പ്രഭാതഭക്ഷണ സമയത്ത് തളര്‍ച്ച അനുഭവപ്പെട്ടു; മകളുടെ വിവാഹദിവസം അച്ഛന് ഹൃദയാഘാതം; അച്ഛന് സുഖമാകും വരെ വിവാഹം വേണ്ടെന്ന് സ്മൃതി മന്ദാന; പലാഷ് മുച്ചലുമായി ഇന്ന് നടക്കേണ്ടിയിരുന്ന വിവാഹം മാറ്റിവച്ചു
സാംഗ്ലി: ഇന്ത്യന്‍ വനിതാ ക്രിക്കറ്റ് താരം സ്മൃതി മന്ദാനയുടെ വിവാഹം മാറ്റിവെച്ചു. ഞായറാഴ്ചയായിരുന്നു സ്മൃതിയുടെയും സംഗീതസംവിധായകന്‍ പലാഷ് മുച്ചലിന്റെയും വിവാഹം നിശ്ചയിച്ചിരുന്നത്. എന്നാല്‍ സ്മൃതിയുടെ അച്ഛന് ശ്രീനിവാസ് മന്ദാനയുടെ ആരോഗ്യസ്ഥിതി വഷളായതിനെ തുടര്‍ന്നാണ് വിവാഹം മാറ്റിവെയ്ക്കുന്നതെന്ന് സ്മൃതിയുടെ മാനേജര്‍ തുഹിന്‍ മിശ്ര മാധ്യമങ്ങളോട് പറഞ്ഞു. ശ്രീനിവാസ് മന്ദാനയ്ക്ക് ഞായറാഴ്ച രാവിലെ ഹൃദയാഘാതം ഉണ്ടായെന്നാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്.
മന്ദാനയുടെ ജന്മനാടായ സാംഗ്ലിയിലായിരുന്നു വിവാഹവേദി. എന്നാല്‍ വിവാഹ ദിനം അടിയന്തരമായി വേദിയിലേക്ക് ആംബുലന്‍സ് എത്തിയതായി റിപ്പോര്‍ട്ടുകള്‍ പുറത്തുവന്നിരുന്നു. പിന്നീടാണ് സ്മൃതിയുടെ അച്ഛന്റെ ആരോഗ്യസ്ഥിതിയെക്കുറിച്ചുള്ള വിവരങ്ങള്‍ പുറത്തുവന്നത്. സാംഗ്ലിയിലെ സര്‍വിത് ആശുപത്രിയില്‍ പ്രവേശിപ്പിച്ചിരിക്കുന്ന ശ്രീനിവാസ് മന്ദാന ഇപ്പോള്‍ ഡോക്ടര്‍മാരുടെ നിരീക്ഷണത്തിലാണ്. ഇതോടെ വിവാഹം മാറ്റിവെയ്ക്കാന്‍ സ്മൃതി തീരുമാനിക്കുകയായിരുന്നുവെന്നാണ് താരത്തിന്റെ മാനേജര്‍ തുഹിന്‍ മിശ്ര അറിയിച്ചിരിക്കുന്നത്. വിവാഹം അനിശ്ചിതമായി മാറ്റിവെച്ചിരിക്കുകയാണ്.
വിവാഹ ദിവസമായ ഞായറാഴ്ച പ്രഭാതഭക്ഷണത്തിനിടെയാണ് ശ്രീനിവാസ് മന്ദാനയുടെ ആരോഗ്യസ്ഥിതിി വഷളാകുന്നത്. അദ്ദേഹം സുഖം പ്രാപിക്കുമെന്ന് പ്രതീക്ഷിച്ചിരുന്നെങ്കിലും, അവസ്ഥ വഷളായതോടെ ഉടന്‍ തന്നെ ആംബുലന്‍സില്‍ ആശുപത്രിയിലെത്തിക്കുകയായിരുന്നു. അച്ഛനുമായി സ്മൃതി വളരെ അടുപ്പത്തിലാണ്. അച്ഛന് സുഖമാകും വരെ വിവാഹം വേണ്ടെന്ന് സ്മൃതി പറഞ്ഞു. പിന്നീട് അനിശ്ചിതകാലത്തേക്ക് മാറ്റിവെക്കാന്‍ തീരുമാനിക്കുകയായിരുന്നു.
കഴിഞ്ഞ ദിവസം സ്മൃതി മന്ദാനയെ പ്രപ്പോസ് ചെയ്യുന്ന വീഡിയോ സംഗീത സംവിധായകന്‍ കൂടിയായ പലാഷ് മുച്ചല്‍ പുറത്തുവിട്ടിരുന്നു. ഇന്ത്യന്‍ ടീം വനിതാ ഏകദിന ലോകകപ്പുയര്‍ത്തിയ മുംബൈ ഡിവൈ പാട്ടീല്‍ സ്റ്റേഡിയത്തില്‍ വെച്ചാണ് പലാഷ് മുച്ചല്‍ സ്മൃതിയെ ഔദ്യോഗികമായി പ്രപ്പോസ് ചെയ്തത്. ഡിവൈ പാട്ടീല്‍ സ്റ്റേഡിയത്തിലെ പിച്ചിലേക്ക് സ്മൃതിയെ കണ്ണുകെട്ടി കൈപിടിച്ച് കൂട്ടിക്കൊണ്ടുവന്നശേഷമാണ് മൈതാന മധ്യത്തില്‍ മുട്ടുകുത്തി നിന്ന് പലാഷ് സ്മൃതിയെ പ്രപ്പോസ് ചെയ്തത്.
പലാഷ് മുച്ചലുമായുള്ള വിവാഹ നിശ്ചയം സ്മൃതി സോഷ്യല്‍ മീഡിയയിലൂടെ ഔദ്യോഗികമായി വെളിപ്പെടുത്തിയിരുന്നു. ഇന്ത്യന്‍ താരങ്ങളായ ജെമീമ റോഡ്രിഗസ്, രാധാ യാദവ്, ശ്രേയങ്ക പാട്ടീല്‍, അരുന്ധതി റെഡ്ഡി എന്നിവര്‍ക്കൊപ്പം ചിത്രീകരിച്ച വീഡിയോയിലൂടെ ആയിരുന്നു സ്മൃതി ആരാധകരുമായി വിവാഹ നിശ്ചയ വിവരം പങ്കുവെച്ചത്.
വിവാഹിതാരവാന്‍ പോകുന്ന സ്മൃതി മന്ദാനയ്ക്കും പലാഷ് മുച്ചാലിനും പ്രധാനമന്ത്രി നരേന്ദ്ര മോദി കത്തിലൂടെ ആശംസകള്‍ നേര്‍ന്നിരുന്നു. സ്മൃതിക്കും പലാഷിനും എന്നേക്കും സന്തോഷകരമായ ജീവിതം ആശംസിച്ച് പ്രധാനമന്ത്രിയുടെ ഓഫീസില്‍ നിന്നും കത്തയച്ചിരുന്നു.