വിസി നിയമന വിവാദം: മുഖ്യമന്ത്രിയുടെ പേരുകള് തള്ളി; സാങ്കേതിക സര്വകലാശാല വിസിയായി സിസ തോമസിനെയും ഡിജിറ്റല് സര്വകലാശാല വിസി ആയി പ്രിയ ചന്ദ്രനെയും നിയമിക്കണം; മുഖ്യമന്ത്രി മെറിറ്റ് അട്ടിമറിച്ചെന്ന് ഗവര്ണര്; സുപ്രീം കോടതിയില് സത്യവാങ്മൂലം നല്കി
മുഖ്യമന്ത്രിയുടെ പേരുകള് തള്ളി, സിസ തോമസിനെ നിയമിക്കണമെന്ന് ഗവര്ണര്
ന്യൂഡല്ഹി: സാങ്കേതിക, ഡിജിറ്റല് സര്വകലാശാലകളിലെ വൈസ് ചാന്സലര് (വി.സി.) നിയമനവുമായി ബന്ധപ്പെട്ട് ഗവര്ണര് ആരിഫ് മുഹമ്മദ് ഖാന് സുപ്രീം കോടതിയില് അസാധാരണ നീക്കം നടത്തി. വി.സി. നിയമനത്തിനായി മുഖ്യമന്ത്രി പിണറായി വിജയന് നല്കിയ പേരുകള് തള്ളിക്കളഞ്ഞ ചാന്സലര്, താന് നിര്ദേശിക്കുന്ന പേരുകള് വി.സി.മാരായി നിയമിക്കണമെന്ന് ആവശ്യപ്പെട്ട് കോടതിയില് സത്യവാങ്മൂലം സമര്പ്പിച്ചു.
സാങ്കേതിക സര്വകലാശാല വിസി ആയി സിസ തോമസിനെയും, ഡോക്ടര് പ്രിയ ചന്ദ്രനെ ഡിജിറ്റല് സര്വകലാശാല വിസി ആയും നിയമിക്കണമെന്നാണ് സത്വാങ്മൂലത്തില് പറയുന്നത്. കോടതി നേരത്തെ റദ്ദാക്കിയ പേരാണ് മുഖ്യമന്ത്രി നല്കിയതെന്നും, മുഖ്യമന്ത്രി മെറിറ്റ് അട്ടിമറിച്ചുവെന്നും ചാന്സലര് സത്യവാങ്മൂലത്തില് ചൂണ്ടിക്കാട്ടി. കേസ് നാളെ പരിഗണിക്കാനിരിക്കെയാണ് ഗവര്ണറുടെ നീക്കം.
ഗവര്ണറുടെ പ്രധാന നിര്ദേശങ്ങള്
സത്യവാങ്മൂലത്തില്, ഗവര്ണര് രണ്ടു സര്വകലാശാലകളിലേക്കുള്ള വി.സി.മാരുടെ പേരുകള് നേരിട്ട് നിര്ദേശിച്ചു:
സാങ്കേതിക സര്വകലാശാല (KTU) വി.സി.: ഡോ. സിസ തോമസ്
ഡിജിറ്റല് സര്വകലാശാല വി.സി.: ഡോ. പ്രിയ ചന്ദ്രന്
മുഖ്യമന്ത്രിയുടെ പേരുകള് തള്ളിയതിന്റെ കാരണങ്ങള്
വി.സി. നിയമനത്തിനായി മുഖ്യമന്ത്രി നല്കിയ ഡോ. എം.എസ്. രാജശ്രീ, ഡോ. സജി ഗോപിനാഥ് എന്നിവരുടെ പേരുകള് മെറിറ്റ് അട്ടിമറിക്കുന്നതാണെന്നും ഗവര്ണര് സത്യവാങ്മൂലത്തില് ചൂണ്ടിക്കാട്ടി.
മുഖ്യമന്ത്രി നല്കിയ എം.എസ്. രാജശ്രീയുടെ വി.സി. നിയമനം സുപ്രീം കോടതി നേരത്തേ റദ്ദാക്കിയതാണ്. റദ്ദാക്കിയ പേര് വീണ്ടും നല്കിയതിലൂടെ മുഖ്യമന്ത്രി മെറിറ്റ് അട്ടിമറിച്ചു. ഡിജിറ്റല് സര്വകലാശാലയുമായി ബന്ധപ്പെട്ട ആരോപണങ്ങള് സജി ഗോപിനാഥിനെതിരെ നിലനില്ക്കുന്നുണ്ട്.
സിസ തോമസ് സര്വകലാശാലയ്ക്ക് നാണക്കേടുണ്ടാക്കിയെന്നാണ് മുഖ്യമന്ത്രി തനിക്ക് കൈമാറിയ റിപ്പോര്ട്ടിലുള്ളതെന്നും, ഇതിനായി മുഖ്യമന്ത്രി ചില മാധ്യമങ്ങളെ കൂട്ടുപിടിച്ചെന്നും ഗവര്ണര് സത്യവാങ്മൂലത്തില് ആരോപിച്ചു.
ഡിജിറ്റല്, സാങ്കേതിക സര്വകലാശാലാ വി.സി. നിയമനത്തില് തീരുമാനം വൈകുന്നതില് സുപ്രീം കോടതി നേരത്തെ അതൃപ്തി രേഖപ്പെടുത്തിയിരുന്നു. എത്രയും വേഗം വി.സി. നിയമനത്തില് തീരുമാനമെടുക്കണമെന്ന് കോടതി നിര്ദേശം നല്കിയിരുന്നു. മുഖ്യമന്ത്രി നല്കുന്ന പട്ടികയില് നിന്നാകണം വി.സി. നിയമനമെന്ന് അനുശാസിക്കുന്ന സുപ്രീം കോടതി ഉത്തരവിന് പിന്നാലെ, എതിര്പ്പുണ്ടെങ്കില് ചാന്സലര് ആ വിവരം കോടതിയെ അറിയിക്കണമെന്നും നിര്ദേശമുണ്ടായിരുന്നു. ഈ നിര്ദേശത്തിന്റെ പശ്ചാത്തലത്തിലാണ് ഗവര്ണര് സത്യവാങ്മൂലം സമര്പ്പിച്ചത്.