'പള്ളിക്കെട്ട് ശബരിമലയ്ക്ക്, കല്ലും മുള്ളും കാലുക്ക് മെത്തൈ.. എന്നു തുടങ്ങുന്ന അയ്യപ്പഭക്തി ഗാനവും ഒരു പാരഡി ഗാനം! നാഗൂര് ദര്ഗ്ഗയിലെ സൂഫി ഗായകര് പരമ്പരാഗതമായി പാടുന്ന 'ഏകനേ യാ അള്ളാ....' ഗാനത്തിന്റെ ഈണത്തില് പള്ളിക്കെട്ട് ഗാനം രചിച്ചത് ഡോ. ഉളുന്തൂര്പേട്ട ഷണ്മുഖം; പോറ്റിയേ കേറ്റിയേ ഗാനവിവാദത്തില് വിവാദത്തില് വഴിത്തിരിവാകുന്ന വെളിപ്പെടുത്തലുമായി എഴുത്തുകാരന് പള്ളിക്കോണം രാജീവ്
'പള്ളിക്കെട്ട് ശബരിമലയ്ക്ക്, കല്ലും മുള്ളും കാലുക്ക് മെത്തൈ.. എന്നു തുടങ്ങുന്ന അയ്യപ്പഭക്തി ഗാനവും ഒരു പാരഡി ഗാനം!
തിരുവനന്തപുരം: പോറ്റിയേ കേറ്റിയേ ഗാനത്തെ കുറിച്ചുള്ള വിവാദം മുറുകുകയാണ്. സിപിഎം താല്പ്പര്യത്താല് പോലീസ് വിഷയത്തില് കേസെടുത്തു കഴിഞ്ഞു. പാരഡി ഗാനത്തിലൂടെ പ്രശസ്തമായ അയ്യപ്പ ഭക്തിഗാനത്തെ അവഹേളിക്കുകയാണ് എന്നാണ് രാജു എബ്രഹാമിനെ പോലുള്ളവര് ആരോപുക്കുന്നത്. സിപിഎം നേരിട്ട് പരാതി നല്കിയേക്കുമെന്നുമാണ് സൂചന. എന്നാല്, ഈ ഗാന വിവാദത്തില് ഇപ്പോള് ഒരു വലിയ വഴിത്തിവ് ഉണ്ടായിരിക്കയാണ്.
എഴത്തുകാരന് പള്ളിക്കോണം രാജീവാണ് വിവാദത്തില് വന്ട്വിസ്റ്റിന് ഇടയാക്കുന്ന വെളിപ്പെടുത്തല് നടത്തിയിരിക്കുന്നത്. സ്വാമിയേ അയ്യപ്പാ ഗാനവും ഒരു പാരഡി ഗാനമാണെന്നാണ് രാജീവ് വ്യക്തമാക്കുന്നത്. ദക്ഷിണേന്ത്യയിലെ പ്രശസ്ത ഇസ്ലാമിക തീര്ത്ഥാടനകേന്ദ്രമായ നാഗൂര് ദര്ഗ്ഗയിലെ സൂഫി ഗായകര് പരമ്പരാഗതമായി പാടിവരുന്ന 'ഏകനേ യാ അള്ളാ.....' എന്നു തുടങ്ങുന്ന ഭക്തിഗാനത്തിന്റെ ഈണത്തെ മാതൃകയാക്കി പ്രശസ്ത തമിഴ് പണ്ഡിതനും കവിയും ഭക്തഗാനരചയിതാവുമായ ഡോ. ഉളുന്തൂര്പേട്ട ഷണ്മുഖം രചിച്ചതാണ് പള്ളിക്കെട്ട് എന്നു തുടങ്ങുന്ന ഗാനമെന്നാണ് അദ്ദേഹം ചൂണ്ടിക്കാട്ടുന്നത്.
