പശ്ചിമേഷ്യയിലെ പുതിയ സൈനിക വിന്യാസം ഹോര്മുസ് കടലിടുക്കിലെ എണ്ണ ഗതാഗതത്തെ ബാധിക്കുമെന്ന ഭീതിയില് രാജ്യാന്തര വിപണിയില് എണ്ണവില ഉയര്ന്നു; മഡുറോയെയും ഭാര്യയെയും പിടികൂടിയ സാഹസിക ദൗത്യത്തില് പങ്കാളിയായ യുദ്ധകപ്പലും ഇറാന് തീരത്ത്; നയതന്ത്ര-സൈനിക സമ്മര്ദ്ദം പാരമ്യത്തിലെത്തിച്ച് ട്രംപ്; ജനീവയില് ചൊവ്വാഴ്ച ചര്ച്ച; ഇനി എന്തും സംഭവിക്കാം?
വാഷിങ്ടണ്: ഇറാനുമേലുള്ള നയതന്ത്ര-സൈനിക സമ്മര്ദ്ദം പാരമ്യത്തിലെത്തിച്ച് യുഎസ് പ്രസിഡന്റ് ഡോണള്ഡ് ട്രംപ്. ആണവ കരാറില് അന്തിമ തീരുമാനമെടുക്കാന് ഒരു മാസത്തെ സമയം നല്കിയതിന് പിന്നാലെ, ലോകത്തിലെ ഏറ്റവും വലിയ വിമാനവാഹിനിക്കപ്പലായ യുഎസ്എസ് ജെറാള്ഡ് ആര് ഫോര്ഡിനെ പശ്ചിമേഷ്യയിലേക്ക് അയക്കാന് ട്രംപ് ഉത്തരവിട്ടു.
നിലവില് മേഖലയിലുള്ള യുഎസ്എസ് എബ്രഹാം ലിങ്കണ് വിമാനവാഹിനിക്കപ്പലിനൊപ്പം ജെറാള്ഡ് ആര് ഫോര്ഡ് കൂടി ചേരുന്നതോടെ ഇറാന് തീരം പൂര്ണ്ണമായും അമേരിക്കന് യുദ്ധക്കപ്പലുകളുടെ നിരീക്ഷണവലയത്തിലാകും. അമേരിക്കന് സമ്പദ്വ്യവസ്ഥയില് പണപ്പെരുപ്പം കുറയുകയും തൊഴില് വിപണി ഉണരുകയും ചെയ്തതോടെ ആഭ്യന്തരമായി കൈവന്ന കരുത്താണ് വിദേശനയങ്ങളില് കടുത്ത തീരുമാനങ്ങളെടുക്കാന് ട്രംപിനെ പ്രേരിപ്പിക്കുന്നത്.
വെനസ്വേലന് പ്രസിഡന്റ് നിക്കോളാസ് മഡുറോയെയും ഭാര്യയെയും പിടികൂടിയ സാഹസിക ദൗത്യത്തില് നിര്ണ്ണായക പങ്കുവഹിച്ച അതേ യുദ്ധക്കപ്പലാണ് ജെറാള്ഡ് ആര് ഫോര്ഡ്. 60 യുദ്ധവിമാനങ്ങള് ഉള്പ്പെടെ 75 വിമാനങ്ങളെ വരെ വഹിക്കാന് ശേഷിയുള്ള ഈ കൂറ്റന് കപ്പല് കരീബിയന് കടലില് നിന്നാണ് പശ്ചിമേഷ്യ ലക്ഷ്യമാക്കി നീങ്ങുന്നത്. ഇസ്രയേല് പ്രധാനമന്ത്രി ബെന്യാമിന് നെതന്യാഹു വൈറ്റ് ഹൗസിലെത്തി ട്രംപുമായി നടത്തിയ മൂന്ന് മണിക്കൂര് നീണ്ട ചര്ച്ചയ്ക്ക് തൊട്ടുപിന്നാലെയാണ് ഈ സൈനിക നീക്കം എന്നതും ശ്രദ്ധേയമാണ്.
