അനാവശ്യമായി ഒരുപാട് ഞാൻ ആവശ്യപ്പെടില്ല; എന്നിരുന്നാലും അത് എന്നെ അലട്ടുന്നില്ല; എനിക്ക് അര്‍ഹതയുണ്ടെന്ന് തോന്നിയാൽ ഞാന്‍ ആവശ്യപ്പെടും; തുറന്നുപറഞ്ഞ് പ്രിയാമണി
ദേശീയ പുരസ്കാരം നേടിയ നടിയും വിവിധ ഭാഷാ ചിത്രങ്ങളിൽ തിളങ്ങിയ താരവുമായ പ്രിയാമണി, സിനിമാ രംഗത്ത് തനിക്ക് സഹനടന്മാരെക്കാൾ കുറഞ്ഞ പ്രതിഫലം ലഭിച്ചിട്ടുണ്ടെന്ന് വെളിപ്പെടുത്തി. തൻ്റെ മാർക്കറ്റ് മൂല്യത്തിനനുസരിച്ചുള്ള പ്രതിഫലം ആവശ്യപ്പെടാൻ മടി കാണിക്കില്ലെന്നും, തനിക്ക് അർഹതയുണ്ടെന്ന് വിശ്വസിക്കുന്ന പ്രതിഫലം ചോദിക്കുമെന്നും പ്രിയാമണി വ്യക്തമാക്കി. സിഎൻഎൻ ന്യൂസ് 18ന് നൽകിയ അഭിമുഖത്തിലാണ് താരം ഇക്കാര്യങ്ങൾ പങ്കുവെച്ചത്.
"നിങ്ങളുടെ മാർക്കറ്റ് മൂല്യം എന്തുതന്നെയായാലും, അത് ആവശ്യപ്പെടണം. അതിനനുസരിച്ചുള്ള തുക നിങ്ങൾക്ക് ലഭിക്കുമെന്ന് പ്രതീക്ഷിക്കാം. എൻ്റെ സഹനടനേക്കാൾ കുറഞ്ഞ പ്രതിഫലം എനിക്ക് ലഭിച്ച സമയങ്ങളുണ്ട്. എന്നിരുന്നാലും അത് എന്നെ അലട്ടുന്നില്ല. എൻ്റെ മാർക്കറ്റ് മൂല്യവും, എൻ്റെ വിലയും എന്താണെന്ന് എനിക്ക് വ്യക്തമായി അറിയാം. ഇതാണ് എൻ്റെ അഭിപ്രായവും അനുഭവവും. എനിക്ക് അർഹതയുണ്ടെന്ന് വിശ്വസിക്കുന്ന പ്രതിഫലം ഞാൻ ചോദിക്കും. അനാവശ്യമായി ഒരുപാട് പ്രതിഫലം ആവശ്യപ്പെടില്ല," പ്രിയാമണി പറഞ്ഞു.
'പരുത്തിവീരൻ' എന്ന ചിത്രത്തിലൂടെ മികച്ച നടിക്കുള്ള ദേശീയ പുരസ്കാരം നേടിയ പ്രിയാമണി, മലയാളം, തമിഴ്, തെലുങ്ക്, കന്നഡ, ഹിന്ദി തുടങ്ങിയ ഭാഷകളിലെല്ലാം സജീവമാണ്. മലയാളത്തിൽ 'ഓഫീസർ ഓൺ ഡ്യൂട്ടി', തമിഴിൽ വിജയ് നായകനാകുന്ന 'ജനനായകൻ' എന്നിവയാണ് താരത്തിൻ്റെ സമീപകാല ചിത്രങ്ങൾ.