ജാതിമതവ്യത്യാസമില്ലാതെ തീര്ത്ഥാടകസംഘങ്ങളുടെ തിരക്ക് എപ്പോഴുമുള്ള നാഗൂര് ദര്ഗയില് പതിറ്റാണ്ടുകളായി മുഴങ്ങിക്കേള്ക്കുന്ന ഗാനത്തിന്റെ ഈണത്തില് ആകൃഷ്ടനായാണ് ജാതിമത വ്യത്യാസമില്ലാതെ അയ്യപ്പഭക്തന്മാര് എത്തിച്ചേരുന്ന ശബരിമലയ്ക്കു വേണ്ടി അതേ ഈണത്തില് ഗാനം രചിക്കാന് ഷണ്മുഖം തീരുമാനിച്ചകതെന്നും അദ്ദേഹം ഫേസ്ബുക്ക് പോസ്റ്റില് കുറിയ്ക്കുന്നു. ഈ ഗാനത്തിന്റെ പേരിലാണ് കേരളാ പോലീസ് കേസെടുത്തിരിക്കുന്നത് എന്നതാണ് പ്രത്യേകത.
പള്ളിക്കോണം രാജീവിന്റെ ഫേസ്ബുക്ക് കുറിപ്പ് ഇങ്ങനെ:
'ഇരുമുടി താങ്കി ...' എന്ന വിരുത്തത്തെ തുടര്ന്ന് 'പള്ളിക്കെട്ട് ശബരിമലയ്ക്ക്, കല്ലും മുള്ളും കാലുക്ക് മെത്തൈ .....' എന്നു തുടങ്ങുന്ന അയ്യപ്പഭക്തിഗാനവും ഒരു പാരഡിഗാനമാണ്. മറ്റൊരു പാട്ടിന്റെ ഈണത്തെ അനുകരിച്ച് വരികള് എഴുതുന്ന രീതിയാണ് പാരഡിയുടേത്.
ദക്ഷിണേന്ത്യയിലെ പ്രശസ്ത ഇസ്ലാമിക തീര്ത്ഥാടനകേന്ദ്രമായ നാഗൂര് ദര്ഗ്ഗയിലെ സൂഫി ഗായകര് പരമ്പരാഗതമായി പാടിവരുന്ന 'ഏകനേ യാ അള്ളാ.....' എന്നു തുടങ്ങുന്ന ഭക്തിഗാനത്തിന്റെ ഈണത്തെ മാതൃകയാക്കി പ്രശസ്ത തമിഴ് പണ്ഡിതനും കവിയും ഭക്തഗാനരചയിതാവുമായ ഡോ. ഉളുന്തൂര്പേട്ട ഷണ്മുഖം രചിച്ചതാണ് പള്ളിക്കെട്ട് എന്നു തുടങ്ങുന്ന ഗാനം. ജാതിമതവ്യത്യാസമില്ലാതെ തീര്ത്ഥാടകസംഘങ്ങളുടെ തിരക്ക് എപ്പോഴുമുള്ള നാഗൂര് ദര്ഗയില് പതിറ്റാണ്ടുകളായി മുഴങ്ങിക്കേള്ക്കുന്ന ഗാനത്തിന്റെ ഈണത്തില് ആകൃഷ്ടനായാണ് ജാതിമത വ്യത്യാസമില്ലാതെ അയ്യപ്പഭക്തന്മാര് എത്തിച്ചേരുന്ന ശബരിമലയ്ക്കു വേണ്ടി അതേ ഈണത്തില് ഗാനം രചിക്കാന് ഷണ്മുഖം തീരുമാനിച്ചത്.
മധുരൈ വീരമണിക്ക് ഈ ഗാനം എളുപ്പത്തില് പാടുവാന് തമിഴര്ക്കെല്ലാം ചിരപരിചിതമായ ഈ ഈണം സഹായകമായി. ഒരു മുസ്ലിം ഭക്തിഗാനത്തിന്റെ ഈണത്തെ പിന്പറ്റി ഒരു ഹിന്ദുഭക്തിഗാനം രചിക്കപ്പെട്ടത് യഥാര്ത്ഥ ഭക്തരില് ഗാനത്തോട് ആദരവ് വര്ദ്ധിപ്പിക്കുമെങ്കിലും മതവൈരം വളര്ത്തുന്ന വര്ഗ്ഗീയശക്തികള്ക്ക് അടിമപ്പെട്ടവര്ക്ക് ചിലപ്പോള് അത് അംഗീകരിക്കാന് വൈമനസ്യം തോന്നിയെന്നും വരാം. ഹിന്ദുക്കളുടെ പാട്ടും കലയും മറ്റുള്ള മതക്കാര് അടിച്ചുമാറ്റുന്നുവെന്ന് പലപ്പോഴും സോഷ്യല് മീഡിയയില് ഹിന്ദുത്വതീവ്രവാദികള് പരിഹാസമുയര്ത്തുന്ന സാഹചര്യത്തില് ഈ അറിവ് അവര്ക്കൊരു തിരിച്ചടിയുമായിരിക്കും.
