സെമിയിൽ ജോക്കോവിച്ച് വീണു; യുഎസ് ഓപ്പണ്‍ ഫൈനലില്‍ ജാനിക് സിന്നറും കാർലോസ് അൽകാരസും ഏറ്റുമുട്ടും
ന്യൂയോർക്ക്: യു.എസ് ഓപ്പൺ ടെന്നീസ് ടൂർണമെന്‍റിന്‍റെ പുരുഷ സിംഗിൾസ് ഫൈനലിൽ ഇറ്റലിയുടെ ജാനിക് സിന്നറും സ്പെയിനിന്‍റെ കാർലോസ് അൽകാരസും തമ്മിൽ ഏറ്റുമുട്ടും. സെമിഫൈനലിൽ കാനഡയുടെ ഫെലിക്സ് ഓഗർ-അലിയാസിനെ നാല് സെറ്റുകൾ നീണ്ട കടുത്ത പോരാട്ടത്തിനൊടുവിലാണ് സിന്നർ ഫൈനൽ ടിക്കറ്റ് ഉറപ്പിച്ചത്. ഞായറാഴ്ച നടക്കുന്ന ഫൈനലിൽ നിലവിലെ ചാമ്പ്യൻ കൂടിയായ സിന്നർ കിരീടം നിലനിർത്താnirangu മ്പോൾ, അൽകാരസ് തന്‍റെ കരിയറിലെ രണ്ടാമത്തെ യു.എസ് ഓപ്പൺ കിരീടം ലക്ഷ്യമിടുന്നു.
സെമിഫൈനലിൽ സിന്നർ 6-1, 3-6, 6-3, 6-4 എന്ന സ്കോറിനാണ് ഓഗർ-അലിയാസിനെ പരാജയപ്പെടുത്തിയത്. ആദ്യ സെറ്റ് അനായാസം നേടിയെങ്കിലും രണ്ടാം സെറ്റിൽ ഓഗർ-അലിയാസിന്‍റെ ശക്തമായ തിരിച്ചുവരവ് സിന്നർക്ക് വെല്ലുവിളിയായി. എന്നാൽ, പിന്നീടുള്ള രണ്ട് സെറ്റുകളിൽ മികച്ച പ്രകടനം കാഴ്ചവെച്ച് സിന്നർ വിജയം സ്വന്തമാക്കുകയായിരുന്നു.
മറുവശത്ത്, സെമിഫൈനലിൽ സെർബിയയുടെ നൊവാക് ദ്യോകോവിച്ചിനെ നേരിട്ടുള്ള സെറ്റുകൾക്ക് പരാജയപ്പെടുത്തിയാണ് അൽകാരസ് ഫൈനലിലെത്തിയത്. 4–6, 6–7 (4–7), 2–6 എന്ന സ്കോറിനാണ് സ്പാനിഷ് താരം വിജയം നേടിയത്. കരിയറിലെ 25-ാം ഗ്രാൻഡ്സ്ലാം കിരീടം ലക്ഷ്യമിട്ടെത്തിയ 38-കാരനായ ദ്യോകോവിച്ചിന് അൽകാരസിന്‍റെ മുന്നിൽ പിടിച്ചുനിൽക്കാൻ സാധിച്ചില്ല. തുടക്കം മുതൽ മികച്ച രീതിയിൽ കളിച്ച അൽകാരസ് ആദ്യ സെറ്റ് നേടിയ ശേഷം രണ്ടാം സെറ്റിൽ ടൈബ്രേക്കറിലൂടെയും വിജയം ഉറപ്പിച്ചു. മൂന്നാം സെറ്റിൽ ദ്യോകോവിച്ചിന് യാതൊരു അവസരവും നൽകാതെ അൽകാരസ് വിജയം കരസ്ഥമാക്കി.
ഈ വർഷം ഇത് മൂന്നാം തവണയാണ് ഒരു ഗ്രാൻഡ്സ്ലാം ടൂർണമെന്‍റിന്‍റെ ഫൈനലിൽ സിന്നറും അൽകാരസും പരസ്പരം ഏറ്റുമുട്ടുന്നത്. ഓസ്ട്രേലിയൻ ഓപ്പണിൽ മാത്രമാണ് ഇവർ വ്യത്യസ്ത ഫൈനലിസ്റ്റുകളുണ്ടായിരുന്നത്. ഫ്രഞ്ച് ഓപ്പണിലും വിംബിൾഡണിലും ഇരുവരും ഓരോ തവണ വീതം വിജയം നേടിയിരുന്നു. ഞായറാഴ്ചത്തെ പോരാട്ടം തീപാറുമെന്ന് ഉറപ്പാണ്.