'അടങ്ങാത്ത ആവേശം..'; കൂട്ടുകാരന്റെ കല്യാണം കളറാക്കാൻ 'ഫോർച്യുണർ' കാർ അടക്കം റോഡിലിറക്കി യുവാക്കളുടെ അഭ്യാസ പ്രകടനം; മലപ്പുറത്ത് ലൈസൻസ് കൂട്ടത്തോടെ സസ്പെൻഡ് ചെയ്ത് എംവിഡി

മലപ്പുറം: സുഹൃത്തിന്റെ വിവാഹ ആഘോഷ പരിപാടികൾക്കിടെ ആഡംബര വാഹനങ്ങളിൽ യുവാക്കളുടെ അഭ്യാസപ്രകടനത്തിൽ കടുത്ത നടപടിയുമായി മോട്ടോർ വാഹന വകുപ്പ്. മലപ്പുറം തിരൂർ പറവണ്ണയിലാണ് സംഭവം നടന്നത്. ഒമ്പത് വാഹനങ്ങൾക്കും ഡ്രൈവർമാർക്കുമെതിരെയാണ് നടപടി സ്വീകരിച്ചത്.

വാഹനത്തിന്റെ മുകളിലും ഡോറിന്റെ മുകളിലും കയറി അപകടകരമായി അഭ്യാസപ്രകടനം നടത്തിയതിനാണ് നടപടിയെടുത്തതെന്ന് അധികൃതർ വ്യക്തമാക്കി. സംഭവത്തിൽ ഡ്രൈവർമാരുടെ ലൈസൻസ് സസ്പെൻഡ് ചെയ്തു.

സംഭവത്തിന്റെ ദൃശ്യങ്ങൾ അടക്കം സമൂഹ മാധ്യമങ്ങളിൽ വ്യാപകമായി പ്രചരിച്ചിരുന്നു. സുരക്ഷിതമായ ഡ്രൈവിങ്ങിന് പരിശീലന ക്ലാസിന് ഹാജരാവാനുള്ള നിർദ്ദേശവും നൽകുകയും ചെയ്തിട്ടുണ്ട്. പരിശോധന ഇനിയും തുടരുമെന്നും അധികൃതർ വ്യക്തമാക്കി.