ഡോ. ഷണ്മുഖം തമിഴ് സാഹിത്യത്തില് ഡോക്ടറേറ്റ് നേടിയ വ്യക്തിയായിരുന്നു. ദ്രാവിഡ കഴക പ്രസ്ഥാനങ്ങളില് ആകൃഷ്ടനായി പെരിയോര് ഇ.വി രാമസ്വാമി നായ്ക്കരുടെ അനുയായിയായി മാറിയ ഷണ്മുഖം ഗണപതിവിഗ്രഹങ്ങളില് ചെരുപ്പുമാല ചാര്ത്തിയുള്ള പ്രക്ഷോഭങ്ങളുടെ മുന്നിരയിലുണ്ടായിരുന്നു. നാസ്തികനില്നിന്ന് ഭക്തനിലേക്കുണ്ടായ മാറ്റത്തിന് ഒരു മാരകരോഗത്തില് നിന്നുള്ള വിമുക്തിയാണ് കാരണമായത്. തുടര്ന്ന് തമിഴില് നാനൂറോളം ഭക്തിഗാനങ്ങള് അദ്ദേഹം രചിച്ചു. മിക്ക ഗാനങ്ങളും ഏറെ ജനപ്രിയമായി മാറി. ശിര്കാഴി ഗോവിന്ദരാജന് പാടി പ്രശസ്തമാക്കിയ 'വിനായകനേ വിനൈ തീര്പ്പവനേ... ' എന്ന ഗാനവും പള്ളിക്കെട്ടിനോടൊപ്പം എടുത്തു പറയേണ്ടതാണ്.
ഒരു ഗാനത്തിന്റെ പാരഡിയായി മറ്റൊരു ഗാനം രചിക്കുന്ന രീതി പണ്ടുമുതലേ ഭക്തിഗാനരചനകളില് സാധാരണമാണ്. പഴയ കാലത്ത് ജനപ്രിയ സിനിമാഗാനങ്ങളുടെ പാരഡിയായി ഭക്തിഗാനം രചിച്ച് അച്ചടിച്ചുവരുന്ന പാട്ടുപുസ്തകത്തില് 'പ്രസ്തുത സിനിമാഗാനത്തിന്റെ മട്ടില്' എന്ന് പാട്ടിന് മുമ്പായി എഴുതിച്ചേര്ക്കുന്ന പതിവുണ്ടായിരുന്നു. അങ്ങനെ നിരവധി പാട്ടുകള് സന്ധ്യാനാമകീര്ത്തനങ്ങളായി അമ്മമാര് ഭക്തിയോടെ ചൊല്ലിക്കേള്ക്കാറുമുണ്ട്.
ഭക്തിഗാനത്തെ പാരഡിയാക്കി കോമഡിപാട്ടുകള് വരെ പലരും എഴുതിപ്പാടിയിട്ടും കടുത്ത വിമര്ശനങ്ങളൊന്നുമുണ്ടായിട്ടില്ല. പ്രശസ്ത കോമഡി കാഥികന് വി.ഡി. രാജപ്പന് 'ശങ്കരാ...... പോത്തിനെ തല്ലാതെടാ.....' എന്ന പാരഡിഗാനം 'ശങ്കരാ..... നാദശരീരാ പരാ ....'എന്ന ഗാനം ഭക്തിഗാനമേളയില് പാടി പേരെടുത്ത ഗായകരും സ്വകാര്യമായി പാടി ആസ്വദിച്ചിട്ടുണ്ടാവും. പലപ്പോഴും നല്ല ആശയസമ്പൂര്ണ്ണമായ കവിത്വമുള്ള വരികളോടു കൂടിയ ഗാനങ്ങളുടെ ഈണം തമാശ ഉല്പ്പാദിപ്പിക്കുന്നതിനായി നിലവാരം കുറഞ്ഞ വരികളിലേക്ക് സന്നിവേശിപ്പിക്കുന്നതിനെതിരെ വിമര്ശനങ്ങള് സ്വാഭാവികമാണ്. എങ്കിലും അതൊക്കെ വൈകാരികമായി പ്രകടിപ്പിക്കുകയോ പാട്ട് പിന്വലിക്കാന് പ്രേരിപ്പിക്കുകയോ ചെയ്യുന്ന സന്ദര്ഭങ്ങള് വിരളമായിട്ടേ ഉണ്ടായിട്ടുള്ളൂ. ഒരു കാര്ട്ടൂണ് ആസ്വദിക്കുന്ന സ്പോര്ട്സ് മാന് സ്പിരിറ്റിലേ അന്നും ഇന്നും പൊതുസമൂഹം ഇതിനെയൊക്കെ കാണാറുള്ളൂ.
