പോരില് മികച്ചവര് ഞങ്ങളെങ്കിലും ഇനി അമേരിക്കയെ കാത്തിരിക്കേണ്ട, സ്വന്തം കാര്യം നോക്കിക്കോ! ഇന്ധനം ഒന്നുകില് യുഎസില് നിന്ന് വാങ്ങുക, അല്ലെങ്കില് ഹോര്മുസില് പോയി യുദ്ധം ചെയ്ത് നേടുക; യുകെ അടക്കമുള്ള രാജ്യങ്ങളെ കൈവിട്ട് ട്രംപ്; ഏപ്രില് 6-ന് മുന്പ് എന്ത് സംഭവിക്കും? ഹോര്മുസില് കപ്പലുകള്ക്ക് ടോളുമായി വിരട്ടലില് വീഴാതെ ഇറാന്; കലിപൂണ്ട് ഗള്ഫ് രാജ്യങ്ങള്
യുകെ അടക്കമുള്ള രാജ്യങ്ങളെ കൈവിട്ട് ട്രംപ്
വാഷിംഗ്ടണ്: പശ്ചിമേഷ്യയില്, യുദ്ധം രൂക്ഷമാവുകയും ഇന്ധനവില കുതിച്ചുയരുകയും ചെയ്യുന്ന സാഹചര്യത്തില് സഖ്യകക്ഷികളെ പരസ്യമായി വിമര്ശിച്ചും വെല്ലുവിളിച്ചും യുഎസ് പ്രസിഡന്റ് ഡോണള്ഡ് ട്രംപ്. ഇറാനെതിരായ സൈനിക നീക്കത്തില് അമേരിക്കയെ സഹായിക്കാത്ത രാജ്യങ്ങള് ഇനി സ്വന്തം നിലയ്ക്ക് ഇന്ധനം കണ്ടെത്തണമെന്ന് ട്രംപ് വ്യക്തമാക്കി. ഒന്നുകില് അമേരിക്കയില് നിന്ന് എണ്ണ വാങ്ങുക, അല്ലെങ്കില് ഇറാന് ഉപരോധം ഏര്പ്പെടുത്തിയിരിക്കുന്ന ഹോര്മുസ് കടലിടുക്കില് പോയി പോരാടി ഇന്ധനം പിടിച്ചെടുക്കുക എന്നതാണ് ട്രംപ് മുന്നോട്ടുവെക്കുന്ന പോംവഴി.
സഖ്യകക്ഷികള്ക്കെതിരെ രൂക്ഷവിമര്ശനം
ഇറാനെതിരായ യുദ്ധത്തില് പങ്കുചേരാനുള്ള തന്റെ ആഹ്വാനം നിരസിച്ച സഖ്യകക്ഷികളെയാണ് അദ്ദേഹം രൂക്ഷമായി വിമര്ശിച്ചത്. രാജ്യങ്ങള് സ്വന്തമായി പോരാടാന് പഠിക്കണമെന്നും എല്ലായ്പ്പോഴും സഹായിക്കാന് അമേരിക്ക കൂടെയുണ്ടാകില്ലെന്നും വ്യക്തമാക്കി.
'ഹോര്മുസ് കടലിടുക്കിലെ തടസ്സം കാരണം വിമാന ഇന്ധനം ലഭിക്കാത്ത, ഇറാന്റെ തകര്ച്ചയ്ക്കായുള്ള നീക്കങ്ങളില് സഹകരിക്കാന് വിസമ്മതിച്ച യുകെ ഉള്പ്പെടെയുള്ള രാജ്യങ്ങളോട് എനിക്ക് ചില നിര്ദ്ദേശങ്ങളുണ്ട്: ഒന്ന്, യുഎസില് നിന്ന് വാങ്ങുക, ഞങ്ങളുടെ പക്കല് ധാരാളമുണ്ട്. രണ്ട്, കുറച്ച് വൈകിയാണെങ്കിലും അല്പം ധൈര്യം സംഭരിച്ച് കടലിടുക്കിലേക്ക് പോയി അത് ' പിടിച്ചെടുക്കുക',' അദ്ദേഹം സോഷ്യല് മീഡിയ പോസ്റ്റില് കുറിച്ചു.
