ഓണം വാരാഘോഷ സമാപന ഘോഷയാത്ര: തിരുവനന്തപുരം കോര്‍പ്പറേഷന്‍ പരിധിയിലെ സ്‌കൂളുകള്‍ക്ക് നാളെ അവധി; ഉച്ചയ്ക്ക് ശേഷം പൊതു അവധി; ഗതാഗത ക്രമീകരണം ഇങ്ങനെ
തിരുവനന്തപുരം: ഓണം വാരാഘോഷ സമാപന ഘോഷയാത്രയോടനുബന്ധിച്ച് ചൊവ്വാഴ്ച തിരുവനന്തപുരം കോര്‍പ്പറേഷന്‍ പരിധിയിലെ സ്‌കൂളുകള്‍ക്ക് അവധി പ്രഖ്യാപിച്ചു. ഗതാഗത തടസ്സം ഒഴിവാക്കുന്നതിനാണ് അവധി. ഉച്ചയ്ക്ക് ശേഷം നഗരത്തിലെ സര്‍ക്കാര്‍ അര്‍ധസര്‍ക്കാര്‍ സ്ഥാപനങ്ങള്‍ക്കും നെഗോഷ്യബിള്‍ ഇന്‍സ്ട്രുമെന്റേഷന്‍ ആക്ട് പ്രകാരം അവധി പ്രഖ്യാപിച്ചിട്ടുണ്ട്.
തിരുവനന്തപുരം നഗരത്തില്‍ ഗതാഗത ക്രമീകരണം
സംസ്ഥാന സര്‍ക്കാരിന്റെ ഓണം വാരാഘോഷ സമാപന ഘോഷയാത്രയോടനുബന്ധിച്ച് തിരുവനന്തപുരം നഗരത്തില്‍ വിപുലമായ സുരക്ഷാ ഗതാഗത ക്രമീകരണങ്ങള്‍ ഏര്‍പ്പെടുത്തിയതായി സിറ്റി പൊലീസ് കമീഷണര്‍ തോംസണ്‍ ജോസ് അറിയിച്ചു. സിറ്റി പൊലീസ് കമീഷണറുടെ നേതൃത്വത്തില്‍ മൂന്ന് ഡെപ്യൂട്ടി കമീഷണര്‍മാര്‍ മേല്‍നോട്ടം വഹിക്കും. തിരുവനന്തപുരം സിറ്റിയെ ആറ് ക്ലസ്റ്ററുകളായും എട്ട് ഡിവിഷനുകളായും 16 സെക്ടറുകളായും തിരിച്ച് 1600 പൊലീസുകാരെയാണ് സുരക്ഷയ്ക്ക് നിയോഗിച്ചിട്ടുള്ളത്.
ക്രമീകരണങ്ങള്‍
ഘോഷയാത്ര ആരംഭിക്കുന്ന കവടിയാര്‍ മുതല്‍ കിഴക്കേകോട്ട ഈഞ്ചക്കല്‍ വരെയുള്ള റോഡിലും നഗരത്തിലെ പ്രധാന റോഡുകളിലും ചൊവ്വ പകല്‍ രണ്ട് മുതല്‍ ഗതാഗത ക്രമീകരണം ഏര്‍പ്പെടുത്തി. ഘോഷയാത്ര കടന്നുപോകുന്ന റോഡില്‍ വാഹന പാര്‍ക്കിങ് അനുവദിക്കില്ല. നഗരത്തിലെ പ്രധാന റോഡുകളിലും ഇടറോഡുകളിലും വാഹനങ്ങള്‍ പാര്‍ക്ക് ചെയ്യരുത്. അനധികൃതമായി പാര്‍ക്ക് ചെയ്യുന്നവ റിക്കവറി വാഹനം ഉപയോഗിച്ച് നീക്കി നിയമനടപടി സ്വീകരിക്കും. നിശ്ചല ദൃശ്യങ്ങള്‍ കിഴക്കേകോട്ട വെട്ടിമുറിച്ചകോട്ട വഴി ഈഞ്ചക്കല്‍ ബൈപാസില്‍ പ്രവേശിക്കുന്ന സമയം ഈഞ്ചക്കല്‍ ഭാഗത്തു നിന്ന് മിത്രാനന്ദപുരം ഭാഗത്തേക്കോ അട്ടക്കുളങ്ങര ഭാഗത്തേക്കോ വാഹനങ്ങള്‍ കടത്തി വിടില്ല.