ഈ തെരഞ്ഞെടുപ്പുകാലത്ത് വോട്ട് ലക്ഷ്യമാക്കി ഐക്യ ജനാധിപത്യമുന്നണി പ്രചരിപ്പിച്ച പാട്ടിനെതിരെ രാഷ്ട്രീയമായി തന്നെ എതിര്പ്പ് ഉയര്ത്തിയതിനെ പരിഹാസ്യമായേ കാണാന് കഴിയൂ. 'പോറ്റിയേ കേറ്റിയേ.... സ്വര്ണ്ണം ചെമ്പായ് മാറ്റിയേ.....' എന്ന പാരഡിഗാനം അയ്യപ്പഭക്തന്മാരുടെ വികാരത്തെ ഇതു വരെ വ്രണപ്പെടുത്തിയതായി തോന്നിയിട്ടില്ല. അങ്ങനെ വ്രണപ്പെടുത്തിയതായി ഉന്നയിച്ച് രാഷ്ട്രീയവിവാദം സൃഷ്ടിക്കാനും അതിലൂടെ എന്തെങ്കിലും നേട്ടം ഉണ്ടാക്കാന് കഴിയുമോ എന്നു ആരെങ്കിലും ശ്രമിച്ചാല് അങ്ങേയറ്റം അപലപനീയമാണ്. അള്ളാഹുവിന്നെ പ്രകീര്ത്തിച്ചുള്ള സൂഫിഗാനത്തെ കോപ്പിയടിച്ചാണ് 'പോറ്റിയേ കേറ്റിയേ ' എന്ന പാരഡി എഴുതിയത് എന്ന് ആരോപിച്ച് ഏതെങ്കിലും മുസ്ലിംസംഘടനയ്ക്ക് മുന്നോട്ടു വരാവുന്നതാണ്; അങ്ങനെ ഉണ്ടായിട്ടുമില്ല.
ഈ പാരഡിയുടെ വരികള് ഒരു മുസ്ലിമാണ് രചിച്ചത് എന്നത് വിവാദം കൊഴുപ്പിക്കുന്നതിനും വിഷയത്തില് വര്ഗ്ഗീയത കലര്ത്താനും പറ്റിയ സാധ്യതയാണ്. കേട്ട് ആസ്വദിച്ച് ചിരിച്ച് തള്ളേണ്ട ഒന്നിനെ പൊക്കിപ്പിടിച്ചു കൊണ്ടുവരുന്നത് വിലകുറഞ്ഞ തറവേല മാത്രമാണ്. നാഗൂര് ദര്ഗയിലെ സൂഫിഭക്തര് പാടുന്ന 'ഏകനേ യാ അള്ളാ ' എന്ന ഗാനത്തിന്റെ കണ്ണി ആദ്യകമന്റില് ചേര്ക്കുന്നു.
കേരളാ പോലീസ് കേസെടുത്തത് മതവികാരം വ്രണപ്പെടുത്തിയെന്ന് കാണിച്ച്.
