കല്യാണം കഴിഞ്ഞ പ്രബീഷ് ഒരേസമയം കണ്ണുംപൂട്ടി പ്രേമിച്ചത് രണ്ടുപേരെ; എല്ലാം മറന്ന് ബന്ധം തുടരുന്നതിടെ ഞാൻ ഗർഭിണിയാണ് എന്നെ വിവാഹം കഴിക്കണമെന്ന് ആദ്യ കാമുകി പറഞ്ഞതോടെ പ്ലാൻ ചെയ്ത അരുംകൊല; അടങ്ങാത്ത പകയിൽ വീട്ടിലേക്ക് വിളിച്ചുവരുത്തി ശാരീരിക ബന്ധത്തിൽ ഏർപ്പെട്ട ശേഷം ജീവനെടുത്തു; കൈനകരിയെ നടുക്കിയ ആ കേസിൽ രണ്ടാം പ്രതി രജനിക്കും തൂക്കുകയര്‍ വിധിക്കുമ്പോൾ
ആലപ്പുഴ: സംസ്ഥാനത്ത് ഏറെ കോളിളക്കം സൃഷ്ടിച്ച കൈനകരിയിലെ ഗർഭിണിയായ യുവതിയെ കൊലപ്പെടുത്തി കായലിൽ തള്ളിയ കേസിൽ രണ്ട് പ്രതികൾക്കും വധശിക്ഷ വിധിച്ച് കോടതി. കേസിലെ രണ്ടാം പ്രതിയായ യുവതിക്കും തൂക്കുകയർ വിധിച്ച് ആലപ്പുഴ ജില്ലാ സെഷൻസ് കോടതി മൂന്ന് ചരിത്രപരമായ വിധി പുറപ്പെടുവിച്ചു. നേരത്തെ, കേസിലെ ഒന്നാം പ്രതിയായ യുവാവിനും ഇതേ കോടതി വധശിക്ഷ വിധിച്ചിരുന്നു.
മറ്റൊരു കേസിൽ ഒഡീഷ ജയിലിൽ കഴിയുന്ന രണ്ടാം പ്രതി രജനിയെ ഇന്ന് (നവംബർ 29) ആലപ്പുഴ ജില്ലാ സെഷൻസ് കോടതിയിൽ ഹാജരാക്കിയ ശേഷമാണ് വിധി പ്രഖ്യാപിച്ചത്. ശിക്ഷാവിധിക്ക് മുന്നോടിയായി രജനിയോട് എന്തെങ്കിലും പറയാനുണ്ടോയെന്ന് കോടതി ചോദിച്ചെങ്കിലും ഒന്നുമില്ലെന്നായിരുന്നു ഇവരുടെ മറുപടി.
രണ്ട് പ്രതികൾക്കും വധശിക്ഷ
കേസിലെ ഒന്നാം പ്രതിയായ മലപ്പുറം നിലമ്പൂർ സ്വദേശി പ്രബീഷിന് തിങ്കളാഴ്ചയാണ് കോടതി വധശിക്ഷ വിധിച്ചത്. രണ്ടാം പ്രതിയായ കൈനകരി സ്വദേശിനി രജനിയെ കുറ്റക്കാരിയാണെന്ന് കോടതി കണ്ടെത്തിയെങ്കിലും, ഇവർ മയക്കുമരുന്ന് കേസിൽപ്പെട്ട് ഒഡീഷയിലെ ജയിലിൽ കഴിയുന്നതിനാൽ ശിക്ഷാവിധി അന്ന് പ്രഖ്യാപിച്ചിരുന്നില്ല. ഒന്നാം പ്രതിക്ക് ചുമത്തിയ എല്ലാ വകുപ്പുകളും അതേ ഗൗരവത്തോടെ രണ്ടാം പ്രതിക്കും ചുമത്തിക്കൊണ്ടാണ് പ്രോസിക്യൂഷന്റെ ശക്തമായ വാദം കോടതി അംഗീകരിച്ചത്.
