തദ്ദേശ തിരഞ്ഞെടുപ്പ്: വോട്ട് ചെയ്യാന് തിരിച്ചറിയല് രേഖ കരുതണം; രാവിലെ 7 മുതല് വൈകിട്ട് 6 വരെ വോട്ടെടുപ്പ്; വൈകുന്നേരം 6 വരെ പോളിംഗ് സ്റ്റേഷനില് വോട്ട് ചെയ്യാനെത്തിയ മുഴുവന് പേര്ക്കും വോട്ട് ചെയ്യാന് അവസരം; നോട്ടയും വിവിപാറ്റും ഇല്ലെന്ന് സംസ്ഥാന തിരഞ്ഞെടുപ്പ് കമ്മീഷന്
തദ്ദേശ തിരഞ്ഞെടുപ്പ്: വോട്ട് ചെയ്യാന് തിരിച്ചറിയല് രേഖ കരുതണം
തിരുവനന്തപുരം: തദ്ദേശ തിരഞ്ഞെടുപ്പില് സുതാര്യമായ രീതിയില് വോട്ട് ചെയ്യുന്നതിനായി സമ്മതിദായകന് തിരിച്ചറിയല് രേഖ കൈയ്യില് കരുതണമെന്ന് സംസ്ഥാന തിരഞ്ഞെടുപ്പ് കമ്മീഷന് അറിയിച്ചു. കേന്ദ്ര തിരഞ്ഞെടുപ്പ് കമ്മീഷന് നല്കിയിട്ടുള്ള വോട്ടര് തിരിച്ചറിയല് കാര്ഡ്, സംസ്ഥാന തിരഞ്ഞെടുപ്പ് കമ്മീഷന് നല്കിയിട്ടുള്ള വോട്ടര് സ്ലിപ്പ്, പാസ്സ്പോര്ട്ട്, ഡ്രൈവിംഗ് ലൈസന്സ്, പാന് കാര്ഡ്, ആധാര് കാര്ഡ്, ഫോട്ടോ പതിച്ച എസ്.എസ്.എല്.സി സര്ട്ടിഫിക്കറ്റ്/ബുക്ക് ഏതെങ്കിലും ദേശസാല്കൃത ബാങ്കില് നിന്നും തിരഞ്ഞെടുപ്പ് തീയതിക്ക് ആറു മാസക്കാലയളവിന് മുന്പ് വരെ നല്കിയിട്ടുള്ള ഫോട്ടോ പതിച്ച പാസ് ബുക്ക് എന്നിവയില് ഏതെങ്കിലും ഒരെണ്ണം തിരിച്ചറിയല് രേഖയായി ഹാജരാക്കാം.
തദ്ദേശ തിരഞ്ഞെടുപ്പ് : വോട്ടര്മാര് നടപടിക്രമങ്ങള് പാലിക്കണം
തദ്ദേശ തിരഞ്ഞെടുപ്പ് വോട്ടെടുപ്പ് ദിവസം വോട്ടര്മാര് വോട്ടിങ് നടപടിക്രമങ്ങള് കൃത്യമായി പാലിച്ച് വോട്ടവകാശം വിനിയോഗിക്കണമെന്ന് സംസ്ഥാന തിരഞ്ഞെടുപ്പ് കമ്മീഷണര് എ ഷാജഹാന് അഭ്യര്ത്ഥിച്ചു.