തദ്ദേശതെരഞ്ഞെടുപ്പില് സി.പി.എമ്മിനും എല്.ഡി.എഫിനും തിരിച്ചടിയായി മാറിയെന്ന് വിലയിരുത്തിയ 'പോറ്റിയേ കേറ്റിയേ...' പാരഡിപ്പാട്ടിന്റെ അണിയറ ശില്പ്പികള്ക്കെതിരെ പോലീസ് കേസെടുത്തത് മതവികാരം വ്രണപ്പെടുത്തിയെന്ന് കാണിച്ചാണ്. പാട്ടിനെതിരെ തിരുവാഭരണപാത സംരക്ഷണ സമിതി ജനറല് സെക്രട്ടറി പ്രസാദ് കുഴിക്കാല നല്കിയ പരാതിയില് മതവികാരം വ്രണപ്പെടുത്തിയെന്ന വകുപ്പ് ചുമത്തിയാണ് സൈബര് പൊലീസ് കേസെടുത്തത്.
ഗാനരചയിതാവ് ജി.പി. കുഞ്ഞബ്ദുല്ല, ഗായകന് ഡാനിഷ് മലപ്പുറം, ഗാനം ചിത്രീകരിച്ച സി.എം.എസ് മീഡിയ, നിര്മാതാവ് സുബൈര് പന്തല്ലൂര് എന്നിങ്ങനെ നാലുപേരെ പ്രതിചേര്ത്താണ് ബുധനാഴ്ച രാത്രി തിരുവനന്തപുരം സൈബര് സ്റ്റേഷനില് എഫ്.ഐ.ആര് രജിസ്റ്റര് ചെയ്തത്. പ്രസാദിന്റെ പരാതിയില് ഗാനരചയിതാവിന്റെ പേര് കുഞ്ഞുപിള്ള എന്ന് രേഖപ്പെടുത്തിയതിനാല് എഫ്.ഐ.ആറിലും അതുതന്നെയാണ് ചേര്ത്തത്. ഭക്തിഗാനത്തെയും ശരണമന്ത്രത്തേയും അപമാനിക്കുംവിധം മതവിശ്വാസികള്ക്കിടയില് വിദ്വേഷം വളര്ത്തി മതസൗഹാര്ദം ഇല്ലായ്മ ചെയ്യുന്ന വിധമാണ് ഗാനം നിര്മിച്ചതെന്ന് എഫ്.ഐ.ആറില് പറയുന്നു.
നവമാധ്യമങ്ങള് വഴിയും നേരിട്ടും പ്രചരിപ്പിച്ച് സമൂഹത്തില് സമാധാന ലംഘനം ഉണ്ടാക്കണമെന്ന ഉദ്ദേശത്തോടെയാണ് ഗാനം നിര്മിച്ചതെന്നും പരാതിക്കാരനും മറ്റ് ഭക്തര്ക്കും മതവിശ്വാസത്തെ ദോഷകരമായി ബാധിച്ചെന്ന നിലയിലുമാണ് ഭാരതീയ ന്യായ സന്ഹിത (ബി.എന്.എസ്) 2023 പ്രകാരം 299, 353(1)(സി) വകുപ്പുകള് ചുമത്തി കേസെടുത്തത്.
സംസ്ഥാന പൊലീസ് മേധാവിക്ക് ലഭിച്ച പരാതി എ.ഡി.ജി.പി എച്ച്. വെങ്കിടേഷിന് കൈമാറിയിരുന്നു. തുടര്ന്ന് കേരള പൊലീസിന്റെ സൈബര് ഓപറേഷന് വിങ്ങിനോട് അന്വേഷണം നടത്തി റിപ്പോര്ട്ട് നല്കാന് ആവശ്യപ്പെട്ടിരുന്നു. തുടര്ന്നാണ് അയ്യപ്പന്റെ പേര് പരാമര്ശിക്കുന്നെന്ന കാരണം നിരത്തി എഫ്.ഐ.ആര് രജിസ്റ്റര് ചെയ്തത്. പാട്ട് ചട്ടലംഘനമാണെന്ന് ചൂണ്ടിക്കാട്ടി തെരഞ്ഞെടുപ്പ് കമീഷന് പരാതി നല്കാന് തീരുമാനിച്ചതായി സി.പി.എം പത്തനംതിട്ട ജില്ലാ സെക്രട്ടറി രാജു എബ്രഹാം അറിയിച്ചിരുന്നു.