മന്‍ കീ ബാത് മത്സര വിജയികള്‍ സ്വാതന്ത്ര്യദിനാഘോഷത്തില്‍ പങ്കെടുക്കും; തിരുവനന്തപുരം ജില്ലയിലെ മുപ്പത് വിദ്യാര്‍ത്ഥികള്‍ ഡല്‍ഹിക്ക്
തിരുവനന്തപുരം: കേന്ദ്ര യുവജനകാര്യ കായിക മന്ത്രാലയത്തിന് കീഴിലെ മേരാ യുവ ഭാരത് പ്രധാനമന്ത്രിയുടെ മന്‍ കി ബാത് പ്രഭാഷണ പരമ്പരയെ ആസ്പദമാക്കി സംഘടിപ്പിച്ച മത്സരത്തില്‍ വിജയികള്‍ ന്യൂഡല്‍ഹിയില്‍ നടക്കുന്ന സ്വാതന്ത്ര്യദിനാഘോഷത്തില്‍ പങ്കെടുക്കും. ഹൈസ്‌കൂള്‍, ഹയര്‍ സെക്കന്‍ഡറി, കോളേജ് വിദ്യാര്‍ത്ഥികള്‍ക്കായി സംഘടിപ്പിച്ച മത്സരങ്ങളില്‍ വിജയികളായ തിരുവനന്തപുരം ജില്ലയിലെ മുപ്പത് വിദ്യാര്‍ത്ഥികള്‍ മൂന്ന് അധ്യാപകരോടൊപ്പമാണ് പങ്കെടുക്കുന്നത്.
രാജ്യതലസ്ഥാനത്തെ ചരിത്രപ്രസിദ്ധമായ സ്ഥലങ്ങള്‍ സന്ദര്‍ശിക്കാനും, രാഷ്ട്രപതി, ലോക സഭ സ്പീക്കര്‍ , വിവിധ കേന്ദ്രമന്ത്രിമാര്‍ എന്നിവരോട് സംവദിക്കാനും വിദ്യാര്‍ത്ഥികള്‍ക്ക് അവസരം ലഭിക്കും. 2025 ഓഗസ്റ്റ് 12 ന് പുറപ്പെട്ട സംഘം ഓഗസ്റ്റ് 22-ന് മടങ്ങിയെത്തും. മുന്‍ കേന്ദ്ര സഹമന്ത്രി വി. മുരളീധരന്റെ മാര്‍ഗ്ഗനിര്‍ദ്ദേശത്തില്‍ ഇത് അഞ്ചാം തവണയാണ് വിദ്യാര്‍ത്ഥികള്‍ക്കായി ഗ്ലോബല്‍ ഗിവേഴ്‌സ് ഫൗണ്ടേഷനുമായി സഹകരിച്ച് മേരായുവഭാരത് പരിപാടി സംഘടിപ്പിക്കുന്നത്. യാത്രയയപ്പ് ചടങ്ങില്‍ മുന്‍ കേന്ദ്രമന്ത്രി വി. മുരളീധരന്‍, മേരാ യുവ ഭാരത് സ്റ്റേറ്റ് ഡയറക്ടര്‍ എം. അനില്‍കുമാര്‍, ഗ്ലോബല്‍ ഗിവേഴ്‌സ് ഫൗണ്ടേഷന്‍ ഡയറക്ടര്‍ ഡോ. എ. രാധാകൃഷ്ണന്‍ നായര്‍, ജില്ലാ യുവ ഓഫീസര്‍ സുഹാസ് എന്‍, പള്ളിപ്പുറം ജയകുമാര്‍ എന്നിവര്‍ പങ്കെടുത്തു.