വോട്ടര് പോളിംഗ് ബൂത്തില് പ്രവേശിച്ചു കഴിഞ്ഞാല് അവരുടെ തിരിച്ചറിയല് രേഖയും വോട്ടര്പട്ടികയിലെ പേരും വിവരങ്ങളും പോളിംഗ് ഉദ്യോഗസ്ഥന് പരിശോധിക്കും. തുടര്ന്ന് രണ്ടാമത്തെ പോളിംഗ് ഓഫീസറുടെ അടുത്ത് ചെല്ലുമ്പോള് വോട്ടറുടെ കൈവിരലില് മഷി പുരട്ടി, വോട്ട് രജിസ്റ്ററില് ഒപ്പോ വിരലടയാളമോ രേഖപ്പെടുത്തി വോട്ടിങ് സ്ലിപ്പ് നല്കും. സ്ലിപ്പുമായി വോട്ടിംഗ് യന്ത്രത്തിന്റെ ചുമതലയുള്ള ഓഫീസറുടെ മുന്പിലെത്തി സ്ലിപ്പ് ഏല്പ്പിക്കണം. ഉദ്യോഗസ്ഥന് കണ്ട്രോള് യൂണിറ്റിലെ ബട്ടണ് അമര്ത്തി ബാലറ്റ് യൂണിറ്റുകള് വോട്ടിംഗിന് സജ്ജമാക്കും. തുടര്ന്ന് സമ്മതിദായകന് വോട്ടിങ് കമ്പാര്ട്ട്മെന്റിലേക്ക് നീങ്ങണം. ബാലറ്റ് യൂണിറ്റില് ഏറ്റവും മുകളില് ഇടതുഭാഗത്തായി പച്ചനിറത്തിലുള്ള ഓരോ ചെറിയ ലൈറ്റ് തെളിഞ്ഞു നില്ക്കുന്നതു കാണാനാകും. ഇത് ബാലറ്റ് യൂണിറ്റുകള് വോട്ടു രേഖപ്പെടുത്താന് തയാറാണെന്ന് സൂചിപ്പിക്കുന്നു. സ്ഥാനാര്ത്ഥിയുടെ ചിഹ്നത്തിനു നേരെയുള്ള ബട്ടണില് വിരല് അമര്ത്തിയാല് ദീര്ഘമായ ബീപ് ശബ്ദം കേള്ക്കുകയും വോട്ട് രേഖപ്പെടുത്തല് പൂര്ണ്ണമാവുകയും ചെയ്യും. ശേഷം വോട്ടര്ക്ക് മടങ്ങാവുന്നതാണ്.
കോര്പ്പറേഷന്, മുന്സിപ്പാലിറ്റി എന്നിവിടങ്ങളിലെ വോട്ടര് ഒരു വോട്ടുമാത്രം ചെയ്താല് മതി. ത്രിതല പഞ്ചായത്തില് ഒരു വോട്ടര് ഗ്രാമ, ബ്ലോക്ക്, ജില്ലാ പഞ്ചായത്ത് തലങ്ങളിലേയ്ക്ക് ഓരോ വോട്ട് വീതം ആകെ മൂന്ന് വോട്ടുകള് രേഖപ്പെടുത്തണം. വോട്ടിംഗ് കംപാര്ട്ട്മെന്റിലെ മൂന്ന് ബാലറ്റ് യൂണിറ്റുകള് ഗ്രാമപഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്ത് എന്നീ ക്രമത്തിലാണ് സജ്ജീകരിച്ചിരിക്കുന്നത്. ആദ്യത്തെ ബാലറ്റ് യൂണിറ്റില് ഗ്രാമപഞ്ചായത്തിലെ സ്ഥാനാര്ത്ഥികളുടെ പേരും ചിഹ്നവും അടങ്ങുന്ന വെള്ളനിറത്തിലുള്ള ലേബലും, രണ്ടാമത്തെ ബ്ലോക്ക് തലത്തിലേക്കുള്ള ബാലറ്റ് യൂണിറ്റില് പിങ്ക് നിറത്തിലുള്ള ലേബലും ജില്ലാ തലത്തിലേക്കുള്ള ബാലറ്റ് യൂണിറ്റില് ഇളംനീല നിറത്തിലുള്ള ലേബലുമാണ് പതിച്ചിരിക്കുന്നത്. ഇത്തരത്തില് മൂന്ന് തലത്തിലേക്കുമുള്ള ബാലറ്റ് യൂണിറ്റുകളിലും ക്രമമായി വോട്ട് രേഖപ്പെടുത്തിക്കഴിയുമ്പോള് ഒരു നീണ്ട ബീപ് ശബ്ദം കേട്ട് വോട്ട് രേഖപ്പെടുത്തല് പൂര്ണമാകും.
