വിജയ്-സംഗീത വിവാഹമോചനം: തമിഴക രാഷ്ട്രീയത്തില് പ്രകമ്പനം; 'മുഖ്യമന്ത്രി' മോഹത്തിന് തിരിച്ചടിയാകുമോ വിവാഹേതര ബന്ധ ആരോപണം? ആ നടി ആരെന്ന് വിജയ് വെളിപ്പെടുത്തുമോ? ധാര്മ്മികതയും പ്രതിച്ഛായയും ചര്ച്ചയാക്കാന് രാഷ്ട്രീയ എതിരാളികള്;'കുടുംബം സംരക്ഷിക്കാന് കഴിയാത്തയാള് എങ്ങനെ നാട് സംരക്ഷിക്കും?' ഈ ചോദ്യത്തെ വിജയ് അതിജീവിക്കുമോ?
ചെന്നൈ: തമിഴ് സൂപ്പര്താരവും തമിഴക വെട്രി കഴകം (ടി.വി.കെ.) അധ്യക്ഷനുമായ വിജയ്യുടെ കുടുംബജീവിതത്തിലുണ്ടായ അസ്വാരസ്യങ്ങള് തമിഴ്നാട് രാഷ്ട്രീയത്തില് വലിയ ചര്ച്ചയാകുന്നു. ഭാര്യ സംഗീത വിവാഹമോചനം തേടി കോടതിയെ സമീപിച്ചെന്ന വാര്ത്ത ആരാധകരെ മാത്രമല്ല, വിജയ്യുടെ രാഷ്ട്രീയ ഭാവിയെ ഉറ്റുനോക്കുന്നവരെയും ഞെട്ടിച്ചിരിക്കുകയാണ്. വിജയ്ക്ക് ഒരു പ്രമുഖ നടിയുമായി വിവാഹേതര ബന്ധമുണ്ടെന്ന സംഗീതയുടെ ആരോപണം രാഷ്ട്രീയ എതിരാളികള്ക്ക് വലിയ ആയുധമായി മാറുകയാണ്.
2021 മുതല് വിജയ്ക്ക് ഒരു നടിയുമായി ബന്ധമുണ്ടെന്നും പലതവണ വിലക്കിയിട്ടും അത് തുടര്ന്നെന്നുമാണ് സംഗീത വിവാഹമോചന ഹര്ജിയില് ആരോപിക്കുന്നത്. നടിയുമായുള്ള ബന്ധം അവസാനിപ്പിക്കാമെന്ന വാഗ്ദാനം വിജയ് ലംഘിച്ചതോടെ താന് മാനസികമായി തകര്ന്നുപോയെന്നും അഞ്ചുവര്ഷത്തിലേറെയായി വേര്പിരിഞ്ഞാണ് താമസിക്കുന്നതെന്നും സംഗീത വ്യക്തമാക്കുന്നു. വിജയ് നടിക്കൊപ്പം വിദേശയാത്രകള് നടത്തുന്നതും ചിത്രങ്ങള് സമൂഹമാധ്യമങ്ങളില് വരുന്നത് തനിക്കും മക്കള്ക്കും അപമാനമാണെന്നും പരാതിയിലുണ്ട്.
മുഖ്യമന്ത്രി പദം ലക്ഷ്യമിട്ട് രാഷ്ട്രീയ പാര്ട്ടിയുമായി മുന്നോട്ടുപോകുന്ന വിജയ്ക്ക് ഈ ആരോപണങ്ങള് വലിയ വെല്ലുവിളിയാണ്. തമിഴ് രാഷ്ട്രീയത്തില് നേതാക്കളുടെ സ്വഭാവശുദ്ധിയും കുടുംബജീവിതവും തിരഞ്ഞെടുപ്പുകളില് വലിയ സ്വാധീനം ചെലുത്താറുണ്ട്. ഭാര്യയെ വഞ്ചിച്ചു എന്ന ആരോപണം കുടുംബ വോട്ടര്മാര്ക്കിടയില് വിജയ്യുടെ പ്രതിച്ഛായയെ ബാധിച്ചേക്കാം. ഡി.എം.കെയും എ.ഐ.എ.ഡി.എം.കെയും വിജയ്യുടെ ഈ വ്യക്തിപരമായ പ്രശ്നത്തെ രാഷ്ട്രീയമായി എങ്ങനെ ഉപയോഗിക്കുമെന്നത് കണ്ടറിയണം. വിജയ്യുമായി ബന്ധമുണ്ടെന്ന് പറയപ്പെടുന്ന നടിയുടെ പേര് വെളിപ്പെട്ടാല് അത് തമിഴ് സിനിമാ-രാഷ്ട്രീയ ലോകത്ത് വലിയ സ്ഫോടനങ്ങള്ക്ക് വഴിവെക്കും. വിജയ് ഇതുവരെയും ഇതിനോട് പ്രതികരിച്ചിട്ടില്ല.
