എപ്സ്റ്റീന്റെ ലൈംഗിക കെണിയില് ഇന്ത്യന് പെണ്കുട്ടിയും! അതിജീവിതയെ കണ്ടെത്തി നഷ്ടപരിഹാരം നല്കാന് ഇന്ത്യന് എംബസിയുടെ സഹായം തേടി യുഎസ് അധികൃതര്; മുന് കേന്ദ്ര ആരോഗ്യ മന്ത്രി ഹര്ഷവര്ദ്ധനുമായുള്ള കൂടിക്കാഴ്ച സൂചിപ്പിച്ച് ബില് ഗേറ്റ്സ്-എപ്സ്റ്റീന് ഇ-മെയിലുകള്; പുറത്തുവന്ന രേഖകളില് കൂടുതല് പ്രമുഖ ഇന്ത്യക്കാരും
എപ്സ്റ്റീന്റെ ലൈംഗിക കെണിയില് ഇന്ത്യന് പെണ്കുട്ടിയും!
ന്യൂഡല്ഹി: ലൈംഗിക കുറ്റവാളി ജെഫ്രി എപ്സ്റ്റീന്റെ അതിക്രമത്തിനിരയായവരില് ഒരിന്ത്യന് പെണ്കുട്ടിയും ഉള്പ്പെടുന്നതായി പുറത്തുവന്ന രേഖകള് വ്യക്തമാക്കുന്നു. ഈ അതിജീവിതയെ കണ്ടെത്തി നഷ്ടപരിഹാരം നല്കുന്നതിനായി 2020 ജനുവരിയില് യുഎസ് അധികൃതര് ഇന്ത്യന് എംബസിയുടെ സഹായം തേടിയെന്നാണ് പുതിയ റിപ്പോര്ട്ടുകള്.
2019-ല് ന്യൂയോര്ക്കിലെ ജയിലില്വെച്ച് എപ്സ്റ്റീന് മരിച്ചതിന് പിന്നാലെയാണ് ഇന്ത്യന് എംബസിക്ക് യുഎസ് അധികൃതര് ഇമെയില് അയച്ചത്. അതിജീവിതയെ കണ്ടെത്തി വിക്ടിം ഫണ്ടില് നിന്നുള്ള നഷ്ടപരിഹാരം നല്കാന് സഹായിക്കണമെന്നും ഇതിനായുള്ള അപേക്ഷ പൂരിപ്പിച്ച് അയക്കാന് നിര്ദ്ദേശിക്കണമെന്നും മെയിലില് ആവശ്യപ്പെട്ടിരുന്നു. ഈ രേഖയില് ആര്ക്കാണ് മെയില് അയച്ചതെന്ന ഭാഗം മറച്ചുവെച്ചാണ് പുറത്തുവിട്ടിട്ടുള്ളത്.
2020 ജനുവരി 13-ന് യുഎസ് ഉദ്യോഗസ്ഥര് തമ്മില് നടന്ന ആശയവിനിമയത്തില്, ഇരയെ കണ്ടെത്തുന്നതിനായി ഇന്ത്യയിലെ എംബസിയുമായി ഏകോപിപ്പിക്കാന് നിര്ദ്ദേശം നല്കിയിട്ടുണ്ട്. 'എപ്സ്റ്റീന് വിക്ടിംസ്' (Epstein Victims) എന്ന തലക്കെട്ടിലുള്ള ഇമെയിലിലെ ഔദ്യോഗിക വിശദാംശങ്ങള് പലതും മറച്ചുവെച്ച നിലയിലാണ്.
