ഒളിവിലുള്ള രാഹുല്‍ മാങ്കൂട്ടത്തില്‍ തിരുവനന്തപുരത്തെത്തി; ഇന്നലെ അഭിഭാഷകന്റെ ഓഫീസിലെത്തി വക്കാലത്ത് ഒപ്പിട്ടു; മുന്‍കൂര്‍ജാമ്യ ഹര്‍ജി ബുധനാഴ്ചയിലേക്ക് മാറ്റിയതോടെ അറസ്റ്റു ഭീഷണിയില്‍ പാലക്കാട് എംഎല്‍എ; രാഹുല്‍ മാങ്കൂട്ടത്തിലിനെതിരെ വാണ്ടഡ് പോസ്റ്ററുമായി എസ്എഫ്‌ഐ പാലക്കാട് നഗരത്തില്‍; തദ്ദേശ പ്രചരണം രാഹുലിന്റെ 'പെണ്ണ് കേസില്‍' മുങ്ങുമ്പോള്‍
ഒളിവിലുള്ള രാഹുല്‍ മാങ്കൂട്ടത്തില്‍ തിരുവനന്തപുരത്തെത്തി
തിരുവനന്തപുരം: തദ്ദേശ തിരഞ്ഞെടുപ്പിലെ പ്രചരണം രാഹുല്‍ മാങ്കൂട്ടത്തിലിന്റെ 'പെണ്ണ് കേസില്‍' മുങ്ങുമോ എന്ന കടുത്ത ആശങ്കയിലാണ് കോണ്‍ഗ്രസ്. രാഹുലിനെതിരായ കേസിനെ കുറിച്ച് പ്രതികരിച്ചു മുന്നോട്ടു പോകേണ്ട അവസ്ഥയിലാണ് നേതാക്കള്‍. രാഹുലിന്റെ ഒളിവു ജീവിതവും മുന്‍കൂര്‍ ജാമ്യാപേക്ഷയുമായി ബന്ധപ്പെട്ട വിഷയങ്ങളുമാണ് ഇപ്പോള്‍ ചര്‍ച്ചകളില്‍ നിറയുന്നത്.
ലൈംഗിക പീഡന കേസില്‍ ഒളിവിലുള്ള രാഹുല്‍ മാങ്കൂട്ടത്തില്‍ എംഎല്‍എ തിരുവനന്തപുരത്തെത്തിയെന്നാണ് ഒടുവില്‍ വരുന്ന വിവരങ്ങള്‍. ഇന്നലെയാണ് രാഹുല്‍ മാങ്കൂട്ടത്തില്‍ തിരുവനന്തപുരത്ത് എത്തിയത്. തിരുവനന്തപുരം വഞ്ചിയൂരിലെ അഭിഭാഷകന്റെ ഓഫീസിലെത്തി വക്കാലത്ത് ഒപ്പിട്ടു. രാഹുല്‍ നേരിട്ട് എത്തിയാണ് വക്കാലത്തില്‍ ഒപ്പിട്ടതെന്ന് അഭിഭാഷകന്‍ വ്യക്തമാക്കി. മുന്‍കൂര്‍ ജാമ്യ ഹര്‍ജി നല്‍കാനായാണ് ഇന്നലെ രാഹുല്‍ തലസ്ഥാനതെത്തി. പൊലീസ് കേസെടുത്തതിന് പിന്നാലെ രാഹുല്‍ ഒളിവില്‍ പോവുകയായിരുന്നുവെന്നായിരുന്നു വിവരം. ഇതിനിടെയാണ് രാഹുല്‍ തിരുവനന്തപുരത്തെത്തിയത്. രാഹുലിനെ പിടികൂടാന്‍ പൊലീസ് അന്വേഷണം ഊര്‍ജിതമാക്കിയിരുന്നു. തിരുവനന്തപുരത്ത് എത്തിയശേഷം പിന്നീട് രാഹുല്‍ എങ്ങോട്ട് പോയെന്നകാര്യത്തിലടക്കം വിവരമില്ല.
അതേസമയം, ബലാത്സംഗക്കേസില്‍ രാഹുല്‍ മാങ്കൂട്ടത്തിലിന്റെ മുന്‍കൂര്‍ ജാമ്യാപേക്ഷ കോടതി ബുധനാഴ്ചയായിരിക്കും പരിഗണിക്കുക. തിരുവനന്തപുരം സെഷന്‍സ് കോടതിയാണ് രാഹുലിന്റെ മുന്‍കൂര്‍ ജാമ്യഹര്‍ജി പരിഗണിക്കുന്നത്. നേരത്തെ തിങ്കളാഴ്ച പരിഗണിക്കുമെന്നായിരുന്നു വിവരം. എന്നാല്‍, ഹര്‍ജി ബുധനാഴ്ച പരിഗണിക്കാന്‍ തീരുമാനിക്കുകയായിരുന്നു. ഇന്നലെ വൈകിട്ടോടെയാണ് രാഹുല്‍ മാങ്കൂട്ടത്തില്‍ മുന്‍കൂര്‍ ജാമ്യഹര്‍ജി നല്‍കിയത്. ഇതില്‍ ഒപ്പിട്ടുന്നതിനായാണ് രാഹുല്‍ ഇന്നലെ തിരുവനന്തപുരത്തെത്തിയത്. മുന്‍കൂര്‍ ജാമ്യ ഹര്‍ജി കോടതി പരിഗണിക്കുന്നതിന് മുമ്പായി രാഹുലിന്റെ അറസ്റ്റ് ഉണ്ടാകുമോയെന്നാണ് ഇനി അറിയാനുള്ളത്. നേരത്തെ രാഹുല്‍ പാലക്കാട്ടെ രഹസ്യകേന്ദ്രത്തിലുണ്ടെന്ന വിവരവും പുറത്തുവന്നിരുന്നു.
