ഇറാന്റെ നട്ടെല്ലൊടിച്ച് ഇസ്രയേല് സേന; പത്ത് പാലങ്ങളും റെയില്വേ ട്രാക്കുകളും തകര്ത്തു; മിസൈല് ലോഞ്ചറുകള് മാറ്റാനാവാതെ ടെഹ്റാന് കുടുങ്ങി; ഷിറാസിലെ പെട്രോകെമിക്കല് കേന്ദ്രവും ബോംബിട്ട് തകര്ത്തു; 130 പ്രതിരോധ സംവിധാനങ്ങള് തകര്ന്നു; ബാബ് അല്-മന്ദാബ് കടലിടുക്ക് അടച്ചുപൂട്ടുമെന്ന് ഇറാന്റെ ഭീഷണി; മേഖലയാകെ 'സമ്പൂര്ണ്ണ ഇരുട്ടിലാകുമെന്നും' മുന്നറിയിപ്പ്
ഇറാന്റെ നട്ടെല്ലൊടിച്ച് ഇസ്രയേല് സേന
ടെഹ്റാന്/വാഷിംഗ്ടണ്: ലോകം ശ്വാസമടക്കിപ്പിടിച്ചു നില്ക്കുന്ന നിമിഷങ്ങള്. ഇറാന്റെ മണ്ണില് ഇസ്രായേല് വ്യോമസേന നടത്തുന്ന 'ഓപ്പറേഷന് റോറിംഗ് ലയണ്' അതിന്റെ ലക്ഷ്യത്തിലേക്ക് കുതിക്കുകയാണ്. ഇറാന്റെ മിസൈല് കരുത്തിനെയും സാമ്പത്തിക സ്രോതസ്സുകളെയും ഒരേസമയം തകര്ക്കുന്ന തന്ത്രപരമായ നീക്കങ്ങളാണ് കഴിഞ്ഞ മണിക്കൂറുകളില് നടന്നത്. ഒരുവശത്ത് അമേരിക്കന് പ്രസിഡന്റ് ട്രംപ് നല്കിയ സമയപരിധി അവസാനിക്കുമ്പോള്, മറുവശത്ത് ഇസ്രായേല് സൈന്യം ഇറാന്റെ പശ്ചാത്തല സൗകര്യങ്ങളെ ഓരോന്നായി ചാരമാക്കുകയാണ്.
ഇറാന്റെ റെയില് ശൃംഖലകളും പാലങ്ങളും തകര്ത്ത് ഇസ്രയേല്
ഇറാന്റെ മിസൈല് ലോഞ്ചറുകള് ഒരിടത്തുനിന്ന് മറ്റൊരിടത്തേക്ക് മാറ്റുന്നത് തടയാനും അവ ഇസ്രായേല്-അമേരിക്കന് സൈന്യത്തിന് കണ്ടെത്താന് എളുപ്പമാക്കാനുമായി ഇറാന്റെ റെയില്വേ ശൃംഖലകളും പാലങ്ങളും ലക്ഷ്യം വെച്ച് ഇസ്രായേല് സൈന്യം (IDF) ആക്രമണം നടത്തി. കരാജ് (Karaj), ഖാസ്വിന് (Qazvin) എന്നിവിടങ്ങളിലെ റെയില്വേ പാതകളാണ് ആക്രമിക്കപ്പെട്ടത്. കൂടാതെ കാഷാന് (Kashan), തബ്രിസ്-സഞ്ജാന് (Tabriz-Zanjan) എന്നിവിടങ്ങളിലെ പാലങ്ങളും ഈ ആക്രമണ പരമ്പരയില് തകര്ക്കപ്പെട്ടു.
ആകെ പത്ത് പാലങ്ങളും റെയില്വേ പാതകളുമാണ് ആക്രമിക്കപ്പെട്ടതെന്ന് ആര്മി റേഡിയോ റിപ്പോര്ട്ട് ചെയ്തു. ഇറാന്റെ ആയുധ കൈമാറ്റ ശേഷി നശിപ്പിക്കുകയും ഇറാനിയന് സമ്പദ്വ്യവസ്ഥയ്ക്ക് ആഘാതമേല്പ്പിക്കുകയുമായിരുന്നു ഈ സൈനിക നീക്കത്തിന്റെ പ്രധാന ലക്ഷ്യം.