എംസി റോഡില്‍ നിന്ന് തമ്പാനൂര്‍, കിഴക്കേകോട്ട ഭാഗത്തേക്ക് പോകേണ്ടതും തിരിച്ചു പോകേണ്ടതുമായ വാഹനങ്ങള്‍ മണ്ണന്തല നിന്ന് തിരിഞ്ഞ് കുടപ്പനകുന്ന് -പേരൂര്‍ക്കട പൈപ്പിന്‍മൂട് -ശാസ്തമംഗലം -ഇടപ്പഴിഞ്ഞി - എസ്എംസി- വഴുതക്കാട് -തൈക്കാട് വഴിയോ, പരുത്തിപ്പാറ -മുട്ടട -അമ്പലമുക്ക്- ഊളമ്പാറ -ശാസ്തമംഗലം- ഇടപ്പഴിഞ്ഞി -എസ്എംസി- വഴുതക്കാട് -തൈക്കാട് വഴിയോ പോകണം. കഴക്കൂട്ടം ഭാഗത്തു നിന്ന് ഉള്ളൂര്‍ വഴി നഗരത്തിലേക്ക് വരുന്ന വാഹനങ്ങള്‍ ഉള്ളൂര്‍ -മെഡിക്കല്‍ കോളേജ് -കണ്ണമൂല -പാറ്റൂര്‍ -ജനറല്‍ ഹോസ്പിറ്റല്‍- ആശാന്‍ സ്‌ക്വയര്‍ -അണ്ടര്‍ പാസേജ്- ബേക്കറി ഫ്‌ലൈ ഓവര്‍- പനവിള- തമ്പാനൂര്‍ -വഴി പോകണം.
പട്ടം ഭാഗത്തു നിന്ന് തമ്പാനൂര്‍, കിഴക്കേകോട്ട ഭാഗത്തേക്ക് പോകേണ്ട വലിയ വാഹനങ്ങള്‍ പട്ടം- പൊട്ടകുഴി- മുറിഞ്ഞപാലം- കുമാരപുരം- കണ്ണമൂല -നാലുമുക്ക്- പാറ്റൂര്‍ -ജനറല്‍ ആശുപത്രി -ആശാന്‍ സ്‌ക്വയര്‍ -അണ്ടര്‍പാസേജ് -ബേക്കറി ഫ്‌ലൈഓവര്‍- പനവിള -തമ്പാനൂര്‍- വഴിയും, ചെറിയ വാഹനങ്ങള്‍ പട്ടം -മരപ്പാലം- കവടിയാര്‍- ഗോള്‍ഫ്‌ലിങ്ക്‌സ്- പൈപ്പിന്‍മൂട്- ശാസ്തമംഗലം -ഇടപ്പഴിഞ്ഞി എസ്എംസി -തൈക്കാട് വഴിയും പോകണം.
പേരൂര്‍ക്കട ഭാഗത്തു നിന്ന് തമ്പാനൂര്‍, കിഴക്കേകോട്ട ഭാഗത്തേക്ക് പോകേണ്ടതും തിരിച്ചു പോകേണ്ടതുമായ വാഹനങ്ങള്‍ പേരൂര്‍ക്കട -പൈപ്പിന്‍മൂട് ശാസ്തമംഗലം -ഇടപ്പഴിഞ്ഞി -എസ്എംസി -വഴുതക്കാട് -തൈക്കാട് വഴിയോ പേരൂര്‍ക്കട -പൈപ്പിന്‍മൂട് -ശാസ്തമംഗലം -ഇടപ്പഴിഞ്ഞി -ജഗതി -മേട്ടുക്കട വഴിയോ പോകണം.
പേട്ട ഭാഗത്തു നിന്ന് തമ്പാനൂര്‍, കിഴക്കേകോട്ട ഭാഗത്തേക്ക് പോകേണ്ടതും തിരിച്ചു പോകേണ്ടതുമായ വാഹനങ്ങള്‍ പാറ്റൂര്‍- വഞ്ചിയൂര്‍ -ഉപ്പിടാംമൂട്- തകരപറമ്പ് ഫ്‌ലൈഓവര്‍- കിള്ളിപ്പാലം വഴിയോ പാറ്റൂര്‍ -ജനറല്‍ ആശുപത്രി ആശാന്‍സ്‌ക്വയര്‍- അണ്ടര്‍ പാസേജ് -ബേക്കറി ഫ്‌ലൈഓവര്‍ -പനവിള- തമ്പാനൂര്‍ -വഴിയോ പോകണം.