ഫെബ്രുവരി 28-ന് അമേരിക്ക പരിമിതമായ സൈനിക നീക്കം ആരംഭിച്ചതിന് തൊട്ടുപിന്നാലെയാണ് ആഗോള എണ്ണ വിതരണത്തിന്റെ 20 ശതമാനത്തോളം കൈകാര്യം ചെയ്യുന്ന പ്രധാന ജലപാതയായ ഹോര്മുസ് കടലിടുക്ക് ഇറാന് ഉപരോധിച്ചത്. ഇത് രൂക്ഷമായ ഇന്ധന പ്രതിസന്ധിക്ക് കാരണമാവുകയും നേരത്തെ ബാരലിന് 75 ഡോളറായിരുന്ന ക്രൂഡ് ഓയില് വില 100 ഡോളറിന് മുകളിലേക്ക് കുതിച്ചുയരാന് ഇടയാക്കുകയും ചെയ്തു.
വിരട്ടിയിട്ടും ഹോര്മുസ് തുറന്നില്ല
ഇറാന് കടുത്ത മുന്നറിയിപ്പുകള് നല്കിയിട്ടും ഹോര്മുസ് കടലിടുക്ക് തുറപ്പിക്കാന് ട്രംപിന് ഇതുവരെ സാധിച്ചിട്ടില്ല. ഈ പാത സുരക്ഷിതമാക്കാന് യുദ്ധക്കപ്പലുകള് വിന്യസിക്കണമെന്ന് അദ്ദേഹം സഖ്യകക്ഷികളോട് ആവശ്യപ്പെട്ടെങ്കിലും പ്രധാന രാജ്യങ്ങളൊന്നും അനുകൂലമായി പ്രതികരിച്ചില്ല. ഇതോടെ രോഷം കടുപ്പിച്ച ട്രംപ്, പ്രതിസന്ധി നേരിടുന്ന രാജ്യങ്ങള് ഇനി സ്വന്തം കാര്യം നോക്കിക്കൊള്ളണം എന്ന് വ്യക്തമാക്കി. 'നിങ്ങള് സ്വന്തമായി പോരാടാന് ശീലിക്കണം, നിങ്ങള് ഞങ്ങളെ സഹായിക്കാതിരുന്നതുപോലെ ഇനിമുതല് അമേരിക്ക നിങ്ങളെ സഹായിക്കാന് ഉണ്ടാകില്ല,' അദ്ദേഹം പറഞ്ഞു.
ഇറാന്റെ ശക്തി ഏതാണ്ട് പൂര്ണ്ണമായും നശിപ്പിക്കപ്പെട്ടുവെന്നും പ്രയാസകരമായ ജോലികള് പൂര്ത്തിയായെന്നും അവകാശപ്പെട്ട ട്രംപ്, 'ഇനി നിങ്ങളുടെ എണ്ണ നിങ്ങള് തന്നെ പോയി എടുത്തോളൂ' എന്ന് രാജ്യങ്ങളെ വെല്ലുവിളിച്ചു. ഹോര്മുസ് കടലിടുക്കിലൂടെ കടന്നുപോകുന്ന കപ്പലുകളില് നിന്ന് ഇറാന്റെ ദേശീയ കറന്സിയില് ടോള് ഈടാക്കാനുള്ള നിര്ദ്ദേശം ഇറാന്റെ പാര്ലമെന്ററി കമ്മിറ്റി അംഗീകരിച്ചതായുള്ള റിപ്പോര്ട്ടുകള്ക്കിടയിലാണ് ട്രംപിന്റെ ഈ പരാമര്ശങ്ങള് വരുന്നത്. അമേരിക്കയുമായും ഇസ്രായേലുമായും ബന്ധമുള്ള കപ്പലുകള്ക്ക് കര്ശന നിയന്ത്രണമേര്പ്പെടുത്താനും ഇറാനെതിരെ ഉപരോധം ഏര്പ്പെടുത്തിയ രാജ്യങ്ങളുടെ കപ്പലുകളെ തടയാനും ഈ പദ്ധതി ലക്ഷ്യമിടുന്നു.