ഏതെങ്കിലും ഒന്നോ അതിലധികമോ തലത്തിലെ ബാലറ്റ് യൂണിറ്റില് വോട്ട് രേഖപ്പെടുത്താന് താത്പര്യമില്ലാത്തപക്ഷം താത്പര്യമുള്ള തലത്തിലെ വോട്ട് രേഖപ്പെടുത്തിയശേഷം അവസാനത്തെ ബാലറ്റ് യൂണിറ്റിലെ അവസാന ബട്ടണ് (END ബട്ടണ്, ഇത് ചുവപ്പ് നിറത്തിലുള്ളതാണ്) അമര്ത്തി വോട്ടിംഗ് പൂര്ത്തിയാക്കാം. വോട്ട് രേഖപ്പെടുത്തല് പൂര്ണമാകുമ്പോള് നീണ്ട ഒരു ബീപ് ശബ്ദം കേള്ക്കാനാകും. മൂന്ന് തലത്തിലേയും വോട്ട് രേഖപ്പെടുത്തിക്കഴിഞ്ഞിട്ടുണ്ടെങ്കില് END ബട്ടണ് അമര്ത്തേണ്ട ആവശ്യമില്ല. END ബട്ടണ് അമര്ത്തിക്കഴിഞ്ഞാല് ആ വോട്ടര്ക്ക് പിന്നീട് വോട്ട് ചെയ്യുവാനാകില്ല.
ഒരേ സമയം ഒന്നില് കൂടുതല് ബട്ടണ് അമര്ത്തിയാലും ഒരു വോട്ട് മാത്രമേ രേഖപ്പെടുത്തുകയുള്ളൂ. അത് പോലെ ഒന്നില് കൂടുതല് തവണ ഒരേ ബട്ടണില് അമര്ത്തിയാലും ഒരു വോട്ട് മാത്രമാണ് രേഖപ്പെടുത്തുക.
വോട്ട് ചെയ്യുന്നതിനുള്ള രഹസ്യസ്വഭാവം കാത്ത് സൂക്ഷിക്കാന് ഓരോ വോട്ടറും ബാധ്യസ്ഥരാണ്. വോട്ടര്മാര്ക്ക് എന്തെങ്കിലും സംശയമോ പ്രയാസമോ അനുഭവപ്പെടുന്നുവെങ്കില് പ്രിസൈഡിംഗ് ഓഫീസറുടെ സഹായം തേടാവുന്നതാണ്. വോട്ട് രേഖപ്പെടുത്തിക്കഴിഞ്ഞാല് അടുത്ത ആളിന് വോട്ട് ചെയ്യാനായി എത്രയും വേഗം വോട്ടിംഗ് കമ്പാര്ട്ട്മെന്റില് നിന്നും വോട്ടര് പുറത്തു കടക്കണം.
തിരഞ്ഞെടുപ്പ് സുഗമമാക്കാന് ഏവരും സഹകരിക്കണം : തിരഞ്ഞെടുപ്പ് കമ്മീഷണര്
തദ്ദേശ പൊതുതിരഞ്ഞെടുപ്പിലെ സുതാര്യവും സുഗമവുമായ പോളിംഗിന് രാഷ്ട്രീയ കക്ഷികളും സ്ഥാനാര്ത്ഥികളും തിരഞ്ഞെടുപ്പ് ഉദ്യോഗസ്ഥരുമായി സഹകരിക്കണമെന്ന് സംസ്ഥാന തിരഞ്ഞെടുപ്പ് കമ്മീഷണര് എ ഷാജഹാന് നിര്ദ്ദേശിച്ചു. സമ്മതിദായകര്ക്ക് നിര്ഭയമായും സ്വതന്ത്രമായും വോട്ട് ചെയ്യാനുള്ള സാഹചര്യം ഒരുക്കണം.തിരഞ്ഞെടുപ്പു പ്രവര്ത്തനത്തില് ഏര്പ്പെട്ടിരിക്കുന്ന രാഷ്ട്രീയ പാര്ട്ടിയുടെ പ്രവര്ത്തകര്ക്ക് ബാഡ്ജുകളും തിരിച്ചറിയല് കാര്ഡുകളും ഉണ്ടാകണം. വോട്ടര്മാര്ക്ക് വിതരണം ചെയ്യുന്ന സ്ലിപ്പുകള് വെള്ളക്കടലാസിലായിരിക്കണം. അവയില് സ്ഥാനാര്ത്ഥിയുടെയോ കക്ഷിയുടെയോ പേരോ ചിഹ്നമോ ഉണ്ടാകരുത്. രാഷ്ട്രീയ കക്ഷികളോ സ്ഥാനാര്ത്ഥികളോ വോട്ടര്മാരെ പോളിംഗ് സ്റ്റേഷനില് എത്തിക്കാന് വാഹന സൗകര്യം ഒരുക്കുന്നത് കുറ്റകരമാണ്.
