'രാഹുല്‍ മാങ്കൂട്ടത്തില്‍ കേള്‍പ്പിച്ചത് പഴയ ശബ്ദ സന്ദേശം; അന്ന് ഭയമായിരുന്നു, നടിയുടെ വെളിപ്പെടുത്തല്‍ വന്നപ്പോഴാണ് ദുരനുഭവം തുറന്നുപറയാന്‍ തീരുമാനിച്ചത്; ഇപ്പോഴും രാഹുല്‍ സംസാരിക്കുന്നത് വെല്ലുവിളിയുടെ ഭാഷയില്‍'; മറുപടിയുമായി ട്രാന്‍സ് വുമണ്‍ അവന്തിക
മറുപടിയുമായി ട്രാന്‍സ് വുമണ്‍ അവന്തിക
തിരുവനന്തപുരം: ശബ്ദരേഖ പുറത്തുവിട്ട് ആരോപണങ്ങളില്‍ പ്രതിരോധം തീര്‍ക്കാന്‍ ശ്രമിച്ച രാഹുല്‍ മാങ്കൂട്ടത്തില്‍ എംഎല്‍എയ്ക്ക് മറുപടിയുമായി ട്രാന്‍സ് വുമണ്‍ അവന്തിക. രാഹുല്‍ മാങ്കൂട്ടത്തില്‍ മാധ്യമങ്ങള്‍ക്ക് മുന്നില്‍ കാണിച്ചത് പഴയ ശബ്ദ സന്ദേശമെന്ന് അവന്തിക പറഞ്ഞു. രാഹുലിനെതിരെ ആരോപണങ്ങള്‍ ഉയരുന്നതിന് മുന്‍പ് ആഗസ്റ്റ് ഒന്നിനുള്ള ശബ്ദ സന്ദേശമാണിത്. ഇതേ മാധ്യമ പ്രവര്‍ത്തകനോട് തന്നെയാണ് പിന്നീട് താനെല്ലാം തുറന്നു പറഞ്ഞതെന്നും അവന്തിക പറഞ്ഞു.
രാഹുല്‍ പുറത്തുവിട്ടത് ഓഗസ്റ്റ് ഒന്നിലെ സംഭാഷണമായിരുന്നു. അന്ന് തനിക്ക് ഭയമായിരുന്നുവെന്നും അവന്തിക പറഞ്ഞു. തനിക്ക് ഉചിതമെന്ന് തോന്നിയ ഒരു സമയത്താണ് ദുരനുഭവം തുറന്നുപറഞ്ഞതെന്നും നടിയുടെ വെളിപ്പെടുത്തല്‍ വന്നപ്പോഴാണ് ദുരനുഭവം തുറന്നുപറയാന്‍ തീരുമാനിച്ചതെന്നും അവന്തിക പറഞ്ഞു.
ആ സമയങ്ങളില്‍ എല്ലാം തുറന്നുപറയാന്‍ കഴിയുന്ന അവസ്ഥയില്‍ ആയിരുന്നില്ല ഞാന്‍. ആരോപണങ്ങളില്‍ രാഹുലിന്റെ ഭാഗത്ത് തെറ്റില്ലെങ്കില്‍ നീതി പോരാട്ടത്തില്‍ ഒപ്പം നില്‍ക്കുമെന്ന് അന്ന് അവന്തിക പറഞ്ഞിരുന്നു. എന്നാല്‍, പിന്നീട് രാഹുല്‍ തെറ്റ് ചെയ്തിട്ടുണ്ടെന്ന് തെളിയുകയായിരുന്നു. പഴയ ശബ്ദ സന്ദേശം ഇപ്പോള്‍ കൊണ്ടുവന്ന് ഒരു വാദം നടത്തേണ്ട ആവശ്യമില്ലെന്ന് അവന്തിക പറഞ്ഞു. ഗൂഢാലോചനയുടെ ഭാഗമാണ് അവന്തികയുടെ ആരോപണം എന്നായിരുന്നു രാഹുല്‍ പറഞ്ഞത്.
എന്തുകൊണ്ടാണ് ടെലഗ്രാം വഴി നടത്തിയ ചാറ്റുകളെപ്പറ്റി രാഹുല്‍ പറയാത്തതെന്നും താന്‍ ആരുമായും ഗൂഢാലോചന നടത്തിയിട്ടില്ലെന്നുമാണ് അവന്തിക പറയുന്നത്. ആഗസ്റ്റ് ഒന്നിന് മുന്‍പും നിരന്തരമായി രാഹുലുമായി സംസാരിച്ചിട്ടുണ്ട്. ഈ പഴയ ശബ്ദ സന്ദേശമല്ലാതെ മറ്റുള്ള ചാറ്റുകള്‍ എന്താണ് രാഹുല്‍ പരസ്യമാക്കാത്തത് വാനിഷ് മോഡിലാണ് രാഹുല്‍ മെസേജ് അയക്കുന്നത്. ഒരിക്കല്‍ മെസേജുകള്‍ കണ്ടാല്‍ പിന്നീട് അത് കാണാന്‍ കഴിയില്ല. രാഹുല്‍ ഇപ്പോള്‍ ശബ്ദ സന്ദേശങ്ങള്‍ നിരത്തുന്നത് ഈ ധൈര്യത്തിന്റെ പുറത്താണെന്നും അവര്‍ പറഞ്ഞു.