ഇറാനുമായുള്ള ആണവ കരാര് ചര്ച്ചകളില് പുരോഗതിയില്ലാത്തതാണ് ട്രംപിനെ പ്രകോപിപ്പിച്ചത്. യുഎസ് പ്രത്യേക ദൂതന് സ്റ്റീവ് വിറ്റ്കോഫും ട്രംപിന്റെ മരുമകന് ജറാദ് കുഷ്നറും ഒമാനില് വെച്ച് ഇറാന് വിദേശകാര്യ മന്ത്രി അബ്ബാസ് അറാഗ്ചിയുമായി നടത്തിയ ചര്ച്ചകള് ഫലം കണ്ടിരുന്നില്ല. ഒരു മാസത്തിനുള്ളില് ധാരണയിലെത്തിയില്ലെങ്കില് ഇറാന് 'വേദനാജനകമായ' പ്രതികരണം നേരിടേണ്ടി വരുമെന്ന് ട്രംപ് ആവര്ത്തിച്ചു. 'നയതന്ത്ര കരാറിലാണ് എനിക്ക് താല്പ്പര്യം, പക്ഷേ ധാരണയിലെത്തിയില്ലെങ്കില് പടക്കപ്പലുകള് ആവശ്യമായി വരും. കരാറായാല് അവയെ തിരിച്ചുവിളിക്കാമല്ലോ' എന്നാണ് ട്രംപിന്റെ നിലപാട്. അതേസമയം, ചര്ച്ചകള് പാടെ ഉപേക്ഷിക്കാതെ ജനീവയില് വച്ച് അടുത്ത ചൊവ്വാഴ്ച ഇരുവിഭാഗവും വീണ്ടും കൂടിക്കാഴ്ച നടത്തുമെന്ന് റിപ്പോര്ട്ടുകളുണ്ട്.
അമേരിക്കയില് പണപ്പെരുപ്പം 2.4 ശതമാനമായി കുറഞ്ഞതും മുട്ട ഉള്പ്പെടെയുള്ള നിത്യോപയോഗ സാധനങ്ങളുടെ വില ഇടിഞ്ഞതും ട്രംപിന്റെ രാഷ്ട്രീയ പദവി വര്ദ്ധിപ്പിച്ചിട്ടുണ്ട്. സമ്പദ്വ്യവസ്ഥ ഭദ്രമായതോടെ ആത്മവിശ്വാസത്തോടെ ഇറാനെ നേരിടാനാണ് അദ്ദേഹത്തിന്റെ നീക്കം. എന്നാല്, പശ്ചിമേഷ്യയിലെ പുതിയ സൈനിക വിന്യാസം ഹോര്മുസ് കടലിടുക്കിലെ എണ്ണ ഗതാഗതത്തെ ബാധിക്കുമെന്ന ഭീതിയില് രാജ്യാന്തര വിപണിയില് എണ്ണവില ഉയര്ന്നു തുടങ്ങിയിട്ടുണ്ട്.
ഇറാനെതിരെ കടുത്ത നിലപാട് വേണമെന്ന നെതന്യാഹുവിന്റെ ആവശ്യം കൂടി പരിഗണിച്ചാല് വരും ദിവസങ്ങളില് പശ്ചിമേഷ്യ കൂടുതല് കലുഷിതമാകാനാണ് സാധ്യത. യുഎസ് പ്രത്യേക ദൂതന് ഇറാന് വിദേശകാര്യ മന്ത്രിയുമായി ഒമാനില് നടത്തിയ ചര്ച്ചകളില് കാര്യമായ പുരോഗതിയുണ്ടായിട്ടില്ല. ഒരു മാസത്തിനുള്ളില് കരാറില് എത്താന് കഴിഞ്ഞില്ലെങ്കില് പ്രതികരണം ഉണ്ടാവുമെന്നാണ് ട്രംപിന്റെ മുന്നറിയിപ്പ്.
ഒരു മാസത്തിനുള്ളില് ഇറാനുമായി കരാറിലെത്താന് കഴിയുമെന്നാണ് പ്രതീക്ഷയെന്നും കരാറിലെത്തിയില്ലെങ്കില് ഇറാന് വളരെ വേദനാജനകമായ പ്രതികരണം നേരിടേണ്ടിവരുമെന്നും ട്രംപ് വ്യാഴാഴ്ച മുന്നറിയിപ്പ് നല്കിയിരുന്നു. കഴിഞ്ഞയാഴ്ച, യുഎസ് പ്രത്യേക ദൂതന് സ്റ്റീവ് വിറ്റ്കോഫും ട്രംപിന്റെ മരുമകന് ജറാദ് കുഷ്നറും ഒമാനില് ഇറാന് വിദേശകാര്യ മന്ത്രി അബ്ബാസ് അറാഗ്ചിയുമായി പരോക്ഷ ചര്ച്ചകള് നടത്തിയെങ്കിലും കാര്യമായ പുരോഗതിയുണ്ടായില്ല.