ഗവര്‍ണറുടെ നടപടികളില്‍ പ്രതിഷേധം: ആര്‍എന്‍ രവിയുടെ സ്വാതന്ത്ര്യദിന വിരുന്ന് ബഹിഷ്‌കരിച്ച് എംകെ സ്റ്റാലിന്‍; പങ്കെടുക്കാനില്ലെന്ന് ടിവികെയും
ചെന്നൈ: തമിഴ്‌നാട് ഗവര്‍ണര്‍ക്കെതിരെ പ്രതിഷേധം തുടരുന്നു. സ്വാതന്ത്ര്യദിനത്തോട് അനുബന്ധിച്ച് ഗവര്‍ണര്‍ ഒരുക്കുന്ന ചായസത്കാരത്തില്‍ മുഖ്യമന്ത്രി എം.കെ.സ്റ്റാലിന്‍ പങ്കെടുക്കില്ല. ആര്‍.എന്‍.രവി, തമിഴ്‌നാടിന്റെ താത്പര്യങ്ങള്‍ക്ക് വിരുദ്ധമായ നിലപാട് സ്വീകരിക്കുന്നതിനിലാണ് ബഹിഷ്‌കരണം എന്ന് സര്‍ക്കാര്‍ വ്യക്തമാക്കി. സര്‍വ്വകലാശാലകളില്‍ ഈ മാസം നടക്കാനിരിക്കുന്ന ബിരുദദാന ചടങ്ങില്‍ ഉന്നതവിദ്യാഭ്യാസ മന്ത്രി പങ്കെടുക്കില്ലെന്നും സര്‍ക്കാര്‍ അറിയിച്ചു.
വിരുന്നില്‍ വിജയുടെ ടിവികെ പങ്കെടുക്കില്ല. ഗവര്‍ണറുടെ നടപടികളില്‍ പ്രതിഷേധമെന്ന് ടിവികെ പ്രതികരിച്ചു. ഡിഎംകെയുടെ സഖ്യകക്ഷികളും ബഹിഷ്‌കരണം പ്രഖ്യാപിച്ചിരുന്നു.
അതേസമയം സംസ്ഥാനത്തെ പൊതുവിദ്യാഭ്യാസ നിലവാരം ഇടിഞ്ഞതായി സ്വാതന്ത്ര്യദിന സന്ദേശത്തില്‍ ഗവര്‍ണര്‍ വിമര്‍ശിച്ചു. ലഹരിമരുന്ന് ഉപയോഗവും സ്ത്രീകള്‍ക്കും ദളിതര്‍ക്കും എതിരായ അതിക്രമം വര്‍ധിച്ചതായും ഗവര്‍ണര്‍ കുറ്റപ്പെടുത്തി.