''ന്യൂയോര്ക്ക് ക്രൈം വിക്ടിംസ് കോംപന്സേഷന് ലിങ്ക് www.ny.gov എന്നതാണ്. ദയവായി അവരെക്കൊണ്ട് അപേക്ഷ പൂരിപ്പിച്ച് എനിക്ക് അയച്ചുതരിക. ഞാന് അത് നേരിട്ട് എഫ്ബിഐ പേപ്പര്വര്ക്കുകളിലേക്ക് കൈമാറാം. ഫ്ലോറിഡയിലുള്ളവര്ക്കായി, തിരിച്ചറിഞ്ഞ തെറാപ്പിസ്റ്റിനെക്കൊണ്ട് എന്നെ ബന്ധപ്പെടാന് പറയുക, ഞങ്ങളുടെ എമര്ജന്സി വിക്ടിം അസിസ്റ്റന്സ് വഴി 6 സെഷനുകള് കവര് ചെയ്യാന് ഞങ്ങള് അഭ്യര്ത്ഥിക്കും.''
ഇമെയിലിലെ മറ്റൊരു പ്രധാന ഭാഗം ഇങ്ങനെയാണ്: ''അവസാനമായി, ഇന്ത്യയിലുള്ള വ്യക്തിയെക്കുറിച്ച്. നിങ്ങള്ക്ക് അവളുടെ വിലാസവും കോണ്ടാക്റ്റ് വിവരങ്ങളും നല്കാന് കഴിയുമെങ്കില്, അവിടുത്തെ എംബസിയിലുള്ള ഞങ്ങളുടെ സഹപ്രവര്ത്തകരുമായി ഞാന് ഏകോപിപ്പിക്കാം. നിങ്ങള്ക്ക് കൂടുതല് ചോദ്യങ്ങളുണ്ടെങ്കില് ദയവായി എന്നെ വിളിക്കുക.'' 2019 ഓഗസ്റ്റില് എപ്സ്റ്റീന് മരിച്ചതിന് ശേഷമാണ് ഈ ഇമെയില് അയച്ചിരിക്കുന്നത്.
പുറത്തുവന്ന മറ്റൊരു രസകരമായ ഇമെയില് ബില് ഗേറ്റ്സും എപ്സ്റ്റീനും തമ്മിലുള്ളതാണ്. അന്നത്തെ കേന്ദ്ര ആരോഗ്യ മന്ത്രി ഹര്ഷ വര്ദ്ധനുമായുള്ള കൂടിക്കാഴ്ചയെക്കുറിച്ചാണ് ഇതില് പരാമര്ശിക്കുന്നത്. 2014 ജൂണ് 5-ലെ ഇമെയിലില്, ''സെപ്റ്റംബര് 17-ന് ഇന്ത്യയില് വെച്ച് ഡോ. വര്ദ്ധനുമായുള്ള കൂടിക്കാഴ്ചയാണോ താങ്കളുടെ ലക്ഷ്യം?'' എന്ന് ബില് ഗേറ്റ്സ് ചോദിക്കുന്നുണ്ട്.
പ്രമുഖ പിആര് കമ്പനി പ്രൊമോട്ടറായ ദിലീപ് ചെറിയാനെക്കുറിച്ചും പുതിയ ഇമെയിലുകളില് പരാമര്ശമുണ്ട്. 2017 ഏപ്രില് 2-ന് എപ്സ്റ്റീന്റെ സഹായിയായ ജിനോ യൂ, ചെറിയാനെ കാണാന് താല്പ്പര്യമുണ്ടോ എന്ന് എപ്സ്റ്റീനോട് ചോദിക്കുന്നു. ''ഇന്ത്യയില് വലിയ സ്വാധീനമുള്ള എന്റെ സുഹൃത്ത് ദിലീപിനെ കാണാന് നിങ്ങള്ക്ക് താല്പ്പര്യമുണ്ടോ? ഏപ്രില് 3 മുതല് 6 വരെ അദ്ദേഹം പാരിസിലുണ്ട്. 160 ദശലക്ഷം യുഎസ് ഡോളറിന് അദ്ദേഹം തന്റെ പരസ്യ-പിആര് കമ്പനി വിറ്റതേയുള്ളൂ,'' ജിനോ യൂ എപ്സ്റ്റീന് അയച്ച സന്ദേശത്തില് പറയുന്നു.