തിരുവനന്തപുരത്ത് നിന്ന് രാഹുല്‍ പാലക്കാടേക്ക് തിരിച്ചുപോയിരുന്നോ എന്ന കാര്യത്തിലടക്കം വിവരമില്ല. പാലക്കാട് വിട്ടാല്‍ അത് മുന്‍കൂര്‍ ജാമ്യത്തെ ബാധിക്കുമെന്നാണ് രാഹുലിന് ലഭിച്ച നിയമോപദേശം. രാഹുല്‍ മാങ്കൂട്ടത്തില്‍ എംഎല്‍എയുടെ ഔദ്യോഗിക വാഹനം പാലക്കാട്ടെ ഫ്‌ലാറ്റിലുണ്ട്. രാഹുലിന്റെ ഡ്രൈവറും പേഴ്‌സണല്‍ അസിസ്റ്റന്റ് ഫസലും പാലക്കാട് ഉണ്ട്. അതേസമയം, ഫസലിന്റെ ഫോണ്‍ കഴിഞ്ഞ ദിവസം മുതല്‍ സ്വിച്ച് ഓഫ് ആയിരുന്നെങ്കിലും ഇന്ന് രാവിലെ ഫസലും ഡ്രൈവറും എംഎല്‍എ ഓഫീസിലെത്തിയിരുന്നു.
തിരുവനന്തപുരം സിറ്റി പൊലീസ് കമ്മിഷണര്‍ തോംസണ്‍ ജോസിന്റെ നേതൃത്വത്തില്‍ പ്രത്യേക സംഘമാണ് യുവതിയുടെ പരാതിയില്‍ റജിസ്റ്റര്‍ ചെയ്ത കേസ് അന്വേഷിക്കുന്നത്. നെയ്യാറ്റിന്‍കര ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതി ഇന്നലെ യുവതിയുടെ രഹസ്യ മൊഴിയെടുത്തിരുന്നു.
ലൈംഗിക പീഡന പരാതിയില്‍ ബലാത്സംഗം, നിര്‍ബന്ധിത ഗര്‍ഭഛിദ്രം എന്നിവയടക്കമുള്ള കുറ്റങ്ങള്‍ക്കു കേസെടുത്ത് രാഹുല്‍ മാങ്കൂട്ടത്തിലിനെ അറസ്റ്റ് ചെയ്യാനുള്ള നടപടികളിലേക്കു കടന്നിരിക്കുകയാണ് പൊലീസ്. ജീവപര്യന്തം തടവുശിക്ഷ ലഭിക്കാവുന്നതടക്കം 7 വകുപ്പുകളാണു ചുമത്തിയിരിക്കുന്നത്. രാഹുല്‍ എവിടെയാണെന്നു കണ്ടെത്താനായിട്ടില്ല.
ലൈംഗികപീഡനവും ഭീഷണിയുമുണ്ടായെന്നും ഗര്‍ഭഛിദ്രത്തിനു പ്രേരിപ്പിച്ചെന്നും യുവതി നല്‍കിയ മൊഴിയുടെ അടിസ്ഥാനത്തിലാണ് കേസ്. ഗര്‍ഭഛിദ്രത്തിനുള്ള ഗുളിക യുവതിക്കു നല്‍കിയതിന് രാഹുലിന്റെ സുഹൃത്ത് പത്തനംതിട്ട സ്വദേശി ജോബി ജോസഫിനെ രണ്ടാം പ്രതിയാക്കിയിട്ടുണ്ട്. ഇക്കൊല്ലം മാര്‍ച്ച് മുതല്‍ മേയ് വരെ തിരുവനന്തപുരത്തും പാലക്കാട്ടുമായി നാലിടങ്ങളില്‍ ലൈംഗിക പീഡനത്തിനിരയായെന്നാണ് 20 പേജുള്ള മൊഴിയിലുള്ളത്.
നഗ്‌നദൃശ്യങ്ങള്‍ പകര്‍ത്തിയ രാഹുല്‍, ഗര്‍ഭിണിയാണെന്നറിഞ്ഞിട്ടും ലൈംഗികമായി പീഡിപ്പിച്ചു. ജോബി ജോസഫ് ഗര്‍ഭഛിദ്രത്തിനുള്ള ഗുളിക നല്‍കിയെന്നും വിഡിയോ കോള്‍ ചെയ്ത രാഹുല്‍ കാറില്‍വച്ച് അത് നിര്‍ബന്ധിച്ചു കഴിപ്പിച്ചെന്നും യുവതിയുടെ മൊഴിയിലുണ്ട്. രാഹുല്‍ മാങ്കൂട്ടത്തിലിനെതിരെ വാണ്ടഡ് പോസ്റ്ററുമായി എസ്എഫ്‌ഐ പാലക്കാട് നഗരത്തില്‍ പ്രതിഷേധിച്ചു.