പ്രോസിക്യൂഷന് വേണ്ടി ഹാജരായ അഭിഭാഷകൻ, അപൂർവ്വങ്ങളിൽ അപൂർവ്വമായ ഈ കേസിൽ രണ്ട് പ്രതികൾക്കും വധശിക്ഷ നൽകണമെന്ന് കോടതിയിൽ ശക്തമായി വാദിച്ചു. തുടർന്ന് ഇന്ന് വൈകീട്ട് മൂന്നേകാലോടെ രണ്ടാം പ്രതിയുടെ ശിക്ഷാവിധി കോടതി പ്രഖ്യാപിക്കുകയായിരുന്നു.
ക്രൂരമായ കൊലപാതകത്തിന്റെ പശ്ചാത്തലം
ആലപ്പുഴ പുന്നപ്ര സ്വദേശിനിയായ അനിതയാണ് കൊല്ലപ്പെട്ടത്. 2021 ജൂലൈ 9-നാണ് കേരളത്തെ ഞെട്ടിച്ച ഈ കൊലപാതകം നടന്നത്. തൊട്ടടുത്ത ദിവസം അനിതയുടെ മൃതദേഹം പൂക്കൈത ആറ്റിൽനിന്ന് കണ്ടെടുത്തു.
കൊല്ലപ്പെട്ട അനിതയും കേസിലെ ഒന്നാം പ്രതിയായ പ്രബീഷുമായി അടുപ്പത്തിലായിരുന്നു. പ്രബീഷ് വിവാഹിതനായിരുന്നെങ്കിലും, ഇയാൾ അനിതയുമായും മറ്റൊരു വിവാഹിതയായ സ്ത്രീയായ രജനിയുമായും ഒരേ സമയം ബന്ധം പുലർത്തിയിരുന്നു. അനിത ഗർഭിണിയായതോടെയാണ് പ്രശ്നങ്ങൾ രൂക്ഷമായത്. അനിതയുമായുള്ള ബന്ധം ഒഴിവാക്കാൻ പ്രബീഷ് ശ്രമിച്ചെങ്കിലും വിജയിച്ചില്ല. ഇതോടെ അനിതയെ ഇല്ലാതാക്കാൻ പ്രബീഷ് തന്റെ സുഹൃത്തായ രജനിയെ കൂട്ടുപിടിച്ച് ഗൂഢാലോചന നടത്തുകയായിരുന്നു.
കൊലപാതകം നടന്നത് രജനിയുടെ വീട്ടിൽ
രണ്ട് കുട്ടികളുടെ അമ്മ കൂടിയായിരുന്ന അനിതയെ കൊലപ്പെടുത്തിയത് രജനിയുടെ വീട്ടിൽ വെച്ചാണ്. പോലീസിന്റെ കണ്ടെത്തൽ അനുസരിച്ച്, കൊലപാതക സമയത്ത് പ്രബീഷ് കത്തി കഴുത്തിൽ വെച്ച് അനിതയെ ഭീഷണിപ്പെടുത്തി. അനിത നിലവിളിക്കാതിരിക്കാൻ രജനി വായും മൂക്കും അമർത്തിപ്പിടിക്കുകയും ചെയ്തു.
അബോധാവസ്ഥയിലായ അനിത കൊല്ലപ്പെട്ടു എന്ന് കരുതി ഇരുവരും ചേർന്ന് മൃതദേഹം പൂക്കൈത ആറ്റിൽ ഉപേക്ഷിക്കുകയായിരുന്നു. സാക്ഷികളെയും തെളിവുകളെയും വിശദമായി പരിശോധിച്ച കോടതി, ഇത് മനപ്പൂർവ്വമുള്ളതും ആസൂത്രിതവുമായ കൊലപാതകമാണെന്ന് കണ്ടെത്തുകയായിരുന്നു.