വഡോദരയില്‍ പാലം തകര്‍ന്ന് വാഹനങ്ങള്‍ നദിയില്‍ വീണു; മൂന്ന് പേര്‍ മരിച്ചു; അഞ്ച് പേരെ രക്ഷപ്പെടുത്തിയെന്ന് അധികൃതര്‍
വഡോദരയില്‍ പാലം തകര്‍ന്ന് വാഹനങ്ങള്‍ നദിയില്‍ വീണു
വഡോദര: ഗുജറാത്തിലെ വഡോദരയില്‍ പാലം തകര്‍ന്ന് അപകടം. വാഹനങ്ങള്‍ നദിയിലേക്കുവീണ് നിരവധി പേര്‍ മരിച്ചതായാണ് വിവരം. മൂന്ന് പേര്‍ മരിച്ചുവെന്നാണ് പുറത്തുവരുന്ന റിപ്പോര്‍ട്ടുകള്‍. മഹിസാഗര്‍ നദിക്കു കുറുകെയുള്ള ഗാംഭീര പാലമാണ് തകര്‍ന്നത്. പാലത്തിന്റെ ഒരു ഭാഗം തകര്‍ന്ന് മഹിസാഗര്‍ നദിയിലേക്ക് വീഴുകയായിരുന്നു. നിരവധി പേര്‍ നദിയില്‍ വീണ വാഹനങ്ങള്‍ക്കുള്ളില്‍ കുടുങ്ങിക്കിടക്കുന്നതായാണ് വിവരം.
നാല് പതിറ്റാണ്ട് പഴക്കമുള്ള പാലത്തിന്റെ ഒരു ഭാഗം തകര്‍ന്നാണ് നിരവധി വാഹനങ്ങള്‍ നദിയിലേക്ക് മറിഞ്ഞത്. മൂന്ന് പേര്‍ മരിച്ചെന്നും അഞ്ച് പേരെ രക്ഷപ്പെടുത്തിയെന്നുമാണ് അധികൃതരുടെ ഭാഷ്യം.
ഗുജറാത്തിലെ വഡോദര, ആനന്ദ് ജില്ലകളെ ബന്ധിപ്പിക്കുന്നതാണ് പാലം. 900 മീറ്റര്‍ നീളമുള്ള പാലത്തിന് 23 തൂണുകളാണുള്ളത്. ആറ് വാഹനങ്ങള്‍ നദിയില്‍ വീണതായാണ് ഗുജറാത്ത് ആരോഗ്യമന്ത്രി ഋഷികേഷ് പട്ടേല്‍ പറഞ്ഞത്. 1985 ലാണ് പാലം നിര്‍മ്മിച്ചതെന്നും ആവശ്യാനുസരണം ഇടയ്ക്കിടെ അറ്റകുറ്റപ്പണികള്‍ നടത്തിയിരുന്നതായും മന്ത്രി പറഞ്ഞു. സംഭവത്തിന് പിന്നിലെ കൃത്യമായ കാരണം അന്വേഷിക്കുമെന്ന് മന്ത്രി പറഞ്ഞു.
പാലം തകര്‍ന്നതിന്റെ ദൃശ്യങ്ങള്‍ സോഷ്യല്‍ മീഡിയയില്‍ പ്രചരിച്ചു.രണ്ട് തൂണുകള്‍ക്കിടയിലുള്ള പാലത്തിന്റെ മുഴുവന്‍ സ്ലാബും തകര്‍ന്നതായി ദൃശ്യങ്ങളില്‍ കാണാം. രാവിലെ 7.30 ഓടെയാണ് സംഭവം നടന്നത്. രണ്ട് ട്രക്കുകളും രണ്ട് വാനുകളും ഉള്‍പ്പെടെയുള്ള വാഹനങ്ങള്‍ നദിയിലേക്ക് മറിഞ്ഞുവെന്ന് പാദ്ര പൊലീസ് ഇന്‍സ്‌പെക്ടര്‍ വിജയ് ചരണ്‍ പറഞ്ഞു.