ലൈംഗികാതിക്രമക്കേസില് മുന് മന്ത്രി നീലലോഹിതദാസന് നാടാരെ കുറ്റവിമുക്തനാക്കിയ ഹൈക്കോടതി ഉത്തരവിനെതിരേ പരാതിക്കാരി സുപ്രീംകോടതിയില്; അപ്പീല് നല്കിയത് വനംവകുപ്പ് പീഡനത്തില്
ന്യൂഡല്ഹി: ലൈംഗികാതിക്രമക്കേസില് മുന് മന്ത്രി നീലലോഹിതദാസന് നാടാരെ കുറ്റവിമുക്തനാക്കിയ ഹൈക്കോടതി ഉത്തരവിനെതിരേ പരാതിക്കാരി സുപ്രീംകോടതിയില്. ഹൈക്കോടതി വിധിയില് പിഴവുകളുണ്ടെന്ന് ഉള്പ്പെടെ ചൂണ്ടിക്കാട്ടിയാണ് സുപ്രീംകോടതിയില് അപ്പീല് നല്കിയത്. പരാതിക്കാരിയുടെ അപ്പീല് സുപ്രീംകോടതി ഉടന് പരിഗണിച്ചേക്കും.
1999 ഫെബ്രുവരി 27-നാണ് കേസിനാസ്പദമായ ലൈംഗികാതിക്രമമുണ്ടായത്. കേരള വനംവകുപ്പില് ഉന്നതസ്ഥാനം വഹിച്ചിരുന്ന ഉദ്യോഗസ്ഥയെ ഔദ്യോഗിക ആവശ്യങ്ങള്ക്കായി കോഴിക്കോട് ഗസ്റ്റ് ഹൗസിലേക്ക് വിളിച്ചുവരുത്തുകയും തിരിച്ചിറങ്ങാന് നേരം മോശമായി പെരുമാറുകയുമായിരുന്നു എന്നാണ് പരാതി.
2002 ഫെബ്രുവരിയില് നീലലോഹിതദാസനെതിരേ മുതിര്ന്ന ഒരു ഐഎഎസ് ഉദ്യോഗസ്ഥയും പരാതി നല്കിയിരുന്നു. ഇതിന് പിന്നാലെയാണ് ഐഎഫ്എസ് ഉദ്യോഗസ്ഥയും പരാതിയുമായി രംഗത്തെത്തിയത്. ഈ കേസില് സര്ക്കാര് അപ്പീല് കൊടുത്തില്ലെന്നത് നിര്ണ്ണായകമാണ്.
ഐഎഫ്എസ് ഉദ്യോഗസ്ഥയുടെ കേസില് നീലലോഹിതദാസന് നാടാരെ കോഴിക്കോട് ജില്ലാ കോടതി നേരത്തേ ഒരുവര്ഷത്തെ തടവിന് ശിക്ഷിച്ചിരുന്നു. നീലലോഹിതദാസന് നാടാരുടെ അപ്പീലില് ജില്ലാ കോടതിയുടെ ശിക്ഷാവിധി ഹൈക്കോടതി റദ്ദാക്കി. നീലലോഹിതദാസന് നാടാരെ കുറ്റവിമുക്തനാക്കുകയുംചെയ്തു. ഈ ഉത്തരവിനെതിരേയാണ് പരാതിക്കാരി സുപ്രീംകോടതിയെ സമീപിച്ചത്.
ഒരു അധികാരസ്ഥാനത്തിരുന്ന വ്യക്തിയാണ് തനിക്കെതിരേ ലൈംഗികാതിക്രമം നടത്തിയതെന്ന് പരാതിക്കാരി പറയുന്നു. ഹൈക്കോടതി വിധിയില് ചില പിഴവുകളുണ്ടായിട്ട് തുടങ്ങിയ കാര്യങ്ങളാണ് പരാതിക്കാരി അപ്പീലില് ചൂണ്ടിക്കാട്ടിയിരിക്കുന്നത്.