തായ്‌ലൻഡിന്റെ ഏറ്റവും പ്രായം കുറഞ്ഞ പ്രധാനമന്ത്രിയായി അധികാരമേറ്റിട്ട് ഒരു വർഷം; കംബോഡിയന്‍ നേതാവുമായുള്ള ഫോണ്‍സംഭാഷണം പുറത്ത് വന്നതോടെ പയേതുങ്താൻ ഷിനവത്രയ്ക്ക് പദവി നഷ്ടമായി; ഭരണഘടനാ കോടതിയുടെ നടപടി ‘അങ്കിൾ’ വിളിയെ തുടർന്ന്; സൈനിക ജനറലിനെപ്പറ്റി മതിപ്പില്ലാതെ സംസാരിച്ചതും വിനയായി; നയതന്ത്ര സംഭാഷണം മാത്രമെന്ന് വിശദീകരണം
ബാങ്കോക്ക്: കംബോഡിയൻ നേതാവുമായുള്ള ഫോൺ സംഭാഷണത്തിലെ പരാമർശങ്ങളുടെ പേരിൽ തായ്‌ലൻഡ് പ്രധാനമന്ത്രി പയേതുങ്താൻ ഷിനവത്രയെ (38) ഭരണഘടനാ കോടതി പുറത്താക്കി. ധാർമികത ലംഘിച്ചുവെന്നും പ്രധാനമന്ത്രിയുടെ പ്രവർത്തനങ്ങൾ രാജ്യത്തിന്റെ അഭിമാനം സംരക്ഷിച്ചില്ലെന്നും കോടതി വിലയിരുത്തി. 9 ജഡ്ജിമാരിൽ 6 പേർ പയേതുങ്താനെതിരെ വോട്ടു ചെയ്തതോടെയാണ് പുറത്താക്കൽ വിധി വന്നത്.
കഴിഞ്ഞ വർഷം ഓഗസ്റ്റിലാണ് പയേതുങ്താൻ തായ്‌ലൻഡിന്റെ ഏറ്റവും പ്രായം കുറഞ്ഞ പ്രധാനമന്ത്രിയായി അധികാരമേറ്റത്. ഒരു വർഷം മാത്രമാണ് പയേതുങ്താൻ പദവിയിൽ ഇറക്കാൻ കഴിഞ്ഞത്. കംബോഡിയയുമായുള്ള അതിർത്തി സംഘർഷം രൂക്ഷമായ സാഹചര്യത്തിൽ, കംബോഡിയൻ സെനറ്റ് പ്രസിഡന്റും മുൻ പ്രധാനമന്ത്രിയുമായ ഹുൻ സെന്നിനെ 'അങ്കിൾ' എന്ന് വിളിച്ച് പ്രീണിപ്പിക്കാൻ ശ്രമിച്ചതും തായ് സൈനിക ജനറലിനെപ്പറ്റി മതിപ്പില്ലാതെ സംസാരിച്ചതുമാണ് വിവാദങ്ങൾക്ക് വഴിവെച്ചത്.
സംഭാഷണത്തിന്റെ ഓഡിയോ ഹുൻ സെൻ പുറത്തുവിട്ടതോടെയാണ് സൈന്യത്തെ അപമാനിച്ചു എന്ന പേരിൽ തായ്‌ലൻഡിൽ പ്രതിഷേധം ഉയർന്നത്. കംബോഡിയൻ സൈനികൻ കൊല്ലപ്പെട്ട അതിർത്തി സംഘർഷം പരിഹരിക്കാനുള്ള നയതന്ത്ര നീക്കമാണ് പാളിയതെന്ന് വിലയിരുത്തപ്പെടുന്നു. പ്രധാന ഘടകകക്ഷി മന്ത്രിസഭ വിട്ടതോടെ കൂട്ടുകക്ഷി സർക്കാരിന്റെ ഭാവിയും തുലാസിലായി. താൻ വ്യക്തിപരമായ നേട്ടങ്ങൾക്ക് ശ്രമിച്ചില്ലെന്നും സമാധാനം നിലനിർത്താനുള്ള നയതന്ത്ര സംഭാഷണമാണ് നടത്തിയതെന്നും പയേതുങ്താൻ ഷിനവത്ര വാർത്താ സമ്മേളനത്തിൽ വ്യക്തമാക്കി.