അന്താരാഷ്‌ട്ര ചലച്ചിത്ര മേളകളിൽ പ്രശംസ; 'മസാൻ' സംവിധായകൻ നീരജ് ഗായ്‌വാന്റെ 'ഹോംബൗണ്ട്' സെപ്തംബർ 26ന് തിയേറ്ററുകളിലേക്ക്
മുംബൈ: 2015-ൽ പുറത്തിറങ്ങി ഏറെ നിരൂപക പ്രശംസ നേടിയ 'മസാൻ' എന്ന ചിത്രത്തിന് ശേഷം സംവിധായകൻ നീരജ് ഗായ്‌വാൻ ഒരുക്കിയ പുതിയ ചിത്രം 'ഹോംബൗണ്ട്' സെപ്തംബർ 26-ന് തിയേറ്ററുകളിൽ പ്രദർശനത്തിനെത്തും. ഇഷാൻ ഖട്ടർ, വിശാൽ ജെത്വ, ജാൻവി കപൂർ എന്നിവർ പ്രധാന വേഷങ്ങളിൽ എത്തുന്ന ചിത്രത്തിന്റെ ട്രെയിലർ ഇതിനോടകം പുറത്തിറങ്ങി.
ഈ വർഷത്തെ കാൻ ഫിലിം ഫെസ്റ്റിവലിൽ 'അൺ സെർട്ടൈൻ റിഗാർഡ്' വിഭാഗത്തിൽ പ്രദർശിപ്പിച്ച 'ഹോംബൗണ്ട്' പ്രേക്ഷക പ്രശംസ നേടിയിരുന്നു. ചിത്രത്തിന് ഒൻപത് മിനിറ്റ് നീണ്ട സ്റ്റാൻഡിംഗ് ഒവേഷനും ലഭിച്ചിരുന്നു. കൂടാതെ, 2025-ലെ ടൊറന്റോ ഇന്റർനാഷണൽ ഫിലിം ഫെസ്റ്റിവലിൽ 'ഇന്റർനാഷണൽ പീപ്പിൾസ് ചോയ്‌സ് അവാർഡ്' വിഭാഗത്തിൽ രണ്ടാം സ്ഥാനവും ചിത്രം കരസ്ഥമാക്കി.
നോർത്ത് ഇന്ത്യയിൽ നിന്നുള്ള രണ്ട് ബാല്യകാല സുഹൃത്തുക്കൾ പോലീസ് സേനയിൽ ചേർന്ന് സമൂഹത്തിൽ ബഹുമാനം നേടാൻ ശ്രമിക്കുന്നതും, ഈ യാത്രയിൽ അവർ നേരിടുന്ന പ്രതിസന്ധികളുമാണ് ചിത്രത്തിന്റെ പ്രധാന പ്രമേയം. ബഷ്‌റാത് പീർ എഴുതിയ ലേഖനത്തെ ആസ്പദമാക്കി നീരജ് ഗായ്‌വാൻ തന്നെയാണ് തിരക്കഥയൊരുക്കിയിരിക്കുന്നത്.
ധർമ്മ പ്രൊഡക്ഷൻസിന്റെ ബാനറിൽ കരൺ ജോഹർ നിർമ്മിക്കുന്ന ചിത്രത്തിന്റെ എക്സിക്യൂട്ടീവ് പ്രൊഡ്യൂസർ ഹോളിവുഡ് സംവിധായകൻ മാർട്ടിൻ സ്കോർസെസെയാണ്. പ്രതീക് ഷാ ഛായാഗ്രഹണവും നിതിൻ ബൈഡ് എഡിറ്റിംഗും നിർവഹിച്ചിരിക്കുന്നു.