പാലങ്ങള്ക്കും റെയില്വേകള്ക്കും നേരെയുള്ള ആക്രമണ വാര്ത്തകള്ക്ക് പിന്നാലെ ഇസ്രായേല് സൈന്യം ഔദ്യോഗിക പ്രതികരണം നടത്തി. 'ഇറാന്റെ വിവിധ ഭാഗങ്ങളിലുള്ള ഭീകര ഭരണകൂടത്തിന്റെ ഡസന് കണക്കിന് അടിസ്ഥാന സൗകര്യങ്ങള് ലക്ഷ്യമിട്ടുള്ള വിപുലമായ ആക്രമണ പരമ്പര പൂര്ത്തിയാക്കി' എന്ന് ഐഡിഎഫ് (IDF) വ്യക്തമാക്കി.
ഷിറാസിലെ പെട്രോകെമിക്കല് കേന്ദ്രം തകര്ത്ത് ഐഡിഎഫ്
ഇറാനിലെ ഷിറാസിലുള്ള പെട്രോകെമിക്കല് കോംപ്ലക്സിന് നേരെ തിങ്കളാഴ്ച ആക്രമണം നടത്തിയതായി ഇസ്രായേല് സൈന്യം ചൊവ്വാഴ്ച അറിയിച്ചു. മിസൈലുകളുടെ നിര്മ്മാണത്തിനും സ്ഫോടകവസ്തുക്കള് ഉണ്ടാക്കുന്നതിനും അത്യാവശ്യമായ നൈട്രിക് ആസിഡ് ഉല്പ്പാദിപ്പിക്കാനാണ് ഈ കേന്ദ്രം ഉപയോഗിച്ചിരുന്നതെന്ന് സൈന്യം വ്യക്തമാക്കി. ഇത്തരത്തില് മിസൈലുകള്ക്കും സ്ഫോടകവസ്തുക്കള്ക്കും വേണ്ട നിര്ണ്ണായക രാസവസ്തുക്കള് നിര്മ്മിക്കുന്ന ഇറാന്റെ പക്കലുള്ള 'അവസാനത്തെ പ്രധാന കേന്ദ്രങ്ങളില് ഒന്ന്' കൂടിയായിരുന്നു ഇതെന്ന് സൈന്യം കൂട്ടിച്ചേര്ത്തു.
ദക്ഷിണ ഇറാനിലെ അസലൂയയ്ക്ക് (Asaluyeh) സമീപമുള്ള ഇറാനിലെ ഏറ്റവും വലിയ പെട്രോകെമിക്കല് കേന്ദ്രമായ സൗത്ത് പാര്സ് (South Pars) ഐഡിഎഫ് തകര്ത്തതായി പ്രതിരോധ മന്ത്രി ഇസ്രായേല് കാറ്റ്സ് തിങ്കളാഴ്ച സ്ഥിരീകരിച്ചിരുന്നു. ഇതിന് പിന്നാലെയാണ് പുതിയ വിവരങ്ങളും ഇന്ഫോഗ്രാഫിക്സും സൈന്യം പുറത്തുവിട്ടത്. ഈ കേന്ദ്രത്തിന്റെ പ്രവര്ത്തനം പൂര്ണ്ണമായും നിലച്ചുവെന്നും, ഇറാന്റെ പെട്രോകെമിക്കല് കയറ്റുമതിയുടെ 85 ശതമാനവും കൈകാര്യം ചെയ്യുന്ന രണ്ട് പ്രധാന കേന്ദ്രങ്ങളെയും ഐഡിഎഫ് ആക്രമണത്തിലൂടെ 'ഉപയോഗശൂന്യമാക്കി' എന്നും അദ്ദേഹം പറഞ്ഞു.
'ഇറാനിയന് ഭീകര ഭരണകൂടത്തിന്റെ പശ്ചാത്തല സൗകര്യങ്ങള്ക്ക് നേരെ ആക്രമണം തുടരാന് പ്രധാനമന്ത്രി ബെഞ്ചമിന് നെതന്യാഹുവും ഞാനും ഐഡിഎഫിന് നിര്ദ്ദേശം നല്കിയിട്ടുണ്ട്,' കാറ്റ്സ് പറഞ്ഞു. ഐആര്ജിസിയുടെയും (IRGC) ഇറാന്റെ സൈനിക വ്യവസായത്തിന്റെയും പ്രധാന സാമ്പത്തിക സ്രോതസ്സാണ് പെട്രോകെമിക്കല് വ്യവസായമെന്നും അദ്ദേഹം കൂട്ടിച്ചേര്ത്തു. ഇതിനുപുറമെ, ശനിയാഴ്ച മാഹ്ഷഹറിലെ (Mahshahr) പെട്രോകെമിക്കല് സമുച്ചയത്തിന് നേരെയും ഐഡിഎഫ് ആക്രമണം നടത്തിയിരുന്നു. ആയുധങ്ങള്ക്കാവശ്യമായ രാസവസ്തുക്കള് നിര്മ്മിക്കുന്ന പ്രധാന കേന്ദ്രങ്ങളിലൊന്നാണിവ.
