ജമ്മു കശ്മീരിലെ കിഷ്ത്വാറില്‍ മേഘവിസ്ഫോടനത്തെ തുടര്‍ന്ന് വെള്ളപ്പൊക്കം; മരണസംഖ്യ 33 ആയി ഉയര്‍ന്നു; 120 പേര്‍ക്ക് പരിക്ക്; 220 ല്‍ അധികം പേരെ കാണാതായി; ദുരന്തമുണ്ടായത് മച്ചൈല്‍ മാതാ ക്ഷേത്രത്തിലേക്കുളള തീര്‍ഥാടന പാതയില്‍; ദുരിതം അനുഭവിക്കുന്നവര്‍ക്ക് എല്ലാ സഹായവും വാഗ്ദാനം ചെയ്ത് പ്രധാനമന്ത്രി
ജമ്മു കശ്മീരിലെ കിഷ്ത്വാറില്‍ മേഘവിസ്ഫോടനത്തെ തുടര്‍ന്ന് വെള്ളപ്പൊക്കം
കിഷ്ത്വാര്‍: ജമ്മു കാശ്മീരിലെ കിഷ്ത്വാറില്‍ വ്യാഴാഴ്ചയുണ്ടായ ശക്തമായ മേഘവിസ്ഫോടനത്തെ തുടര്‍ന്ന് പെട്ടെന്നുണ്ടായ വെള്ളപ്പൊക്കത്തില്‍ 33 പേര്‍ മരിച്ചു. 120-ല്‍ അധികം പേര്‍ക്ക് പരിക്കേല്‍ക്കുകയും ചെയ്തു. 220-ല്‍ അധികം ആളുകളെ കാണാതായിട്ടുണ്ട്. മച്ചൈല്‍ മാതാ ക്ഷേത്രത്തിലേക്കുള്ള തീര്‍ത്ഥാടന പാതയിലാണ് ദുരന്തമുണ്ടായത്.
ഉച്ചതിരിഞ്ഞാണ് സംഭവം. രക്ഷാപ്രവര്‍ത്തകര്‍ സ്ഥലത്തേക്ക് കുതിച്ചെത്തി. കിഷ്ത്വാറിലെ മാതാ ചണ്ഡി ഹിമാലയന്‍ ക്ഷേത്രത്തിലേക്കുള്ള മച്ചൈല്‍ മാതാ യാത്രയുടെ ആരംഭ പോയിന്റാണ് മേഘവിസ്‌ഫോടനം നടന്ന ചിഷോതി. ഇവിടെ നിന്ന് തീര്‍ഥാടകരെ ഒഴിപ്പിക്കുകയാണ്. ചഷോതി വരെ മാത്രമേ വാഹനങ്ങള്‍ എത്തുകയുള്ളു. മേഘവിസ്ഫോടനത്തെ തുടര്‍ന്ന് വാര്‍ഷിക തീര്‍ഥയാത്ര റദ്ദാക്കിയതായി ഡപ്യൂട്ടി കമ്മീഷണര്‍ കിഷ്ത്വാര്‍ പങ്കജ് ശര്‍മ്മ അറിയിച്ചു.
നിരവധി കെട്ടിടങ്ങള്‍ തകരുകയും വലിയ നാശനഷ്ടം സംഭവിക്കുകയും ചെയ്തതായി റിപ്പോര്‍ട്ടുകളുണ്ട്. രണ്ട് സി.ഐ.എസ്.എഫ്. ജവാന്മാരും മരണപ്പെട്ടവരില്‍ ഉള്‍പ്പെടുന്നു. രക്ഷാപ്രവര്‍ത്തനങ്ങള്‍ പുരോഗമിക്കുകയാണ്. ദുരന്തസ്ഥലത്തേക്ക് കൂടുതല്‍ സഹായം എത്തിക്കാനും കാണാതായവരെ കണ്ടെത്താനും ശ്രമങ്ങള്‍ തുടരുന്നു. അപകടസ്ഥലത്തു നിന്നുള്ള ദൃശ്യങ്ങളില്‍ തീര്‍ത്ഥാടകരെ വേഗത്തില്‍ ഒഴിപ്പിക്കുന്നതും, വെള്ളപ്പൊക്കത്തില്‍ ആളുകള്‍ ഭയന്ന് ചിതറിയോടുന്നതും കാണാം.
