'സീറ്റ് ഉറപ്പില്ലെങ്കില് ഡല്ഹിക്ക് ഇല്ല' എന്ന കര്ക്കശമായ നിലപാടില് സുധാകരന്; ധര്മ്മടത്ത് പിണറായിക്കെതിരെ സുധാകരന് മത്സരിക്കുമോ? ഹൈക്കമാന്ഡ് നീക്കത്തിന് വഴങ്ങാതെ കണ്ണൂരിനായി ഉറച്ച് കെ.എസ്; കണ്ണൂരിലെ കോണ്ഗ്രസില് ആശയക്കുഴപ്പം തുടരുന്നു; കെ എസിനെ അനുനയിപ്പിക്കാന് കഴിയുമോ?
കണ്ണൂര്: നിയമസഭാ തെരഞ്ഞെടുപ്പില് കണ്ണൂര് മണ്ഡലം തന്നെ വേണമെന്ന ഉറച്ച നിലപാടില് കെ. സുധാകരന് എം.പി. എന്നാല്, മുഖ്യമന്ത്രി പിണറായി വിജയനെതിരെ ധര്മ്മടം മണ്ഡലത്തില് സുധാകരനെ അണിനിരത്തി പോരാട്ടം ശക്തമാക്കാനാണ് കോണ്ഗ്രസ് ഹൈക്കമാന്ഡ് ലക്ഷ്യമിടുന്നത്. എം.പിമാര് നിയമസഭയിലേക്ക് മത്സരിക്കേണ്ടെന്ന പൊതുനിര്ദ്ദേശത്തില് സുധാകരന് മാത്രം പ്രത്യേക ഇളവ് നല്കാന് ഹൈക്കമാന്ഡ് തയ്യാറാണെങ്കിലും, അത് വിജയസാധ്യതയുള്ള കണ്ണൂരിന് പകരമായി ധര്മ്മടത്ത് വേണമെന്ന ഉപാധിയാണ് നേതൃത്വം മുന്നോട്ടുവെക്കുന്നത്.
കോണ്ഗ്രസ് പ്രവര്ത്തകസമിതി അംഗം കൂടിയായ കെ. സുധാകരന് ധര്മ്മടത്ത് പിണറായി വിജയനെതിരെ ജനവിധി തേടുന്നത് സംസ്ഥാനമാകെ യു.ഡി.എഫ് തരംഗം സൃഷ്ടിക്കാന് സഹായിക്കുമെന്നാണ് ഹൈക്കമാന്ഡ് കണക്കുകൂട്ടല്. എന്നാല്, ഇടതുകോട്ടയായ ധര്മ്മടത്ത് മത്സരിക്കുന്നത് രാഷ്ട്രീയമായി തിരിച്ചടിയാകുമെന്ന് സുധാകരനെ അനുകൂലിക്കുന്നവര് ഭയപ്പെടുന്നു. കഴിഞ്ഞ തവണ 30,000-ത്തിലധികം വോട്ടുകള്ക്ക് പിണറായി വിജയന് വിജയിച്ച മണ്ഡലത്തില് സാഹസികമായ പോരാട്ടത്തിനില്ലെന്നാണ് സുധാകരന്റെ പക്ഷം.
നാട്ടിലേക്ക് മടങ്ങിയ സുധാകരനെ അനുനയിപ്പിക്കാന് മുതിര്ന്ന നേതാവ് രമേശ് ചെന്നിത്തല രംഗത്തെത്തി. വിവാദങ്ങളില് മാധ്യമങ്ങളോട് പ്രതികരിക്കരുതെന്നും രാഹുല് ഗാന്ധിയുമായുള്ള കൂടിക്കാഴ്ചയ്ക്കായി ഡല്ഹിയിലേക്ക് വരണമെന്നും ചെന്നിത്തല ആവശ്യപ്പെട്ടു. എന്നാല്, 'സീറ്റ് ഉറപ്പില്ലെങ്കില് ഡല്ഹിക്ക് ഇല്ല' എന്ന കര്ക്കശമായ നിലപാടിലാണ് സുധാകരന്. നിലവില് കണ്ണൂര് നടാലിലെ വീട്ടില് തുടരുന്ന സുധാകരനെ കാണാന് വിവിധ ജില്ലകളില് നിന്ന് അനുയായികള് എത്തുന്നുണ്ട്. പ്രവര്ത്തകരെ പ്രകോപിപ്പിച്ചു തെരുവിലിറക്കരുതെന്ന് ഹൈക്കമാന്ഡ് സുധാകരന് കര്ശന നിര്ദ്ദേശം നല്കിയിട്ടുണ്ട്.
അതേസമയം, കോണ്ഗ്രസിനുള്ളില് തര്ക്കം രൂക്ഷമാകുന്നതിനിടെ കെ.പി.സി.സി അധ്യക്ഷന് സണ്ണി ജോസഫും പ്രതിപക്ഷ നേതാവ് വി.ഡി. സതീശനും നിലപാട് വ്യക്തമാക്കിയിട്ടുണ്ട്. ആരും സ്വയം സ്ഥാനാര്ത്ഥിത്വം പ്രഖ്യാപിക്കേണ്ടതില്ലെന്നും പാര്ട്ടി തീരുമാനിക്കുന്നവരാണ് സ്ഥാനാര്ത്ഥികളെന്നും വി.ഡി. സതീശന് പറഞ്ഞു. സുധാകരന് സ്ഥാനാര്ത്ഥിത്വം ഉറപ്പുകൊടുക്കാന് താന് വലിയ നേതാവല്ലെന്നാണ് കെ.പി.സി.സി അധ്യക്ഷന് സണ്ണി ജോസഫ് പ്രതികരിച്ചത്.
സുധാകരനെ അനുകൂലിച്ച് സംസ്ഥാനത്തിന്റെ വിവിധ ഭാഗങ്ങളില് പോസ്റ്ററുകളും ഫ്ലക്സുകളും ഉയരുന്നുണ്ട്. വി.ഡി. സതീശന്റെ ഓഫീസിന് സമീപം ഉള്പ്പെടെ 'രാഹുല് ഗാന്ധിയുടെ വാക്ക് പാലിക്കപ്പെടണം' എന്ന തലക്കെട്ടില് പോസ്റ്ററുകള് പ്രത്യക്ഷപ്പെട്ടു. രാഹുല് ഗാന്ധി നല്കിയ ഉറപ്പ് പാലിക്കണമെന്നും 140 മണ്ഡലങ്ങളില് എവിടെയും മത്സരിക്കാന് സുധാകരന് ചങ്കുറപ്പുണ്ടെന്നും പോസ്റ്ററുകള് പറയുന്നു.
സ്ഥാനാര്ത്ഥി നിര്ണ്ണയം അവസാനഘട്ടത്തിലേക്ക് നീങ്ങുമ്പോള് കണ്ണൂരിലെ ഈ 'സുധാകരന് കടങ്കഥ' കോണ്ഗ്രസിനും ഹൈക്കമാന്ഡിനും വലിയ തലവേദനയാണ് സൃഷ്ടിക്കുന്നത്.