2018 ജൂണ് 10-ലെ മറ്റൊരു ഇമെയിലില്, ജിഡെ സെയ്റ്റ്ലിന് എന്ന വ്യക്തി ഇന്ത്യയിലെ വ്യാജവാര്ത്തകളെക്കുറിച്ച് എപ്സ്റ്റീനോട് സംസാരിക്കുന്നു. ഇന്ത്യയിലെ തലക്കെട്ടുകള് പഴയതും തെറ്റുമാണെന്നും, ഒമ്പത് വര്ഷം മുമ്പ് വൈറ്റ് ഹൗസും യുഎസ് സെനറ്റും ഇത് പരിശോധിച്ച് ക്ലിയറന്സ് നല്കിയതാണെന്നും അദ്ദേഹം പറയുന്നു. ഇന്ത്യയിലെ ചില വ്യക്തികള് വിദേശ ഫണ്ടുള്ള ഒരു കമ്പനിയെ ബ്ലാക്ക് മെയില് ചെയ്യാന് ശ്രമിച്ചതിന്റെ ഭാഗമാണിതെന്നും അദ്ദേഹം വ്യക്തമാക്കുന്നുണ്ട്.
2010 ജൂലൈ 8-ലെ മറ്റൊരു ഇമെയിലില്, പേര് വെളിപ്പെടുത്താത്ത ഒരു സ്ത്രീ തന്റെ വിമാനയാത്രയ്ക്കിടയില് ഒരു പ്രായമായ ഇന്ത്യന് വംശജനില് നിന്ന് നേരിട്ട മോശം അനുഭവത്തെക്കുറിച്ച് എപ്സ്റ്റീനോട് പങ്കുവെക്കുന്നുണ്ട്. അയാള് അമിതമായി മദ്യപിച്ചിരുന്നതായും തന്നോട് മോശമായി പെരുമാറിയതായും അവര് ഇമെയിലില് കുറിച്ചു.
ജെഫ്രി എപ്സ്റ്റീനുമായി ബന്ധപ്പെട്ട ദശലക്ഷക്കണക്കിന് രേഖകളാണ് യുഎസ് നീതിന്യായ വകുപ്പ് പുറത്തുവിട്ടത്. 30 ലക്ഷം പേജുകള്, 1.80 ലക്ഷം ചിത്രങ്ങള്, 2,000 വീഡിയോകള് എന്നിവ ഇതില് ഉള്പ്പെടുന്നു. പുറത്തുവന്ന രേഖകളില് നിരവധി പ്രമുഖരായ ഇന്ത്യക്കാരുടെ പേരുകളുമുണ്ട്. പ്രധാനമന്ത്രി നരേന്ദ്ര മോദി, കേന്ദ്രമന്ത്രി ഹര്ദീപ് സിങ് പുരി, വ്യവസായി അനില് അംബാനി, സംവിധായിക മീര നായര്, ആത്മീയ ഗുരു ദീപക് ചോപ്ര തുടങ്ങിയവരുടെ പേരുകള് ഈ ഫയലുകളില് പരാമര്ശിക്കപ്പെടുന്നുണ്ട്.
എന്നിരുന്നാലും, പുറത്തുവന്ന രേഖകളില് പേരുണ്ടെന്നതുകൊണ്ട് മാത്രം എപ്സ്റ്റീനുമായി ബന്ധപ്പെട്ട ഏതെങ്കിലും കുറ്റകൃത്യങ്ങളില് ഇവര് പങ്കാളികളായി എന്ന് അര്ത്ഥമില്ല. പല പേരുകളും ചില ഇമെയിലുകളില് പരാമര്ശിക്കുക മാത്രമാണ് ചെയ്യുന്നത്. എപ്സ്റ്റീന് കേസിലെ ഈ പുതിയ വെളിപ്പെടുത്തലുകള് ആഗോളതലത്തില് ഈ വിഷയത്തിന്റെ വ്യാപ്തിയും സങ്കീര്ണ്ണതയും വര്ദ്ധിപ്പിക്കുന്നു.