വ്യോമ പ്രതിരോധ സംവിധാനങ്ങളെ തകര്ക്കുന്നത് തുടരുന്നു
ഇറാന്റെ വ്യോമ പ്രതിരോധ സംവിധാനങ്ങളെ തകര്ക്കുന്നതിന്റെ ദൃശ്യങ്ങള് ഇസ്രായേല് വ്യോമസേന ചൊവ്വാഴ്ച പുറത്തുവിട്ടു. പ്രതിരോധ സംവിധാനങ്ങളെ തകര്ക്കാന് ഉപയോഗിച്ച മിസൈലുകളില് ഘടിപ്പിച്ച ക്യാമറകളില് നിന്നുള്ള ദൃശ്യങ്ങളാണ് സൈന്യം പങ്കുവെച്ചത്. നിശ്ചിത കാലയളവില് നടത്തിയ വിവിധ ആക്രമണങ്ങളുടെ ദൃശ്യങ്ങളാണിവ.
സൈനിക വൃത്തങ്ങള് നല്കുന്ന വിവരമനുസരിച്ച്, ഇതുവരെ ഇറാന്റെ 130-ലധികം സംവിധാനങ്ങള് 'തകര്ത്തു'. എന്നാല്, ഫെബ്രുവരി 28-ന് ആരംഭിച്ച 'ഓപ്പറേഷന് റോറിംഗ് ലയണ്' (Operation Roaring Lion) തുടങ്ങിയത് മുതലുള്ള കണക്കാണോ ഇതെന്നും, അതോ ഈ നീക്കത്തിനിടയിലെ ഏതെങ്കിലും പ്രത്യേക സമയപരിധിയിലുള്ളതാണോ എന്നും സൈന്യം വ്യക്തമാക്കിയിട്ടില്ല. 'ഇറാനിലുടനീളമുള്ള ഭീകര ഭരണകൂടത്തിന്റെ ഫയര് അറേകളും വ്യോമ പ്രതിരോധ സംവിധാനങ്ങളും വ്യവസ്ഥാപിതമായി തകര്ക്കാനുള്ള ശ്രമങ്ങള് ഐഡിഎഫ് തുടരുകയാണ്,' എന്നും സൈന്യം പ്രസ്താവനയില് പറഞ്ഞു.
അതേസമയം, ചൊവ്വാഴ്ച രാവിലെ ഏകദേശം 10:30-ഓടെ ടെഹ്റാനില് നടന്ന ആക്രമണങ്ങളുടെ ദൃശ്യങ്ങള് ഇറാനിയന് മാധ്യമങ്ങള് പുറത്തുവിട്ടു. ഷിയാ മുസ്ലീങ്ങളുടെ പുണ്യനഗരമായ കോമിലും (Qom) ചൊവ്വാഴ്ച രാവിലെ ആക്രമണം നടന്നതായി റിപ്പോര്ട്ടുകളുണ്ട്. ലണ്ടന് ആസ്ഥാനമായുള്ള 'ദി ടൈംസ്' (The Times) ചൊവ്വാഴ്ച പുറത്തുവിട്ട റിപ്പോര്ട്ട് പ്രകാരം, ഇറാന്റെ പരമോന്നത നേതാവ് മൊജ്തബ ഖമേനി നിലവില് കോമിലാണുള്ളതെന്നും, അദ്ദേഹം അബോധാവസ്ഥയിലാണെന്നും ഭരണകൂടത്തെ നയിക്കാന് പ്രാപ്തനല്ലെന്നും വ്യക്തമാക്കുന്നു.
ബാബ് അല്-മന്ദാബ് കടലിടുക്ക് അടച്ചുപൂട്ടുമെന്ന് ഇറാന്റെ ഭീഷണി
സാഹചര്യങ്ങള് നിയന്ത്രണാതീതമായാല് ഇറാന്റെ സഖ്യകക്ഷികള് ബാബ് അല്-മന്ദാബ് (Bab El-Mandeb) ജലപാത അടച്ചുപൂട്ടുമെന്ന് മുതിര്ന്ന ഇറാനിയന് ഉദ്യോഗസ്ഥന് ചൊവ്വാഴ്ച റോയിട്ടേഴ്സിനോട് പറഞ്ഞു. ഇറാന്റെ പവര് പ്ലാന്റുകള്ക്ക് നേരെ ആക്രമണം നടത്തുമെന്ന ഭീഷണി അമേരിക്ക നടപ്പിലാക്കിയാല് മേഖലയാകെ 'സമ്പൂര്ണ്ണ ഇരുട്ടിലാകുമെന്നും' അദ്ദേഹം മുന്നറിയിപ്പ് നല്കി.