തിരഞ്ഞെടുപ്പ് നിരീക്ഷകന്, വരണാധികാരി, സുരക്ഷാ ഉദ്യോഗസ്ഥര്, പ്രിസൈഡിംഗ് ഓഫീസര്, വെബ് കാസ്റ്റിംഗ് ഓഫീസര്, സെക്ടറല് ഓഫീസര് എന്നിവര്ക്കൊഴികെ ആര്ക്കും പോളിംഗ് സ്റ്റേഷനകത്ത് മൊബൈല് ഫോണ് ഉപയോഗിക്കുന്നത് അനുവദനീയമല്ല. വോട്ടെടുപ്പ് ദിവസം പഞ്ചായത്തുകളില് പോളിംഗ് സ്റ്റേഷനില് നിന്ന് 200 മീറ്റര് അകലത്തിലും നഗരസഭകളില് 100 മീറ്റര് അകലത്തിലും മാത്രമേ രാഷ്ട്രീയ പാര്ട്ടികളുടെ ബൂത്തുകള് സ്ഥാപിക്കാവൂ. സ്ഥാനാര്ത്ഥിയുടെ പേര്, പാര്ട്ടിചിഹ്നം എന്നിവ വ്യക്തമാക്കുന്ന ഒരു ബാനര് സ്ഥാപിക്കാം. പഞ്ചായത്തുകളിലെ പോളിംഗ് സ്റ്റേഷനുകളുടെ 200 മീറ്റര് പരിധിക്കുള്ളിലും നഗരസഭകളില് 100 മീറ്റര് പരിധിക്കുള്ളിലും വോട്ട് പിടിക്കാനോ പ്രചാരണം നടത്താനോ പാടില്ല. രാഷ്ട്രീയ കക്ഷികളുടെ പേരോ ചിഹ്നമോ ഉള്ള മാസ്ക്, വസ്ത്രം, തൊപ്പി എന്നിവ ഈ പരിധിക്കുള്ളില് ഉപയോഗിക്കാന് പാടില്ല. എല്ലാവരും ഹരിതചട്ടം പാലിക്കാന് ശ്രദ്ധിക്കണമെന്നും കമ്മീഷണര് ആവശ്യപ്പെട്ടു.
സ്ഥാനാര്ത്ഥികളുടെ ക്യാമ്പുകള് ഹരിതചട്ടം പാലിച്ചാകണം. സംഘര്ഷം ഒഴിവാക്കുന്നതിനായി ബൂത്തുകള്ക്ക് സമീപവും രാഷ്ട്രീയ കക്ഷികളുടെയും സ്ഥാനാര്ത്ഥികളുടെയും ക്യാമ്പിന്റെ പരിസരത്തും ആള്ക്കൂട്ടം ഒഴിവാക്കണം. വോട്ടെടുപ്പ് ദിവസം സ്ഥാനാര്ത്ഥികളും ഏജന്റുമാരും വാഹനങ്ങള് ഉപയോഗിക്കുന്നതിനുള്ള നിയന്ത്രണം പാലിക്കണം. പെര്മിറ്റുകള് വാഹനങ്ങളില് പ്രദര്ശിപ്പിക്കണമെന്നും കമ്മീഷണര് നിര്ദേശിച്ചു.
