്തതെന്ന് എനിക്ക് മനസ്സിലാകുന്നില്ല.
ഋഷഭ് പന്ത് ടീമിലുള്ളത് എന്തുകൊണ്ടാണെന്ന് എനിക്ക് മനസ്സിലാകും. പക്ഷേ, ധ്രുവ് ജൂറല്‍ എന്തിന്റെ അടിസ്ഥാനത്തിലാണ് ടീമിലുള്ളതെന്ന് എനിക്ക് മനസ്സിലാകുന്നില്ല. സഞ്ജു സാംസണിന്റെ സ്ഥാനത്ത് ഞാനും ഉണ്ടായിരുന്നു. ടീമില്‍ നമ്മുടെ പേര് ഉള്‍പ്പെടുത്താതിരിക്കുന്നതും ചതിക്കപ്പെടുന്നതും കാണുമ്പോഴെല്ലാം വല്ലാത്ത വേദനയാണ്.'- സുബ്രഹ്‌മണ്യം ബദരീനാഥ്.
ഇന്ത്യയുടെ മുന്‍ ഇതിഹാസ സ്പിന്നര്‍ അനില്‍ കുംബ്ലെയും സഞ്ജുവിനെ പിന്തുണച്ചു. ' ഇന്ത്യന്‍ ഏകദിന ടീമിലെ ഒരാളുടെ പേര് നഷ്ടമായി, സഞ്ജു സാംസണ്‍. കഴിഞ്ഞ ഏകദിനത്തില്‍ അദ്ദേഹം സെഞ്ച്വറി നേടി, ആസ്ട്രേലിയയ്ക്കെതിരായ ഏകദിന പരമ്പരയില്‍ അദ്ദേഹം ഇടം നേടിയില്ലെങ്കിലും, ഈ പരമ്പരയില്‍ അദ്ദേഹം ഇടം നേടേണ്ടതായിരുന്നു.' അനില്‍ കുംബ്ലെ പറഞ്ഞു.