ഇറാനില് യുദ്ധകാഹളം; 24 മണിക്കൂറിനുള്ളില് അമേരിക്കന് ആക്രമണം? ഖത്തറിലെ താവളത്തില് നിന്ന് സൈനികരെ ഒഴിപ്പിച്ചു; നെതന്യാഹുവിന്റെ 'വിങ് ഓഫ് സിയോണ്' വിമാനം പറന്നുയര്ന്നത് സൂചനയോ? ട്രംപിന്റെ വാക്ക് വിശ്വസിച്ച് പ്രക്ഷോഭം തുടരുന്നവര്ക്ക് 'സഹായം' ഉടന് എത്തും; ലോകം മുള്മുനയില്!
ഇറാനില് യുദ്ധകാഹളം
വാഷിംഗ്ടണ്/ടെഹ്റാന്: പശ്ചിമേഷ്യയില്, വര്ദ്ധിച്ചുവരുന്ന സംഘര്ഷങ്ങള്ക്കിടെ, ഇറാനില് അമേരിക്കന് സൈനിക ഇടപെടലിന് സാധ്യതയേറി. അടുത്ത 24 മണിക്കൂറിനുള്ളില് സൈനിക നീക്കം ഉണ്ടായേക്കാമെന്ന് ഉദ്യോഗസ്ഥര് മുന്നറിയിപ്പ് നല്കി. ഇതിനിടെ, മേഖലയിലെ പ്രധാന അമേരിക്കന് സൈനികത്താവളങ്ങളില് നിന്ന് ഉദ്യോഗസ്ഥരെ ഒഴിപ്പിക്കാന് വാഷിംഗ്ടണ് നടപടി തുടങ്ങി.
ഖത്തറില് നിന്ന് പിന്വാങ്ങി അമേരിക്ക; യുദ്ധസൂചനയോ?
അടുത്ത 24 മണിക്കൂറിനുള്ളില് ഇറാനില് സൈനിക നടപടിക്ക് സാധ്യതയുണ്ടെന്ന് മുതിര്ന്ന ഉദ്യോഗസ്ഥരെ ഉദ്ധരിച്ച് അന്താരാഷ്ട്ര മാധ്യമങ്ങള് റിപ്പോര്ട്ട് ചെയ്യുന്നു. ഇതിന്റെ ഭാഗമായി ഖത്തറിലെ അല് ഉദൈദ് ഉള്പ്പെടെയുള്ള പ്രധാന സൈനിക താവളങ്ങളില് നിന്ന് അമേരിക്കന് ഉദ്യോഗസ്ഥരെ ഒഴിപ്പിച്ചു തുടങ്ങി. ബുധനാഴ്ച വൈകുന്നേരത്തോടെ സൈനികരെയും മറ്റ് ഉദ്യോഗസ്ഥരെയും താവളത്തിന് പുറത്തേക്ക് മാറ്റാന് നിര്ദ്ദേശം നല്കിയിട്ടുണ്ട്. ഇറാന്റെ തിരിച്ചടി ഭയന്നുള്ള മുന്കരുതല് നടപടിയാണിതെന്ന് അമേരിക്കന് വൃത്തങ്ങള് സൂചിപ്പിക്കുന്നുണ്ടെങ്കിലും, ഒരു വലിയ ആക്രമണത്തിന് തൊട്ടുമുന്പുള്ള നീക്കമാണിതെന്നാണ് രാഷ്ട്രീയ നിരീക്ഷകരുടെ വിലയിരുത്തല്.
ഒരു മുതിര്ന്ന ഇറാനിയന് ഉദ്യോഗസ്ഥന്റെ മുന്നറിയിപ്പിനെത്തുടര്ന്ന് മുന്കരുതല് എന്ന നിലയിലാണ് സൈനികരെ പിന്വലിക്കുന്നതെന്ന് യുഎസ് ഉദ്യോഗസ്ഥര് കഴിഞ്ഞ ബുധനാഴ്ച പറഞ്ഞിരുന്നു. സൈനിക ഇടപെടല് അടുത്ത 24 മണിക്കൂറിനുള്ളില് സംഭവിക്കാമെന്ന് രണ്ട് യൂറോപ്യന് ഉദ്യോഗസ്ഥര് സൂചിപ്പിച്ചു. അതേസമയം, ഇടപെടാന് ട്രംപ് തീരുമാനിച്ചതായും എന്നാല് കൃത്യമായ സമയവും വ്യാപ്തിയും വ്യക്തമല്ലെന്നും ഒരു ഇസ്രായേലി ഉദ്യോഗസ്ഥനും അറിയിച്ചു.
