അന്യസംസ്ഥാനത്ത് നിന്നും മയക്കുമരുന്ന് കടത്തി വിൽപ്പന; രഹസ്യ വിവരത്തെ തുടർന്ന് പോലീസ് പരിശോധന; ബസ് സ്റ്റാന്‍റിന് സമീപത്ത് നിന്നും യുവാവ് പിടിയിൽ; കണ്ടെടുത്തത് 16 ഗ്രാം എംഡിഎംഎ; സംഭവം തൃശൂരിൽ
തൃശൂർ: തൃശൂരിൽ അന്യസംസ്ഥാനത്ത് നിന്ന് കടത്തിയ എംഡിഎംഎയുമായി യുവാവ് പിടിയിൽ. ആമ്പല്ലൂർ സ്വദേശി ഡെയ്സൺ തോമസ് (35) ആണ് ചാലക്കുടി ബസ് സ്റ്റാന്‍റിന് സമീപത്ത് പിടിയിലായത്. ഇയാളുടെ പക്കൽ നിന്നും 16 ഗ്രാം എംഡിഎംഎ പിടിച്ചെടുത്തു. രഹസ്യ വിവരത്തെ തുടർന്ന് തൃശൂർ റൂറൽ ജില്ലാ ലഹരി വിരുദ്ധ സ്ക്വാഡും ചാലക്കുടി പോലീസും ചേർന്നാണ് പരിശോധന നടത്തിയത്.
ബെംഗളൂരുവിൽ നിന്നാണ് ഡെയ്സൺ മയക്കുമരുന്ന് കേരളത്തിലേക്ക് കടത്തിയിരുന്നതെന്ന് പോലീസ് പറഞ്ഞു. ബെംഗളൂരു കേന്ദ്രീകരിച്ച് പ്രൊഫഷണൽ ഡാൻസറായി ജോലി ചെയ്തു വരികയായിരുന്നു ഇയാൾ. പിടിയിലായ ഡെയ്സണെതിരെ തൃശൂർ വെസ്റ്റ് പോലീസ് സ്റ്റേഷൻ പരിധിയിൽ ബാർ ജീവനക്കാരനെ ആക്രമിച്ച് കൊലപ്പെടുത്താൻ ശ്രമിച്ച കേസും വീടിനു മുന്നിലൂടെ സൈക്കിളിൽ യാത്ര ചെയ്തിരുന്നയാളെ ദേഹോപദ്രവം ചെയ്ത കേസുമുണ്ട്. ഇതോടൊപ്പം പുതുക്കാട് പോലീസ് സ്റ്റേഷൻ പരിധിയിൽ കവർച്ചയ്ക്ക് ശ്രമിച്ച കേസിലും പ്രതിയാണ് ഡെയ്സൺ.
ചില്ലറ വിപണിയിൽ ഏകദേശം അരലക്ഷത്തോളം രൂപ വില വരുന്ന മയക്കുമരുന്നാണ് ഡെയ്സണിൽ നിന്നും പിടികൂടിയത്. നടപടിക്രമങ്ങൾക്ക് ശേഷം പ്രതിയെ കോടതിയിൽ ഹാജരാക്കും. അതേസമയം സംഭവത്തിൽ വിശദമായ അന്വേഷണമുണ്ടാകും. ഡെയ്സണിൽ നിന്ന് മയക്കുമരുന്ന് വാങ്ങി ഉപയോഗിക്കുന്നവരുടെ വിവരങ്ങൾ ശേഖരിച്ചതായും ഈ ശൃംഖലയെ കുറിച്ച് ജില്ലാ ലഹരി വിരുദ്ധസേന കൂടുതൽ അന്വേഷണം നടത്തുമെന്നും പോലീസ് അറിയിച്ചു.
തൃശൂർ റൂറൽ ജില്ലാ പോലീസ് മേധാവി ഡോ. നവനീത് ശർമ്മയുടെ നിർദ്ദേശ പ്രകാരമായിരുന്നു പരിശോധന. ചാലക്കുടി ഡിവൈഎസ്പി സുമേഷ് കെ, തൃശൂർ റൂറൽ നാർക്കോട്ടിക് സെൽ ഡി.വൈ.എസ്.പി ഉല്ലാസ്കുമാർ എം എന്നിവരുടെ നേതൃത്വത്തിൽ ജില്ലാ ലഹരി വിരുദ്ധ സ്ക്വാഡും ചാലക്കുടി പോലീസും ചേർന്നാണ് പരിശോധന നടത്തിയത്.
പ്രതിയെ പിടികൂടാനും മയക്കുമരുന്ന് കണ്ടെത്താനും ചാലക്കുടി ഇൻസ്പെക്ടർ എം കെ സജീവ്, സബ് ഇൻസ്പെക്ടർ ഋഷിപ്രസാദ്, സബ് ഇൻസ്പെക്ടർമാരായ ജോഫി ജോസ്, ജില്ലാ ലഹരി വിരുദ്ധ സേനാംഗങ്ങളായ വി.ജി സ്റ്റീഫൻ, സതീശൻ മടപ്പാട്ടിൽ, റോയ് പൗലോസ്, പി.എം മൂസ, വിശ്വനാഥൻ കെ കെ, സിൽജോ വി യു, റെജി എ യു, ബിനു എം ജെ, ഷിജോ തോമസ്, സുരേഷ് കുമാർ സി ആർ, ടെസി കെ ടി, പ്രദീപ് പി ഡി, ബിനു പ്രസാദ് എന്നിവരും ഉണ്ടായിരുന്നു.