തിങ്കളാഴ്ച, ട്രംപ് വീണ്ടും ഇറാന് മുന്നറിയിപ്പ് നല്കി. ഇറാന് സമാധാന കരാറിന് തയ്യാറാവുകയും കടലിടുക്ക് തുറന്നുകൊടുക്കുകയും ചെയ്തില്ലെങ്കില് അവിടുത്തെ ഊര്ജ്ജ നിലയങ്ങള് അമേരിക്ക തകര്ക്കും. ഇറാന്റെ പ്രധാന എണ്ണക്കയറ്റുമതി കേന്ദ്രമായ ഖാര്ഗ് ദ്വീപിനെ അമേരിക്ക വീണ്ടും ലക്ഷ്യമിടുമെന്നും അദ്ദേഹം വ്യക്തമാക്കി.
ഹോര്മുസ് കടലിടുക്ക് തുറക്കുന്നതിനായി ഏപ്രില് 6-ന് മുന്പ് ഇറാനുമായി ഒരു കരാറിലെത്താനാണ് ട്രംപ് ആഗ്രഹിക്കുന്നതെന്ന് വൈറ്റ് ഹൗസ് നേരത്തെ അറിയിച്ചിരുന്നു. എന്നാല്, കടലിടുക്ക് ഭാഗികമായി അടഞ്ഞുകിടക്കുകയാണെങ്കില് പോലും ഇറാനെതിരെയുള്ള സൈനിക നീക്കം അവസാനിപ്പിക്കാന് ട്രംപ് തയ്യാറാണെന്നും, കടലിടുക്ക് തുറക്കാനുള്ള സങ്കീര്ണ്ണമായ ദൗത്യം പിന്നീടത്തേക്ക് മാറ്റിവെക്കാന് അദ്ദേഹം സഹായികളോട് നിര്ദ്ദേശിച്ചതായും വാള് സ്ട്രീറ്റ് ജേണല് റിപ്പോര്ട്ട് ചെയ്തു.
അതേസമയം, വാഷിംഗ്ടണിന്റെ ആവശ്യങ്ങള് 'അമിതവും യാഥാര്ത്ഥ്യബോധമില്ലാത്തതും യുക്തിരഹിതവുമാണെന്ന്' വിശേഷിപ്പിച്ചുകൊണ്ട് ഇറാന് യുഎസ് നിര്ദ്ദേശങ്ങള് തള്ളി. ഇസ്രായേലിനും ഗള്ഫിലെ യുഎസ് താവളങ്ങള്ക്കും താല്പ്പര്യങ്ങള്ക്കും നേരെ മിസൈലുകളും ഡ്രോണുകളും ഉപയോഗിച്ചുള്ള ആക്രമണം ഇറാന് തുടരുകയാണ്. യുഎസ് സൈന്യം തങ്ങളുടെ മണ്ണില് പ്രവേശിച്ചാല് ഗള്ഫ് അറബ് രാജ്യങ്ങള്ക്കെതിരെ കരയുദ്ധം ആരംഭിക്കുമെന്നും പേര്ഷ്യന് ഗള്ഫില് മൈനുകള് വിരിക്കുമെന്നും ടെഹ്റാന് മുന്നറിയിപ്പ് നല്കി.