ഭീഷണികളെ ചെറുക്കാന് ഇറാന്
രാജ്യത്തെ ആഭ്യന്തര സംഘര്ഷങ്ങള് അടിച്ചമര്ത്താന് ഇറാന് നേതൃത്വം ശ്രമിക്കുമ്പോള്, സര്ക്കാര് വിരുദ്ധ പ്രതിഷേധക്കാര്ക്കുവേണ്ടി ഇടപെടുമെന്ന യുഎസ് പ്രസിഡന്റ് ഡൊണാള്ഡ് ട്രംപിന്റെ ആവര്ത്തിച്ചുള്ള ഭീഷണികളെ തടയാന് ടെഹ്റാന് ശ്രമിക്കുകയാണ്. സുരക്ഷാ ആശങ്കകള് വര്ദ്ധിച്ചതിനെത്തുടര്ന്ന് മുന്കരുതല് നടപടിയായിട്ടാണ് പിന്വാങ്ങല് എന്ന് പേര് വെളിപ്പെടുത്തരുതെന്ന വ്യവസ്ഥയില് സംസാരിച്ച ഒരു യുഎസ് ഉദ്യോഗസ്ഥന് പറഞ്ഞു.
പ്രദേശത്തെ ഏറ്റവും വലിയ യുഎസ് താവളമായ ഖത്തറിലെ അല് ഉദൈദ് എയര്ബേസില് നിന്നുള്ള ഒഴിപ്പിക്കല് നിലവിലെ പ്രാദേശിക സംഘര്ഷങ്ങളോടുള്ള പ്രതികരണമായിട്ടാണെന്ന് ഖത്തര് വ്യക്തമാക്കി. ഇറാന് നിലവില് ആഭ്യന്തര പ്രക്ഷോഭങ്ങളെ അഭിമുഖീകരിക്കുമ്പോള്, സര്ക്കാര് വിരുദ്ധ പ്രക്ഷോഭകര്ക്ക് വേണ്ടി ട്രംപ് ആവര്ത്തിച്ച് നടത്തുന്ന ഇടപെടല് ഭീഷണികളെ ചെറുക്കാനാണ് ഇറാന് ശ്രമിക്കുന്നത്.
കഴിഞ്ഞ വര്ഷം ഇറാനിയന് മിസൈല് ആക്രമണത്തിന് മണിക്കൂറുകള്ക്ക് മുമ്പ് നടന്നതുപോലെ ഒരു ഫുട്ബോള് സ്റ്റേഡിയത്തിലേക്കും ഷോപ്പിംഗ് മാളിലേക്കും വലിയ തോതില് സൈനികരെ ബസില് അയച്ചതിന്റെ സൂചനകളൊന്നും ലഭിച്ചിട്ടില്ലെങ്കിലും, ചില ഉദ്യോഗസ്ഥരോട് ബേസ് വിടാന് പറഞ്ഞതായി മൂന്ന് നയതന്ത്രജ്ഞര് പറഞ്ഞു. ഇറാനിലെ പ്രതിഷേധക്കാരെ പിന്തുണയ്ക്കുന്നതിനായി ഇടപെടുമെന്ന് ട്രംപ് ആവര്ത്തിച്ച് ഭീഷണിപ്പെടുത്തിയിട്ടുണ്ട്.
ഇറാന് 'ഇത്രയും വലിയ നാശനഷ്ടങ്ങള് ഒരിക്കലും നേരിട്ടിട്ടില്ല' എന്ന് സായുധ സേനാ മേധാവി അബ്ദുള്റഹിം മൗസവി ബുധനാഴ്ച പറഞ്ഞത്. ഫ്രഞ്ച് വിദേശകാര്യ മന്ത്രി ജീന്-നോയല് ബാരറ്റ് 'ഇറാന്റെ ചരിത്രത്തിലെ ഏറ്റവും അക്രമാസക്തമായ അടിച്ചമര്ത്തല്' എന്നാണ് ഇപ്പോള് നടക്കുന്ന സംഭവങ്ങളെ വിശേഷിപ്പിച്ചത്. പ്രതിഷേധങ്ങള്ക്ക് പിന്നില് അമേരിക്കയും ഇസ്രായേലുമാണെന്ന് ഇറാന് അധികൃതര് ആരോപിച്ചു. ട്രംപ് ദിവസങ്ങള്ക്കകം ഇറാനില് ഇടപെടുമെന്ന് പരസ്യമായി ഭീഷണിപ്പെടുത്തിയിരുന്നു, എന്നാല് വിശദാംശങ്ങള് നല്കിയിരുന്നില്ല.