കേന്ദ്ര ആഭ്യന്തര മന്ത്രി അമിത് ഷായെ സംഭവവികാസങ്ങള്‍ ധരിപ്പിച്ചതായി ജമ്മു കശ്മീര്‍ മുഖ്യമന്ത്രി ഒമര്‍ അബ്ദുള്ള അറിയിച്ചു. കിഷ്ത്വാറില്‍ നിന്നുള്ള വിവരങ്ങള്‍ ലഭിക്കുന്നതില്‍ കാലതാമസം നേരിടുന്നുണ്ടെങ്കിലും, ദുരന്തനിവാരണ പ്രവര്‍ത്തനങ്ങള്‍ക്കായി സാധ്യമായ എല്ലാ വിഭവങ്ങളും ഉപയോഗപ്പെടുത്തുന്നുണ്ടെന്ന് അദ്ദേഹം കൂട്ടിച്ചേര്‍ത്തു.
പ്രധാനമന്ത്രി നരേന്ദ്ര മോദി ദുരന്തത്തില്‍ അനുശോചനം രേഖപ്പെടുത്തി. ദുരിതമനുഭവിക്കുന്നവര്‍ക്ക് എല്ലാ സഹായവും വാഗ്ദാനം ചെയ്ത അദ്ദേഹം, രക്ഷാപ്രവര്‍ത്തനങ്ങള്‍ നിരീക്ഷിച്ചു വരികയാണെന്നും അറിയിച്ചു. രക്ഷാപ്രവര്‍ത്തനങ്ങളും പുനരധിവാസ പ്രവര്‍ത്തനങ്ങളും ഊര്‍ജ്ജിതമായി തുടരുകയാണ്.
സംഭവ സ്ഥലത്തേക്ക് ദേശീയ ദുരന്ത പ്രതികരണ സേന രണ്ടുസംഘങ്ങളെ അയച്ചു. 'വലിയതോതിലുള്ള മേഘവിസ്‌ഫോടനമാണ് ഉണ്ടായത്. ജില്ലാ അധികൃതരെ ബന്ധപ്പെട്ടെങ്കിലും പെട്ടെന്നുണ്ടായ മേഘവിസ്‌ഫോടനത്തിന്റെ അമ്പരപ്പിലാണ് അവര്‍. അവര്‍ സംഭവസ്ഥലത്തേക്ക് നീങ്ങി കഴിഞ്ഞു. കൂടുതല്‍ വിവരങ്ങള്‍ ഉടന്‍ ലഭ്യമാകും. സാധ്യമായ എല്ലാ സഹായവും നല്‍കും. പരിക്കേറ്റവരെ ചികിത്സയ്ക്കായി ഹെലികോപ്ടറില്‍ രക്ഷപ്പെടുത്താനുള്ള ക്രമീകരണങ്ങള്‍ ഏര്‍പ്പെടുത്തിയിട്ടുണ്ട്'- ഉധംപൂര്‍ എംപിയും. കേന്ദ്ര മന്ത്രിയുമായ ജിതേന്ദ്ര സിങ് പറഞ്ഞു.രക്ഷാപ്രവര്‍ത്തനങ്ങള്‍ ശക്തമാക്കാന്‍ പൊലീസിനും, സൈന്യത്തിനും ദുരന്ത പ്രതികരണ സേനയ്ക്കും ലഫറ്റനന്റ് ഗവര്‍ണര്‍ മനോജ് സിന്‍ഹ നിര്‍ദ്ദേശം നല്‍കി.