തിരുവനന്തപുരത്ത് അമ്മാവനെ മരുമകന്‍ തല്ലിക്കൊന്നു; പ്രതി അറസ്റ്റില്‍

തിരുവനന്തപുരം: തിരുവനന്തപുരത്ത് അമ്മാവനെ മരുമകന്‍ തല്ലിക്കൊന്നു. ഇരുവരും ഒരു വീട്ടിലാണ് താമസിച്ചിരുന്നത്. കുടപ്പനക്കുന്ന് സ്വദേശി സുധാകരനാണ് കൊല്ലപ്പെട്ടത്. ഇയാളുടെ മരുമകന്‍ രാജേഷാണ് കൊലയാളി. നിരവധി കേസുകളില്‍ പ്രതിയായ രാജേഷിനെ പൊലീസ് പിടികൂടി. ഇന്നലെ രാത്രിയാണ് കൊലപാതകം നടന്നത്. ഇന്ന് രാവിലെയോട് രാജേഷ് അമ്മാവനെ കുളിപ്പിക്കാനായി പുറത്തിറക്കി. ഇത് കണ്ട നാട്ടുകാരാണ് വിവരം പൊലീസിനെ അറിയിച്ചത്.

സ്ഥിരമായി വീട്ടില്‍ മദ്യപിച്ചെത്തുന്ന രാജേഷ് അമ്മാവനെ മര്‍ദിക്കുന്നത് പതിവായിരുന്നു. ഇന്നലെ രാത്രിയിലും രാജേഷ് മദ്യപിച്ചെത്തി അമ്മാവനെ ക്രൂരമായി മര്‍ദിച്ചുവെന്ന് പൊലീസിന് അയല്‍വാസികള്‍ മൊഴി നല്‍കി. ഈ മര്‍ദനത്തിലാണ് രാത്രി സുധാകരന്‍ കൊല്ലപ്പെട്ടത്.പൊലീസ് തന്നെ പിടികൂടുമെന്ന് മനസിലാക്കിയ രാജേഷ് ഉടന്‍ തന്നെ സ്ഥലത്ത് നിന്ന് മുങ്ങി. എങ്കിലും അധികം വൈകാതെ മണ്ണന്തലയില്‍ നിന്നും ഇയാളെ പൊലീസ് അറസ്റ്റ് ചെയ്യുക ആയിരുന്നു.