മദ്യലഹരിയിൽ യുവാക്കളുടെ അശ്രദ്ധമായ ഡ്രൈവിംഗ്; അപകടത്തിൽ ജീവൻ നഷ്ടമായത് ഭാര്യയുമായി വന്ന സ്‌കൂട്ടർ യാത്രക്കാരന്; സംഭവം കോഴിക്കോട് ദേശീയ പാതയിൽ
കോഴിക്കോട്: കോഴിക്കോട് ദേശീയ പാതയിലുണ്ടായ അപകടത്തിൽ യുവാവിന് ദാരുണാന്ത്യം. പൂളാടിക്കുന്നിന് സമീപത്ത് വെച്ചുണ്ടായ വാഹനാപകടത്തില്‍ കാപ്പാട് കണ്ണങ്കടവ് പാലം സ്വദേശി രതീഷ് (41) ആണ് മരിച്ചത്. മൂന്ന് യുവാക്കള്‍ സഞ്ചരിച്ച ഹിമാലയന്‍ ബുള്ളറ്റ് ബൈക്ക് രതീഷ് സഞ്ചരിച്ച സ്കൂട്ടറിലിടിക്കുകയായിരുന്നു. നാട്ടുകാർ പറയുന്നതനുസരിച്ച് അമിത വേഗതയില്‍ അശ്രദ്ധമായി ബൈക്ക് വന്നതാണ് അപകട കാരണമെന്നാണ് മനസ്സിലാകുന്നത്.
വെള്ളിയാഴ്ച പുലര്‍ച്ചെ 4.30 ഓടെ അപകടമുണ്ടായത്. പുറക്കാട്ടിരി പുതിയ പാലത്തിന് സമീപമായിരുന്നു അപകടം. ഭാര്യ സിന്‍സിയുമായി പോകവേയായിരുന്നു അപകടമുണ്ടായത്. യുവാക്കള്‍ സഞ്ചരിച്ച ബുള്ളറ്റ് രതീഷും ഭാര്യയും യാത്ര ചെയ്യുകയായിരുന്ന സ്‌കൂട്ടറില്‍ ഇടിക്കുകയായിരുന്നു. അപകടത്തിൽ സിൻസിക്കും പരിക്കേറ്റു. മദ്യലഹരിയിലായിരുന്ന യുവാക്കൾ അമിത വേഗത്തിലാണ് രതീഷിന്റെ സ്‌കൂട്ടറിൽ ഇടിച്ചത്.
അപകടത്തിൽ ഗുരുതരമായി പരിക്കേറ്റ രതീഷിനെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചിരുന്നു. എന്നാൽ മരണം സ്ഥിരീകരിക്കുകയായിരുന്നു. പ്രസവാനന്തരം ചികിത്സയിലായിരുന്ന സിന്‍സിയുടെ സഹോദരിയെ സന്ദര്‍ശിക്കുന്നതിനായി മെഡിക്കല്‍ കോളേജ് ആശുപത്രിയിലേക്ക് പോകുമ്പോഴാണ് അപകടത്തില്‍പ്പെട്ടത്. തലയ്ക്കും കാലിനും പരിക്കേറ്റ സിന്‍സി ചികിത്സയിലാണ്. രതീഷ് വാടക സ്റ്റോറില്‍ പന്തല്‍ തൊഴിലാളിയായിരുന്നു.