അമേരിക്കയും ഇസ്രായേലും തങ്ങളുടെ ആദ്യ ആക്രമണങ്ങള് ആരംഭിച്ച് ഒരു മാസത്തിലേറെ പിന്നിട്ടിട്ടും, ഹോര്മുസ് കടലിടുക്കില് ഇറാന്റെ ആധിപത്യം തുടരുകയാണ്. സമാധാനകാലത്ത് ലോകത്തെ എണ്ണയുടെ അഞ്ചിലൊന്ന് കൊണ്ടുപോകുന്ന പേര്ഷ്യന് ഗള്ഫിലെ ഈ പ്രധാന ജലപാതയ്ക്ക് മേലുള്ള ഇറാന്റെ നിയന്ത്രണം ആഗോള എണ്ണവില കുതിച്ചുയരാന് കാരണമായിട്ടുണ്ട്. കൂടാതെ മേഖലയിലെ ഊര്ജ്ജ ഇന്ഫ്രാസ്ട്രക്ചറുകള്ക്ക് നേരെയുള്ള ഇറാന്റെ ആക്രമണങ്ങളും എണ്ണവില വര്ദ്ധിപ്പിച്ചു. ഇത് ലോകമെമ്പാടുമുള്ള ഓഹരി വിപണികളെ ഉലയ്ക്കുകയും നിത്യോപയോഗ സാധനങ്ങളുടെ വില വര്ദ്ധിപ്പിക്കുകയും ചെയ്തു.
ഇറാന് ട്രംപിന്റെ മുന്നറിയിപ്പ്
ഒരു വെടിനിര്ത്തല് ഉടന് ഉണ്ടായില്ലെങ്കില്, കടലിടുക്ക് തുറന്നു കൊടുത്തില്ലെങ്കില് ആക്രമണം വ്യാപിപ്പിക്കുമെന്ന് ഈ ആഴ്ച ട്രംപ് മുന്നറിയിപ്പ് നല്കി. ഇറാന്റെ പ്രധാന എണ്ണക്കയറ്റുമതി കേന്ദ്രമായ ഖാര്ഗ് ദ്വീപിന് നേരെയും, ഒരുപക്ഷേ സമുദ്രജലം കുടിവെള്ളമാക്കുന്ന പ്ലാന്റുകള്ക്ക് നേരെയും ആക്രമണം ഉണ്ടായേക്കാം.
ഇറാന്റെ പ്രത്യാക്രമണം കഠിനമായി ബാധിച്ച അമേരിക്കയുടെ ഗള്ഫ് സഖ്യകക്ഷികള്, ഇറാന്റെ സൈനിക ശേഷി പൂര്ണ്ണമായും തകര്ക്കുന്നതുവരെ പോരാട്ടം തുടരണമെന്ന് ട്രംപിനോട് ആവശ്യപ്പെട്ടതായി യുഎസ്, ഗള്ഫ്, ഇസ്രായേല് ഉദ്യോഗസ്ഥര് വ്യക്തമാക്കുന്നു.
മേഖലയിലെ ഈ വര്ദ്ധിച്ചുവരുന്ന രോഷത്തോട് പ്രതികരിച്ച ഇറാന് വിദേശകാര്യ മന്ത്രി അബ്ബാസ് അരാഗ്ചി, തങ്ങള് മേഖലയിലെ യുഎസ് സേനയെ മാത്രമാണ് ലക്ഷ്യമിടുന്നതെന്ന് ചൊവ്വാഴ്ച ആവര്ത്തിച്ചു. 'അറബികളെയോ ഇറാനികളെയോ ബഹുമാനിക്കാത്ത, സുരക്ഷ നല്കാന് കഴിയാത്ത ശത്രുക്കളായ അക്രമികളെയാണ് ഞങ്ങളുടെ ഓപ്പറേഷനുകള് ലക്ഷ്യമിടുന്നത്,' അരാഗ്ചി എക്സില് (X) കുറിച്ചു.