ലണ്ടന് ആസ്ഥാനമായുള്ള വ്യവസായി സ്വര്ണ്ണലിംഗത്തിന്റെ മകളും ശ്രീലങ്കന് തമിഴ് വംശജയുമായ സംഗീത വിജയ്യുടെ കടുത്ത ആരാധകയായിരുന്നു. 1999 ആഗസ്റ്റ് 25-നായിരുന്നു ഇവരുടെ വിവാഹം. ജെയ്സണ് സഞ്ജയ്, ദിവ്യ സാഷ എന്നീ രണ്ട് മക്കളുണ്ട്. മാധ്യമശ്രദ്ധയില് നിന്ന് എപ്പോഴും അകലം പാലിച്ചിരുന്ന സംഗീത, അത്യന്തം ഗൗരവകരമായ സാഹചര്യത്തിലാണ് കോടതിയെ സമീപിച്ചിരിക്കുന്നത്. വിജയ്യുടെ രാഷ്ട്രീയ യാത്രയുടെ തുടക്കത്തില് തന്നെയുണ്ടായ ഈ കല്ലുകടികള് ആരാധകരെ ആശങ്കയിലാക്കുന്നുണ്ട്. വിവാഹമോചന വാര്ത്തയോടും തനിക്കെതിരെ ഉയര്ന്ന ആരോപണങ്ങളോടും വിജയ് എപ്പോള് പ്രതികരിക്കുമെന്നാണ് തമിഴ്നാട് ഉറ്റുനോക്കുന്നത്.
തമിഴക വെട്രി കഴകം എന്ന പാര്ട്ടിയുമായി സംസ്ഥാന ഭരണത്തിലേക്ക് ഉന്നമിടുന്ന വിജയ്ക്ക് തന്റെ കരിയറിലെ ഏറ്റവും വലിയ പ്രതിസന്ധിയാണ് ഈ വിവാഹമോചന കേസ്. കേവലം ഒരു കുടുംബപ്രശ്നമെന്നതിലുപരി, ഇത് വിജയ്യുടെ രാഷ്ട്രീയ വിശ്വാസ്യതയെ തന്നെ ചോദ്യം ചെയ്യുന്ന ഒന്നായി തമിഴ് രാഷ്ട്രീയ വൃത്തങ്ങള് കാണുന്നു. തമിഴ്നാട്ടിലെ വലിയൊരു ശതമാനം സ്ത്രീ വോട്ടര്മാരും വിജയ്യുടെ ആരാധകരാണ്. എന്നാല് കുടുംബത്തോട് നീതി പുലര്ത്താത്ത വ്യക്തി എന്ന പ്രതിച്ഛായ വന്നാല്, ഈ വോട്ട് ബാങ്കില് വലിയ വിള്ളലുണ്ടാകും എന്ന് വിലയിരുത്തലുണ്ട്. സംഗീതയുടെ ഹര്ജിയിലെ 'മാനസികമായി തകര്ന്നു' എന്ന വരികള് വൈകാരികമായി വിജയ്ക്ക് എതിരെ ഉപയോഗിക്കപ്പെടാം.
കലൈഞ്ജര് കരുണാനിധിയെയോ എം.ജി.ആറിനെയോ പോലെ ഒരു യുഗപുരുഷനാകാന് ശ്രമിക്കുന്ന വിജയ്ക്ക്, തുടക്കത്തിലേ ഇത്തരമൊരു 'കരിനിഴല്' വീഴുന്നത് രാഷ്ട്രീയ എതിരാളികള് ആഘോഷിക്കും. 2021 മുതല് വിജയ്ക്കൊപ്പം അഭിനയിച്ച നടിമാരുടെ പേരുകളാണ് ഇപ്പോള് സോഷ്യല് മീഡിയയില് ഉയര്ന്നു കേള്ക്കുന്നത്. വിജയ്യുടെ രാഷ്ട്രീയ പ്രവേശം ഡി.എം.കെ ഉള്പ്പെടെയുള്ള വലിയ പാര്ട്ടികളെ അസ്വസ്ഥരാക്കിയിട്ടുണ്ട്. സംഗീതയുടെ ഈ നീക്കത്തിന് പിന്നില് രാഷ്ട്രീയമായ ചരടുവലികള് ഉണ്ടോ എന്ന സംശയം വിജയ് ആരാധകര് ഉയര്ത്തുന്നുണ്ട്. വിജയ്യെ രാഷ്ട്രീയമായി നേരിടുന്നതിന് പകരം വ്യക്തിപരമായി തകര്ക്കാന് ശ്രമിക്കുകയാണെന്ന വാദം ഒരു വിഭാഗം ആരാധകര് ഉയര്ത്തുന്നുണ്ടെങ്കിലും, സംഗീത തന്നെ നേരിട്ട് കോടതിയെ സമീപിച്ചത് ഈ വാദത്തിന്റെ മുന ഒടിക്കുന്നു.
'കുടുംബം സംരക്ഷിക്കാന് കഴിയാത്തയാള് എങ്ങനെ നാട് സംരക്ഷിക്കും?' എന്ന ചോദ്യം തമിഴ് ടോക്ക് ഷോകളില് ഇതിനോടകം ഉയര്ന്നു കഴിഞ്ഞു. തിരഞ്ഞെടുപ്പിന് തൊട്ടുമുന്പ് ഈ കേസ് കോടതിയില് വരുന്നത് വിജയ്യുടെ പാര്ട്ടി അണികളുടെ ആത്മവീര്യം കെടുത്തുമെന്ന കാര്യത്തില് സംശയമില്ല. വിജയ് രാഷ്ട്രീയ പ്രസംഗങ്ങളില് ഇനി എന്ത് പറയും എന്നത് നിര്ണ്ണായകമാണ്. ഈ വിവാദങ്ങളെ അവഗണിച്ചാല് അത് കൂടുതല് തിരിച്ചടിയാകുമെന്നും വിലയിരുത്തലുണ്ട്.