തദ്ദേശ തിരഞ്ഞെടുപ്പ്: പോളിങ് സ്റ്റേഷന് പ്രവേശനത്തിന് നിയന്ത്രണമുണ്ട്
തദ്ദേശ സ്ഥാപനങ്ങളിലേക്കുള്ള വോട്ടെടുപ്പ് ദിവസത്തില് പോളിങ് സ്റ്റേഷനില് പ്രവേശിക്കാന് കര്ശന നിയന്ത്രണമുണ്ട്. വോട്ടിങ്ങിന് അര്ഹതയുള്ള സമ്മതിദായകര്, പോളിങ് ഓഫീസര്മാര്, സ്ഥാനാര്ത്ഥി, സ്ഥാനാര്ത്ഥിയുടെ തിരഞ്ഞെടുപ്പ് ഏജന്റ്, സ്ഥാനാര്ത്ഥിയുടെ ഒന്ന് വീതം പോളിങ് ഏജന്റ്, തിരഞ്ഞെടുപ്പ് കമ്മീഷന് അധികാരപ്പെടുത്തിയിട്ടുള്ളവര്, തിരഞ്ഞെടുപ്പുമായി ബന്ധപ്പെട്ട ഡ്യൂട്ടിയിലുള്ള ഉദ്യോഗസ്ഥര്, കമ്മിഷന് നിയോഗിച്ചിട്ടുള്ള നിരീക്ഷകര്, സമ്മതിദായകന്റെ ഒപ്പമുള്ള കൈക്കുഞ്ഞ്, പരസഹായം കൂടാതെ സഞ്ചരിക്കാന് കഴിയാത്ത അന്ധതയോ അവശതയോയുള്ള സമ്മതിദായകനോടൊപ്പം അനുവദിക്കപ്പെടുന്ന പ്രായപൂര്ത്തിയായ വ്യക്തി, സമ്മതിദായകരെ തിരിച്ചറിയുന്നതിനോ വോട്ടെടുപ്പ് നടത്തുന്നതിന് മറ്റു വിധത്തില് സഹായിക്കുന്നതിനോ പ്രിസൈഡിങ് ഓഫീസര് പ്രവേശിപ്പിക്കുന്നവര് എന്നിവരെ മാത്രമേ പോളിങ് സ്റ്റേഷനില് പ്രവേശിപ്പിക്കുകയുള്ളു.
പ്രിസൈഡിങ് ഓഫീസര്മാര്ക്കാണ് ഇതിനുള്ള പൂര്ണ്ണ അധികാരവും ഉത്തരവാദിത്തവുമെന്ന് സംസ്ഥാന തിരഞ്ഞെടുപ്പ് കമ്മീഷന് അറിയിച്ചു. സമ്മതിദായകനല്ലാത്തതോ വോട്ടെടുപ്പ് നടത്തുന്നതില് പ്രിസൈഡിങ് ഓഫീസറെ സഹായിക്കാന് ചുമതലപ്പെട്ടവരോ അല്ലാത്ത ആരെയും പോളിങ് സ്റ്റേഷനില് കടക്കുവാന് അനുവദിക്കുന്നതല്ല.
