പുലർച്ചയോടെ കേട്ടത് അതിഭീകര ശബ്ദം; പ്രകമ്പനത്തിൽ വീടുകളിലെ ജനൽ ചില്ലുകൾ അടക്കം തകർന്നു; നിമിഷ നേരം കൊണ്ട് നഗരത്തിന്റെ പലയിടങ്ങളും ഇരുട്ടിലായി; ലോകത്തെ ഞെട്ടിച്ച് വെനസ്വേലയിലെ വിമാനത്താവളങ്ങൾക്ക് നേരെ ആക്രമണം അഴിച്ചുവിട്ട് അമേരിക്ക; സ്ഫോടനങ്ങളിൽ വിറങ്ങലിച്ച് പ്രദേശങ്ങൾ; ട്രംപിന്റെ തീക്കളിയിൽ നടുക്കം

കാരക്കാസ്: വെനസ്വേലയുടെ തലസ്ഥാനമായ കാരക്കാസിനും സമീപ പ്രദേശങ്ങളിലുമുള്ള നാല് വിമാനത്താവളങ്ങൾക്ക് നേരെ അമേരിക്കയുടെ ആക്രമണം നടന്നതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ശനിയാഴ്ച പുലർച്ചെയുണ്ടായ ഈ ആക്രമണങ്ങളിൽ നിരവധി സ്ഫോടനങ്ങൾ രേഖപ്പെടുത്തുകയും ചിലയിടങ്ങളിൽ വൈദ്യുതി ബന്ധം തടസ്സപ്പെടുകയും ചെയ്തതായി റിപ്പോർട്ടുകളുണ്ട്. പ്രസിഡന്റ് നിക്കോളാസ് മദൂറോയെ രാജ്യം വിടാൻ അനുവദിക്കാത്ത തരത്തിലുള്ള നീക്കങ്ങളായാണ് ഈ ആക്രമണങ്ങളെ വിശേഷിപ്പിക്കപ്പെടുന്നത്.

കാരക്കാസിന് കിഴക്കൻ മേഖലയിലെ ഹിഗരറ്റ് വിമാനത്താവളം അടക്കമുള്ള കേന്ദ്രങ്ങളിലാണ് സ്ഫോടനങ്ങളുണ്ടായത്. പുലർച്ചെ 1.50 ഓടെയാണ് ആദ്യത്തെ സ്ഫോടന ശബ്ദം കേട്ടതെന്ന് സിഎൻഎൻ റിപ്പോർട്ടർമാർ പറയുന്നു. തങ്ങൾ താമസിച്ചിരുന്ന മുറിയുടെ ജനലുകൾ അടക്കം കുലുങ്ങിയതായും, നഗരത്തിന്റെ പല ഭാഗങ്ങളിലും വൈദ്യുതി ബന്ധം തടസ്സപ്പെട്ടതായും സിഎൻഎൻ റിപ്പോർട്ടർ ഓസ്മാരി ഹെർണാണ്ടസ് വിശദീകരിച്ചു. സ്ഫോടനങ്ങൾക്ക് പിന്നാലെ വിമാനങ്ങളുടെ ശബ്ദം കേട്ടതായും ഓറഞ്ച് നിറത്തിലുള്ള തീജ്വാലകൾ ദൃശ്യമാകുന്ന വീഡിയോ ദൃശ്യങ്ങൾ പുറത്തുവന്നതായും റിപ്പോർട്ടുകളുണ്ട്.

ലാ ഗുയ്രാ പ്രവിശ്യയിലും സമാനമായ ആക്രമണങ്ങൾ റിപ്പോർട്ട് ചെയ്യപ്പെട്ടിട്ടുണ്ട്. വെനസ്വേലയ്ക്ക് നേരെ ശക്തമായ ആക്രമണമുണ്ടാകുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് നേരത്തെ മുന്നറിയിപ്പ് നൽകിയിരുന്നു. കൂടാതെ, ഒക്ടോബറിൽ സിഐഎയോട് വെനസ്വേലയ്ക്കുള്ളിൽ കടന്ന് ആക്രമണങ്ങൾ നടത്താൻ ട്രംപ് നിർദ്ദേശം നൽകിയതായും വിവരങ്ങളുണ്ട്. എന്നാൽ, ഈ ആക്രമണങ്ങളെക്കുറിച്ച് വൈറ്റ് ഹൗസോ പെന്റഗണോ ഇതുവരെ ഔദ്യോഗികമായി പ്രതികരിച്ചിട്ടില്ല.

അമേരിക്കൻ അധികൃതരുടെ ഭാഗത്തുനിന്ന് ഔദ്യോഗിക പ്രതികരണം വന്നിട്ടില്ലെങ്കിലും, ഈ സംഭവങ്ങൾ വെനസ്വേലയിലെ നിലവിലെ രാഷ്ട്രീയ പ്രതിസന്ധിയുടെ പുതിയൊരു ഘട്ടമായി വിലയിരുത്തപ്പെടുന്നു.