യുഎസ് വൈസ് പ്രസിഡന്റ് ജെ.ഡി. വാന്സിന്റെ വീടിന് നേരെ വെടിവെപ്പ്; നിരവധി ജനാലകള് തകര്ന്നു: അക്രമിയെന്ന് സംശയിക്കുന്ന ഒരാള് കസ്റ്റഡിയില്
യുഎസ് വൈസ് പ്രസിഡന്റിന്റെ വീടിന് നേരെ വെടിവെപ്പ്
വാഷിങ്ടണ്: യുഎസ് വൈസ് പ്രസിഡന്റ് ജെ.ഡി. വാന്സിന്റെ വീടിന് നേരെ വെടിവെപ്പ്. ഒഹായോയിലുള്ള സിന്സിനാറ്റി വീടിനുനേര്ക്കാണ് ആക്രമണം ഉണ്ടായത്. വെടിവെപ്പില് വീടിന്റെ നിരവധി ജനാലകള് തകര്ന്നതായാണ് വിവരം. പ്രാദേശികസമയം തിങ്കളാഴ്ച പുലര്ച്ചെ 12.45 ഓടെയായിരുന്നു ആക്രമണം. ഇതിന്റെ ദൃശ്യങ്ങള് പ്രാദേശിക മാധ്യമങ്ങള് പുറത്തുവിട്ടു. സാമൂഹിക മാധ്യമങ്ങള് ഇതിന്റെ വീഡിയോകളും ചിത്രങ്ങളും പ്രചരിക്കുന്നുണ്ട്.
സംഭവവുമായി ബന്ധപ്പെട്ട് അക്രമിയെന്ന് സംശയിക്കുന്ന ഒരാളെ പോലീസ് കസ്റ്റഡിയില് എടുത്തതായി പ്രാദേശിക മാധ്യമങ്ങള് റിപ്പോര്ട്ട് ചെയ്തു. അക്രമി വീടിനകത്ത് കയറിയോ എന്നുള്ളത് വ്യക്തമായിട്ടില്ല. സംഭവസമയത്ത് ജെ.ഡി. വാന്സും കുടുംബവും വീട്ടില് ഉണ്ടായിരുന്നില്ലെന്നാണ് വിവരം. ആക്രമണത്തിന് പിന്നാലെ വാന്സിന്റെയും കുടുംബത്തിന്റെയും സുരക്ഷ ശക്തമാക്കി.
സംഭവത്തില് പോലീസ് അന്വേഷണം ആരംഭിച്ചിട്ടുണ്ട്. വൈസ് പ്രസിഡന്റ് ജെ.ഡി. വാന്സിനേയും കുടുംബത്തേയുമാണോ അക്രമി ലക്ഷ്യമിട്ടത് എന്നത് സംബന്ധിച്ചും അന്വേഷണം നടക്കുന്നുണ്ട്.