ഒന്നിലധികം വോട്ട് ചെയ്യുന്നതും, ആള്മാറാട്ടം നടത്തുന്നതും ശിക്ഷാര്ഹം
ഏതെങ്കിലും കാരണവശാല് ഒരാളുടെ പേര് ഒന്നിലധികം വോട്ടര്പട്ടികകളിലോ, ഒരു വോട്ടര്പട്ടികയില് തന്നെ ഒന്നിലധികം പ്രാവശ്യമോ ഉള്പ്പെട്ടിട്ടുണ്ടെങ്കിലും ഒരു വോട്ട് മാത്രമേ ചെയ്യാന് പാടുള്ളൂ. ഒരാളുടെ പേര് ഒന്നിലധികം പ്രാവശ്യം ഉള്പ്പെട്ടിട്ടുണ്ടെങ്കില് പോലും അയാള് ഒന്നിലധികം വോട്ട് ചെയ്യുന്നത് കുറ്റകരമാണ്. അവര്ക്കെതിരെ കര്ശനനിയമനടപടി സ്വീകരിക്കുമെന്ന് സംസ്ഥാന തിരഞ്ഞെടുപ്പ് കമ്മീഷണര് എ ഷാജഹാന് അറിയിച്ചു.
അതുപോലെ വോട്ടു ചെയ്യാന് ഹാജരാകാത്തവരുടെയും മരണപ്പെട്ടവരുടെയും സ്ഥലത്തില്ലാത്തവരുടെയും വോട്ട് ആള്മാറാട്ടത്തിലൂടെ രേഖപ്പെടുത്തുന്നവര് ക്കെതിരെയും കര്ശന നിയമനടപടി സ്വീകരിക്കുന്നതാണ്. അത്തരം കുറ്റക്കാരെ പോലീസിന് കൈമാറുന്നതാണ്. കുറ്റക്കാരന് ഭാരതീയ ന്യായസംഹിതയിലെ 174 വകുപ്പ് പ്രകാരം ഒരു വര്ഷം വരെ തടവുശിക്ഷയ്ക്കും പിഴശിക്ഷയ്ക്കും അര്ഹനാണ്.
തദ്ദേശ തിരഞ്ഞെടുപ്പ്: വോട്ടിങ് സമയം ശ്രദ്ധിക്കണം
തദ്ദേശ തിരഞ്ഞെടുപ്പ് വോട്ടെടുപ്പ് സമയക്രമം സമ്മതിദായകര് ശ്രദ്ധിക്കണമെന്ന് സംസ്ഥാന തിരഞ്ഞെടുപ്പ് കമ്മീഷന് അറിയിച്ചു. രാവിലെ 7 മുതല് വൈകിട്ട് 6 വരെയാണ് വോട്ടെടുപ്പ്. വൈകുന്നേരം 6 വരെ പോളിംഗ് സ്റ്റേഷനില് വോട്ട് ചെയ്യാനെത്തിയ മുഴുവന് പേര്ക്കും വോട്ട് ചെയ്യാന് അവസരം നല്കും.
വോട്ടെടുപ്പ് അവസാനിപ്പിക്കാന് നിശ്ചയിച്ച സമയത്തിന് പോളിങ് സ്റ്റേഷനില് ക്യൂവില് നില്ക്കുന്ന എല്ലാവരെയും വോട്ട് ചെയ്യാന് അനുവദിക്കും. ഇവര്ക്ക് പ്രിസൈഡിങ് ഓഫീസര് ഒപ്പിട്ട സ്ലിപ്പ് നല്കും. ഏറ്റവും അവസാനത്തെ ആള്ക്ക് ഒന്ന് എന്ന ക്രമത്തിലാണ് സ്ലിപ് നല്കുക. വോട്ടെടുപ്പ് അവസാനിപ്പിക്കുന്നതിനുള്ള സമയം കഴിഞ്ഞാലും ക്യൂവിലുള്ള സമ്മതിദായകര് എല്ലാവരും വോട്ട് ചെയ്തു കഴിയുന്നതു വരെ വോട്ടെടുപ്പ് തുടരും.
തദ്ദേശ തിരഞ്ഞെടുപ്പില് നോട്ടയും വിവിപാറ്റും ഇല്ല
തദ്ദേശ തിരഞ്ഞെടുപ്പിനുള്ള വോട്ടിങ് മെഷീനില് നോട്ട (NOTA) രേഖപ്പെടുത്താന് കഴിയില്ല. അതുപോലെ വിവിപാറ്റ് മെഷീനുമുണ്ടാകില്ല.