ഒരു സ്ത്രീയ്ക്ക് പ്രശ്നമുണ്ടായാല്‍ മുന്‍പ് ഇത് തുറന്ന് പറയാത്തതെന്തെന്ന് ചോദിക്കുന്നത് ശരിയല്ലെന്ന് അവന്തിക പറഞ്ഞു. അന്ന് ഭയമുണ്ടായിരുന്നു. വെല്ലുവിളിയുടെ സ്വരത്തിലാണ് ഇപ്പോഴും അയാള്‍ സംസാരിക്കുന്നത്. അതിന്റെ ഭവിഷ്യത്തുകള്‍ ഒറ്റയ്ക്ക് അനുഭവിക്കേണ്ടേ എന്ന് ചോദിച്ച അവന്തിക സോഷ്യല്‍ മീഡിയയിലെ ഉള്‍പ്പെടെ പ്രചാരണങ്ങളില്‍ താന്‍ വല്ലാത്ത ട്രോമിയിലൂടെയാണ് കടന്നുപോകുന്നതെന്നും വ്യക്തമാക്കി.
രാഹുല്‍ പുറത്തുവിട്ട ശബ്ദരേഖയിലുള്ളത് തന്റെ സംഭാഷണമാണെന്നും അത് രാഹുലിന് അയച്ചത് താനാണെന്നും അവന്തിക സ്ഥിരീകരിച്ചു. താന്‍ അന്ന് സംസാരിച്ച അതേ മാധ്യമപ്രവര്‍ത്തകനോടാണ് പിന്നീട് താന്‍ നേരിട്ട ദുരനുഭവം വെളിപ്പെടുത്തിയതെന്നും അവന്തിക പറഞ്ഞു.
ആരോപണം ഉന്നയിച്ച അവന്തികയും ഒരു മാധ്യമപ്രവര്‍ത്തകനും തമ്മില്‍ ഓഗസ്റ്റ് 1ന് നടത്തിയ ഫോണ്‍ സംഭാഷണത്തിന്റെ ശബ്ദരേഖ പുറത്തുവിട്ടുകൊണ്ടാണ് രാഹുല്‍ പ്രതിരോധിക്കാന്‍ ശ്രമിച്ചത്. രാഹുല്‍ തന്നോട് മോശമായി പെരുമാറിയിട്ടില്ലെന്നും നല്ല സുഹൃത്താണെന്നും ഉള്‍പ്പെടെ അവന്തിക പറയുന്നതായുള്ള ശബ്ദരേഖയാണ് ലൈവായി പുറത്തുവിട്ടത്.
മാധ്യമ പ്രവര്‍ത്തകനുമായി ഗൂഢാലോചന നടത്തിയതിന്റെ ഭാഗമായാണ് അവന്തിക ആരോപണങ്ങള്‍ ഉന്നയിച്ചത് എന്നാണ് രാഹുല്‍ സൂചിപ്പിച്ചിരിക്കുന്നത്. എന്നാല്‍, മാധ്യമ പ്രവര്‍ത്തകന്‍ തന്നെ വിളിച്ച് കാര്യങ്ങള്‍ അന്വേഷിക്കുകയായിരുന്നെന്നും അതിനുള്ള മറുപടിയാണ് ആ സമയത്ത് നല്‍കിയതെന്നും അവന്തിക പറഞ്ഞു. അന്ന് അയാളോട് ഒന്നും വെളിപ്പെടുത്താന്‍ പറ്റുന്ന സാഹചര്യമായിരുന്നില്ല. പിന്നീട് അയാളോട് തന്നെ എല്ലാം വെളിപ്പെടുത്തുകയായിരുന്നു.
മാധ്യമ പ്രവര്‍ത്തകന്‍ ഇത്തരത്തില്‍ കാര്യങ്ങളറിയാന്‍ വിളിച്ചതായി അവന്തിക തന്നെയാണ് രാഹുലിനെ അറിയിച്ചത്. അപ്പോഴുണ്ടായിരുന്ന സംഭാഷണമാണ് രാഹുല്‍ ഇപ്പോള്‍ പുറത്തുവിട്ടിരിക്കുന്നത്. അതിനുശേഷം ഈ വിഷയത്തെപ്പറ്റി സംസാരിച്ചിട്ടില്ലെന്ന് അവന്തിക പറയുന്നു.