റെഡ് ഷർട്ട് ധരിച്ച് ആള് നല്ല കൂളായി കുറച്ച് കുപ്പികളുമായി എത്തി; ഒരു ടാപ്പിന്റെ മുന്നിലെത്തി ഇയാൾ ചെയ്തത്; ആരും കാണില്ലെന്ന് കരുതിയ ആ തുറന്ന കാഴ്ച കണ്ട് ഞെട്ടൽ; ആശങ്കപ്പെടുത്തുന്ന ചിത്രങ്ങൾ പുറത്ത്

ലക്നൗ: ഇന്ത്യൻ റെയിൽവേ യാത്രക്കാർക്ക് വിൽക്കുന്ന മിനറൽ വാട്ടർ കുപ്പികളുടെ ശുചിത്വത്തെക്കുറിച്ച് ഗുരുതരമായ ചോദ്യങ്ങൾ ഉയർത്തിക്കൊണ്ട്, പൊതുടാങ്കിൽനിന്ന് വെള്ളം നിറച്ച് വിൽക്കുന്ന ഒരാളുടെ വീഡിയോ ദൃശ്യങ്ങൾ സമൂഹ മാധ്യമങ്ങളിൽ വൈറലാവുകയാണ്. ഉത്തർപ്രദേശിലെ പണ്ഡിറ്റ് ദീൻ ദയാൽ ഉപാധ്യായ ജംഗ്ഷനിൽ നിന്നുള്ള ഈ ദൃശ്യങ്ങൾ റെയിൽവേ യാത്രക്കാരുടെ സുരക്ഷയെക്കുറിച്ചും അധികൃതരുടെ അലംഭാവത്തെക്കുറിച്ചും കടുത്ത വിമർശനങ്ങൾക്ക് വഴിവെച്ചിരിക്കുകയാണ്.

പൊതുജനങ്ങളുടെ ഉപയോഗത്തിനായി റെയിൽവേ സ്റ്റേഷനുകളിൽ സ്ഥാപിച്ചിട്ടുള്ള, പലപ്പോഴും മലിനമായ ടാങ്കിലെ പൈപ്പിൽനിന്ന് പ്ലാസ്റ്റിക് കുപ്പികളിലേക്ക് ഇയാൾ നേരിട്ട് വെള്ളം നിറയ്ക്കുന്നതാണ് വീഡിയോയുടെ ഉള്ളടക്കം. ഈ കുപ്പികൾ പിന്നീട് ട്രെയിനുകളിലും പ്ലാറ്റ്‌ഫോമുകളിലും യഥാർത്ഥ 'മിനറൽ വാട്ടർ' എന്ന വ്യാജേന യാത്രക്കാർക്ക് ഉയർന്ന വിലയ്ക്ക് വിൽക്കുന്നു. തികച്ചും മലിനമായ സാഹചര്യത്തിൽ, യാതൊരു സുരക്ഷാ മാനദണ്ഡങ്ങളുമില്ലാതെയാണ് ഈ തട്ടിപ്പ് അരങ്ങേറുന്നത്. വെള്ളം നിറയ്ക്കുന്ന ചുറ്റുപാടും ടാങ്കിന്റെ വൃത്തിയില്ലായ്മയും ദൃശ്യങ്ങളിൽ വ്യക്തമാണ്.

പ്രതിദിനം ലക്ഷക്കണക്കിന് യാത്രക്കാർ ആശ്രയിക്കുന്ന ഒരു പൊതുഗതാഗത സംവിധാനത്തിൽ ഇത്തരത്തിൽ ശുചിത്വമില്ലാത്ത വെള്ളം വിൽക്കുന്നത് ഗുരുതരമായ ആരോഗ്യപ്രശ്നങ്ങൾക്ക് കാരണമാകും. ഈ വീഡിയോ സാമൂഹിക മാധ്യമങ്ങളിൽ ചർച്ചയായതോടെ കാഴ്ചക്കാരിൽ വലിയ ആശങ്കയാണ് നിറച്ചത്. പലരും റെയിൽവേയുടെ അലംഭാവത്തെ രൂക്ഷമായി വിമർശിച്ചു.

വീഡിയോ ചിത്രീകരിക്കുന്നയാൾ തന്റെ ദൃശ്യങ്ങൾ പകർത്തുന്നത് ശ്രദ്ധയിൽപ്പെട്ടതോടെ വിൽപനക്കാരൻ പരിഭ്രാന്തനായി. ഇയാൾ ഉടൻതന്നെ വെള്ളം നിറയ്ക്കുന്നത് നിർത്തിവെക്കുകയും, ടാങ്കിന് സമീപം വെച്ചിരുന്ന നിറച്ച കുപ്പികൾ വാരിയെടുക്കുകയും ചെയ്തു. തുടർന്ന് പ്ലാറ്റ്‌ഫോമിൽനിന്ന് താഴേക്ക് ചാടി സ്റ്റേഷനിൽ നിർത്തിയിട്ടിരുന്ന മറ്റൊരു ട്രെയിനിനടുത്തേക്ക് ഓടിപ്പോകുന്നതും വീഡിയോയിൽ കാണാം. താൻ ചെയ്യുന്നത് കുറ്റകരമായ പ്രവൃത്തിയാണെന്ന പൂർണ്ണ ബോധ്യം ഇയാൾക്കുണ്ടായിരുന്നുവെന്ന് ഈ നടപടി സൂചിപ്പിക്കുന്നു.

റെഡ്ഡിറ്റ് അടക്കമുള്ള പ്ലാറ്റ്‌ഫോമുകളിൽ പങ്കുവെക്കപ്പെട്ട വീഡിയോയ്ക്ക് താഴെ, മലിനജലം കുടിക്കുന്നത് കോളറ, ടൈഫോയിഡ്, അതിസാരം തുടങ്ങിയ ഗുരുതരമായ ജലജന്യ രോഗങ്ങൾക്ക് കാരണമാകുമെന്ന് പലരും ചൂണ്ടിക്കാട്ടി. കുട്ടികളും പ്രായമായവരും വിദേശ സഞ്ചാരികളും അടക്കം ആശ്രയിക്കുന്ന ട്രെയിൻ യാത്രകളിൽ ഇത്തരം തട്ടിപ്പുകൾ പ്രോത്സാഹിപ്പിക്കുന്നത് വലിയ പൊതുജനാരോഗ്യ പ്രതിസന്ധി സൃഷ്ടിക്കും.

യാത്രക്കാരുടെ സുരക്ഷയ്ക്ക് മുൻതൂക്കം നൽകാനും, ഇത്തരം തട്ടിപ്പുകൾ നടത്തുന്ന വിൽപനക്കാർക്കും കരാറുകാർക്കുമെതിരെ ശക്തമായ നിയമനടപടികൾ സ്വീകരിക്കാനും റെയിൽവേ അധികൃതർ തയ്യാറാകണം എന്ന ശക്തമായ ആവശ്യം സമൂഹ മാധ്യമങ്ങളിൽ ഉയരുന്നുണ്ട്. റെയിൽവേ പ്രൊട്ടക്ഷൻ ഫോഴ്സിന്റെ (ആർ.പി.എഫ്.) നിരീക്ഷണത്തിലുള്ള പ്രദേശത്ത് പോലും ഇത്തരം അനധികൃത പ്രവർത്തനങ്ങൾ നടക്കുന്നു എന്നത് റെയിൽവേയുടെ വിജിലൻസ് സംവിധാനത്തിന്റെ പരാജയമായി കണക്കാക്കപ്പെടുന്നു.