തിരുവല്ലം ഭാഗത്തു നിന്ന് തമ്പാനൂര്‍ ഭാഗത്തേക്ക് പോകേണ്ടതും തിരിച്ചു പോകേണ്ടതുമായ വാഹനങ്ങള്‍ അട്ടക്കുളങ്ങര -കിള്ളിപ്പാലം -ചുരക്കാട്ടുപാളയം വഴി പോകണം. കിഴക്കേകോട്ടയില്‍ നിന്ന് ചാക്ക ഭാഗത്തേക്ക് പോകേണ്ട വാഹനങ്ങള്‍ അട്ടക്കുളങ്ങര- ഈഞ്ചക്കല്‍ -ചാക്ക വഴി പോകണം. കിഴക്കേകോട്ടയില്‍ നിന്ന് തമ്പാനൂര്‍, കരമന, പാപ്പനംകോട് ഭാഗത്തേക്ക് പോകേണ്ട വാഹനങ്ങള്‍ അട്ടക്കുളങ്ങര -കിള്ളിപാലം വഴി പോകണം. കിഴക്കേകോട്ടയില്‍ നിന്ന് സര്‍വീസ് ആരംഭിക്കേണ്ട ബസുകള്‍ അട്ടകുളങ്ങര- മണക്കാട് റോഡിലും, അട്ടകുളങ്ങര- കിള്ളിപ്പാലം റോഡിലും വരിയായി പാര്‍ക്ക് ചെയ്ത് യഥാക്രമം സര്‍വീസ് നടത്തണം.
തമ്പാനൂര്‍ ഭാഗത്തു നിന്ന് കിഴക്കേകോട്ടയിലേക്ക് പോകേണ്ട വാഹനങ്ങള്‍ നിര്‍ദ്ദേശിക്കുന്ന സമയം മുതല്‍ തമ്പാനൂര്‍ ഫ്‌ലൈഓവര്‍ -കിള്ളിപ്പാലം വഴി പോകണം. റെയില്‍വേ സ്റ്റേഷനിലും വിമാനത്താവളത്തിലേക്കും വരുന്ന യാത്രക്കാര്‍ മുന്‍കൂട്ടി യാത്ര ക്രമീകരിക്കണം.
പാര്‍ക്കിങ് സ്ഥലങ്ങള്‍
കവടിയാര്‍ സാല്‍വേഷന്‍ ആര്‍മി സ്‌കൂള്‍, കേരള വാട്ടര്‍ അതോറിറ്റി കോമ്പൗണ്ട്, ജിമ്മി ജോര്‍ജ് ഇന്‍ഡോര്‍ സ്റ്റേഡിയം കോമ്പൗണ്ട്, കേരള യൂണിവേഴ്‌സിറ്റി സെനറ്റ് ഹാള്‍ കോമ്പൗണ്ട്, യൂണിവേഴ്‌സിറ്റി കോളേജ്, സംസ്‌കൃത കോളേജ്, വഴുതയ്ക്കാട് വിമന്‍സ് കോളേജ്, സംഗീത കോളേജ്, സെന്റ് ജോസഫ് സ്‌കൂള്‍, മാഞ്ഞാലിക്കുളം ഗ്രൗണ്ട്, ഫോര്‍ട്ട് ഹൈസ്‌കൂള്‍, ചാല ഗവ. ബോയ്‌സ് ആന്‍ഡ് ഗേള്‍സ് ഹയര്‍ സെക്കന്‍ഡറി സ്‌കൂള്‍ ഗ്രൗണ്ട്, അട്ടക്കുളങ്ങര സെന്‍ട്രല്‍ സ്‌കൂള്‍, ആറ്റുകാല്‍ ക്ഷേത്രം ഗ്രൗണ്ട്, ഐരാണിമുട്ടം ഹോമിയോ കോളേജ്, നഗരസഭയുടെ കീഴിലുള്ള തമ്പാനൂര്‍, പാളയം, കോര്‍പറേഷന്‍ ഓഫീസ് എന്നിവിടങ്ങളിലെ മള്‍ട്ടി ലെവല്‍ കാര്‍ പാര്‍ക്കിങ്ങുകള്‍ റെയില്‍വേ, തമ്പാനൂര്‍ കെഎസ്ആര്‍ടിസി പാര്‍ക്കിങ് ഏരിയ. (പാര്‍ക്ക് ചെയ്യുന്ന വാഹനങ്ങളില്‍ ഡ്രൈവറുടെ മൊബൈല്‍ ഫോണ്‍ നമ്പര്‍ എഴുതി പ്രദര്‍ശിപ്പിക്കണം).