പാരീസിലെത്തിയ ഐശ്വര്യയെക്കണ്ട് കണ്ണീരടക്കാനാകാതെ ആരാധിക; കണ്ണീരൊപ്പി ചേര്‍ത്തുപിടിച്ച് നടി
പാരീസിലെത്തിയ ഐശ്വര്യയെക്കണ്ട് കണ്ണീരടക്കാനാകാതെ ആരാധിക; കണ്ണീരൊപ്പി ചേര്‍ത്തുപിടിച്ച് നടി
പാരീസ്: പാരീസ് ഫാഷന്‍ വീക്കില്‍ വീണ്ടും എത്തിയിരിക്കുകയാണ് പ്രേക്ഷകരുടെ പ്രിയതാരം ഐശ്വര്യ റായ്. താരം വീണ്ടും റാംപില്‍ നടക്കുന്നത് കണ്ട് ആരാധകര്‍ ആവേശത്തിലാണ്. മകള്‍ ആരാധ്യ ബച്ചനൊപ്പമാണ് താരം പാരീസില്‍ എത്തിയത്. ഐശ്വര്യയുടെും ആരാധ്യയുടെയും പാരിസില്‍ നിന്നുള്ള വീഡിയോകള്‍ സമൂഹമാധ്യമത്തില്‍ വൈറലാണ്. കോസ്മെറ്റിക് കമ്പനിയായ ലോറിയലിന്റെ ബ്രാന്‍ഡ് അംബാസഡറായാണ് ഐശ്വര്യ ഫാഷന്‍ വീക്കില്‍ പങ്കെടുക്കാനെത്തിയത്.
താരത്തെ കാണാന്‍ ആരാധകര്‍ ഹോട്ടലിന് പുറത്ത് കാത്തുനില്‍ക്കുന്നത് വിഡിയോയില്‍ കാണാം. വൈറല്‍ വിഡിയോയില്‍ ഐശ്വര്യ നീല സ്യൂട്ടാണ് ധരിച്ചിരിക്കുന്നത്. വാഹനത്തില്‍ കയറാന്‍ ഒരുങ്ങവേയാണ് നടി തന്നെ കണ്ട സന്തോഷത്തില്‍ കരയുന്ന ആരാധികയെ ശ്രദ്ധിക്കുന്നത്. അവര്‍ ഐശ്വര്യയോട് ഫോട്ടോ എടുക്കട്ടേ എന്ന് ചോദിക്കുന്നുണ്ട്. ആരാധികയെ ചേര്‍ത്തു പിടിച്ച് കണ്ണീര്‍ തുടച്ച് ഒപ്പം നിര്‍ത്തുന്ന ഐശ്യര്യ റായിയെ നമുക്ക് വിഡിയോയില്‍ കാണാം.
പ്രശസ്ത ഡിസൈനര്‍ മനീഷ് മല്‍ഹോത്ര നിര്‍മിച്ച ഇന്ത്യന്‍ ഷെര്‍വാണിയിലാണ് താരം ചടങ്ങിലെത്തിയത്. പാരീസിലെ ഹോട്ടല്‍ ഡി വില്ലയില്‍ നടന്ന പാരീസ് ഫാഷന്‍ വീക്കിന്റെ വിമന്‍സ് റെഡി-ടു-വെയര്‍ സ്പ്രിങ്-സമ്മര്‍ 2026 കലക്ഷന്റെ ഭാഗമായായിരുന്നു പരിപാടി. ഐശ്വര്യ എല്ലാ വര്‍ഷവും പാരീസ് ഫാഷന്‍ വീക്കില്‍ റാംപില്‍ എത്താറുണ്ട്. ഐശ്വര്യക്കൊപ്പം, ആലിയ ഭട്ടും ലോറിയലിന്റെ ആഗോള ബ്രാന്‍ഡ് അംബാസഡറാണ്. കഴിഞ്ഞ വര്‍ഷം, ആലിയയും ഐശ്വര്യയും ഒരേ ബ്രാന്‍ഡിനായി പാരീസ് ഫാഷന്‍ വീക്കില്‍ റാംപില്‍ നടന്നിരുന്നു.