മദ്യപിച്ച് കല്ലമ്പലം സുധിയുണ്ടാക്കിയ വികൃതി; ലോക്കോ പൈലറ്റ് എമര്ജന്സി ബ്രേക്കിട്ടത് രക്ഷയായി; വന്ദേഭാരതിന്റെ സാങ്കേതിക മികവ് ഒഴിവാക്കിയത് ട്രെയിന് മറിയല്; അകത്തുമുറിയില് ഒഴിവായത് വന് ദുരന്തം; ഓടി രക്ഷപ്പെട്ട സുധിയെ പൊക്കി പോലീസ്; വര്ക്കലയില് ദുരന്തം വഴിമാറിയ കഥ
തിരുവനന്തപുരം: വര്ക്കലയില് വന്ദേഭാരത് എക്സ്പ്രസ് ട്രാക്കില് വീണ ഓട്ടോറിക്ഷയിലിടിച്ചു സംഭവത്തില് യാത്രക്കാര്ക്കുണ്ടായത് വലിയ ദുരന്തം. തീവണ്ടി യാത്ര പോലും ഈ മേഖലയില് തടസ്സപ്പെട്ടു. വര്ക്കല അകത്തുമുറി റെയില്വേ സ്റ്റേഷനില് രാത്രി പത്ത് മണിയോടെയായിരുന്നു സംഭവം. അപകടത്തെത്തുടര്ന്ന് ഓട്ടോ ഡ്രൈവര് സുധിയെ റെയില്വേ സംരക്ഷണ സേന കസ്റ്റഡിയിലെടുത്തു. അതിവേഗ ബ്രേക്കിട്ടതു കൊണ്ടാണ് വന് അപകടം ഒഴിവായത്. വന്ദേഭാരത് തീവണ്ടിയിലെ സാങ്കേതിക സൗകര്യങ്ങളാണ് ഇതിന് സഹായകമായത്.
റെയില്വേ പ്ലാറ്റ്ഫോമിലൂടെ അശ്രദ്ധമായി ഓടിച്ചുവന്ന ഓട്ടോറിക്ഷ നിയന്ത്രണം വിട്ട് ട്രാക്കിലേക്ക് മറിയുകയായിരുന്നു. അപകടം നടന്നയുടന് ഡ്രൈവര് സുധി ഓടി രക്ഷപ്പെട്ടെങ്കിലും പിന്നീട് റെയില്വേ പോലീസ് ഇയാളെ പിടികൂടി. അപകടത്തെത്തുടര്ന്ന് കാസര്കോട്-തിരുവനന്തപുരം വന്ദേഭാരത് എക്സ്പ്രസ് ഒരു മണിക്കൂറോളം സ്ഥലത്ത് പിടിച്ചിട്ടു. ട്രാക്കില് നിന്ന് ഓട്ടോറിക്ഷ നീക്കം ചെയ്ത ശേഷമാണ് യാത്ര തുടരാനായത്. രാത്രി 10:40-ന് തിരുവനന്തപുരം സെന്ട്രല് സ്റ്റേഷനില് എത്തേണ്ടിയിരുന്ന ട്രെയിന്, അപകടം കാരണം വൈകി 11:50-ഓടെയാണ് ലക്ഷ്യസ്ഥാനത്തെത്തിയത്.
വര്ക്കല അകത്തുമുറിയില് വന്ദേഭാരത് ട്രെയിന് തടസ്സപ്പെടാന് കാരണമായ സംഭവത്തില് റെയില്വേ പോലീസ് കര്ശന നിയമനടപടികള് സ്വീകരിക്കും. ട്രെയിന് തടസ്സപ്പെടുത്തിയതിനും അതിക്രമിച്ചു കടന്നതിനും ഡ്രൈവര് സുധിക്കെതിരെ കേസെടുത്തു. റെയില്വേ ട്രാക്കിലേക്ക് മനഃപൂര്വമല്ലാത്ത വീഴ്ചയാണെങ്കിലും സുരക്ഷാ വീഴ്ച ഗൗരവമായാണ് ആര്പിഎഫ് കാണുന്നത്. പ്ലാറ്റ്ഫോമിലൂടെ വാഹനം ഓടിച്ച് ട്രാക്കിലേക്ക് മറിഞ്ഞത് അതീവ ഗുരുതരമായ അശ്രദ്ധയായതിനാല്, പ്രതിയുടെ ലൈസന്സ് റദ്ദാക്കാന് മോട്ടോര് വാഹന വകുപ്പിനോട് റെയില്വേ ആവശ്യപ്പെടും.
ട്രെയിന് വൈകിയത് മൂലമുണ്ടായ നഷ്ടവും ട്രാക്കിനും മറ്റുമുണ്ടായ കേടുപാടുകളും പരിശോധിച്ച് ഡ്രൈവറില് നിന്ന് നഷ്ടപരിഹാരം ഈടാക്കാനും സാധ്യതയുണ്ട്. പ്ലാറ്റ്ഫോമിലേക്ക് ഓട്ടോറിക്ഷ എങ്ങനെ പ്രവേശിച്ചു എന്നതിനെക്കുറിച്ച് സ്റ്റേഷന് മാസ്റ്റര് ഉള്പ്പെടെയുള്ളവരില് നിന്ന് ആര്പിഎഫ് റിപ്പോര്ട്ട് തേടിയിട്ടുണ്ട്. സ്റ്റേഷന് പരിസരത്ത് ബാരിക്കേഡുകള് സ്ഥാപിക്കുന്നതും പരിഗണനയിലാണ്.
നിയന്ത്രണം വിട്ട ഓട്ടോറിക്ഷ പ്ലാറ്റ്ഫോമിലേക്ക് കയറി ട്രാക്കിലേക്ക് മറിയുകയായിരുന്നു എന്നാണ് പ്രാഥമിക നിഗമനം. കല്ലമ്പലം സ്വദേശിയായ ഡ്രൈവര് സുധി മദ്യലഹരിയിലായിരുന്നുവെന്ന് വിവരമുണ്ട്. അപകടത്തില് ഇയാള്ക്ക് പരിക്കേറ്റെങ്കിലും പരിക്ക് ഗുരുതരമല്ല. തിരുവനന്തപുരം ഭാഗത്തേക്ക് വരികയായിരുന്ന വന്ദേഭാരത് എക്സ്പ്രസാണ് അപകടത്തില്പ്പെട്ടത്. ട്രാക്കില് ഓട്ടോ കണ്ടതിനെത്തുടര്ന്ന് ലോക്കോ പൈലറ്റ് എമര്ജന്സി ബ്രേക്ക് ഇട്ടെങ്കിലും ഓട്ടോയിലിടിക്കുകയായിരുന്നു. എമര്ജന്സി ബ്രേക്കില്ലായിരുന്നുവെങ്കില് ഓട്ടോ തകരുമായിരുന്നു. ഇടിയില് തീവണ്ടിയും മറിയുമായിരുന്നു.