വധശിക്ഷകളും ട്രംപിന്റെ കടുത്ത മുന്നറിയിപ്പും
പ്രതിഷേധങ്ങളില് പങ്കെടുത്ത 26 വയസ്സുകാരന് ഇര്ഫാന് സുല്ത്താനിയെ തൂക്കിലേറ്റാന് ഇറാന് ഭരണകൂടം തീരുമാനിച്ചതാണ് അമേരിക്കയെ പ്രകോപിപ്പിച്ചത്. 'അവര് തൂക്കിക്കൊല്ലാന് തുടങ്ങിയാല് പിന്നെ കാണുന്നത് കടുത്ത നടപടികളായിരിക്കും' എന്ന് പ്രസിഡന്റ് ഡൊണാള്ഡ് ട്രംപ് കഴിഞ്ഞ ദിവസം മുന്നറിയിപ്പ് നല്കിയിരുന്നു. വധശിക്ഷകള് നടപ്പിലാക്കിയാല് ഇറാനിലെ ഭരണകേന്ദ്രങ്ങളെ ലക്ഷ്യമിട്ട് വ്യോമാക്രമണം നടത്താന് ട്രംപ് ഉത്തരവിട്ടേക്കാം. 'സഹായം ഉടന് എത്തും' എന്ന് ഇറാന്റെ തെരുവുകളില് പോരാടുന്ന പ്രതിഷേധക്കാര്ക്ക് ട്രംപ് വാഗ്ദാനം.
ഇറാന്റെ പ്രത്യാക്രമണ ഭീഷണി
അമേരിക്കന് നീക്കത്തിനെതിരെ ഇറാന് കടുത്ത നിലപാടാണ് സ്വീകരിച്ചിരിക്കുന്നത്. തങ്ങള്ക്കെതിരെ ആക്രമണം നടന്നാല് അതിന് സൗകര്യമൊരുക്കുന്ന സൗദി അറേബ്യ, യുഎഇ, തുര്ക്കി തുടങ്ങിയ രാജ്യങ്ങളിലെ യുഎസ് സൈനിക താവളങ്ങള് തകര്ക്കുമെന്ന് ഇറാന് മുന്നറിയിപ്പ് നല്കി. ഇതിനിടെ ഇസ്രായേല് പ്രധാനമന്ത്രി ബെഞ്ചമിന് നെതന്യാഹുവിന്റെ ഔദ്യോഗിക വിമാനം ഇസ്രായേലില് നിന്ന് പുറപ്പെട്ടതും ദുരൂഹത വര്ദ്ധിപ്പിക്കുന്നു. മുന്പ് ഇറാന്റെ ആണവ കേന്ദ്രങ്ങള് ആക്രമിച്ചപ്പോഴും ഇതേ രീതിയിലുള്ള നീക്കങ്ങള് ഇസ്രായേലിന്റെ ഭാഗത്തുനിന്ന് ഉണ്ടായിരുന്നു.
മരണം വിതയ്ക്കുന്ന തെരുവുകള്
ഇറാന്റെ ചരിത്രത്തിലെ ഏറ്റവും രക്തരൂക്ഷിതമായ പ്രക്ഷോഭമാണ് ഇപ്പോള് നടക്കുന്നത്. വിദേശ ശക്തികള് ഇളക്കിവിട്ട തീവ്രവാദികളാണ് പ്രതിഷേധക്കാരെന്ന് ഇറാന് ആരോപിക്കുന്നു. മനുഷ്യാവകാശ സംഘടനകളുടെ കണക്കനുസരിച്ച് ഇതുവരെ 3,428 പേര് കൊല്ലപ്പെടുകയും 18,000-ത്തിലധികം പേര് അറസ്റ്റിലാവുകയും ചെയ്തിട്ടുണ്ട്. ഇന്റര്നെറ്റ് പൂര്ണ്ണമായും വിച്ഛേദിക്കപ്പെട്ടതിനാല് ഇറാന്റെ ഉള്പ്രദേശങ്ങളില് നിന്നുള്ള വാര്ത്തകള് പുറത്തുവരുന്നില്ല. എങ്കിലും, തെരുവുകളില് ഒഴുകുന്ന രക്തം ഒരു വലിയ വിപ്ലവത്തിന്റെയോ അല്ലെങ്കില് വന്നാശത്തിന്റെയോ സൂചനയാണെന്ന് റിപ്പോര്ട്ടുകള് വ്യക്തമാക്കുന്നു.