അമ്പലപ്പുഴയില് നോ കണ്ഫ്യൂഷന്; മണ്ഡലം ഇടതോരം ചേരും; സുധാകര ഘടകത്തെ തള്ളി എച്ച് സലാം; എല് ഡി എഫ് 62000 ലധികം വോട്ട് നേടും; 5000 ല് കൂടുതല് ബിജെപി വോട്ട് ജി.സുധാകരന് കിട്ടിയാല് എല് ഡി എഫ് 5000 വോട്ടിന്റെ ഭൂരിപക്ഷത്തില് വിജയിക്കും; വഞ്ചനയുടെ രാഷ്ട്രീയത്തോട് അമ്പലപ്പുഴക്കാര് സലാം പറയുമെന്നും സലാം
അമ്പലപ്പുഴയില് നോ കണ്ഫ്യൂഷന്; മണ്ഡലം ഇടതോരം ചേരും
ആലപ്പുഴ: ഇത്തവണത്തെ നിയമസഭാ തിരഞ്ഞെടുപ്പില് കേരളം ഉറ്റുനോക്കുന്ന ഏറ്റവും പ്രധാനപ്പെട്ട മണ്ഡലങ്ങളിലൊന്നായി അമ്പലപ്പുഴ മാറിയിരിക്കുന്നു. പതിറ്റാണ്ടുകളായി ഇടതുപക്ഷത്തിന്റെ ഉറച്ച കോട്ടയായിരുന്ന ഇവിടെ, പാര്ട്ടിയുടെ കരുത്തനായ നേതാവ് ജി. സുധാകരന് വിമതനായി (സ്വതന്ത്ര സ്ഥാനാര്ത്ഥി) കളത്തിലിറങ്ങിയതും യു.ഡി.എഫ് അദ്ദേഹത്തിന് പിന്തുണ പ്രഖ്യാപിച്ചതും തിരഞ്ഞെടുപ്പ് ചിത്രം സങ്കീര്ണ്ണമാക്കിയിരിക്കുകയാണ്.
എച്ച്. സലാമിന്റെ ആത്മവിശ്വാസം: കണക്കുകള് നിരത്തി എം.എല്.എ
മണ്ഡലത്തില് എല്.ഡി.എഫ് വിജയത്തില് യാതൊരു സംശയവുമില്ലെന്ന് എച്ച്. സലം എം.എല്.എ പ്രഖ്യാപിച്ചു കഴിഞ്ഞു. സോഷ്യല് മീഡിയയിലൂടെ അദ്ദേഹം പങ്കുവെച്ച കണക്കുകള് ഇപ്രകാരമാണ്:
എല്.ഡി.എഫ് 62,000-ത്തിലധികം വോട്ടുകള് നേടും. ബി.ജെ.പി വോട്ടുകള് യു.ഡി.എഫ് (ജി. സുധാകരന്) പക്ഷത്തേക്ക് എത്രത്തോളം മറിയുന്നു എന്നതിനെ ആശ്രയിച്ചിരിക്കും ഭൂരിപക്ഷം. 5,000 ബി.ജെ.പി വോട്ടുകള് സുധാകരന് ലഭിച്ചാല് എല്.ഡി.എഫ് 5,000 വോട്ടിന് ജയിക്കും.ബി.ജെ.പി വോട്ടുകള് 20,000 കടന്നാല് എല്.ഡി.എഫ് ഭൂരിപക്ഷം 10,000-ത്തിന് മുകളിലെത്തും.
ബി.ജെ.പിയും യു.ഡി.എഫും തമ്മില് അവിശുദ്ധ കൂട്ടുകെട്ടുണ്ടെന്നും, വഞ്ചനയുടെ രാഷ്ട്രീയത്തിന് അമ്പലപ്പുഴയിലെ ജനങ്ങള് മറുപടി നല്കുമെന്നും സലാം ആരോപിക്കുന്നു.
'സുധാകര ഘടകം': സി.പി.എമ്മിന്റെ ആശങ്ക
മണ്ഡലത്തില്, ജി. സുധാകരന് ഉയര്ത്തുന്ന വെല്ലുവിളി നിസ്സാരമല്ല. ബൂത്ത് തല കണക്കുകള് പരിശോധിക്കുമ്പോള് ചില വസ്തുതകള് പാര്ട്ടിയെ അലോസരപ്പെടുത്തുന്നുണ്ട്. സാധാരണഗതിയില് ഇടതുപക്ഷത്തിന് ലഭിക്കാറുള്ള നിഷ്പക്ഷ വോട്ടുകളില് സുധാകരന് വിള്ളല് വീഴ്ത്തിയേക്കാം. കളര്കോട്, കൈതവന, പഴവീട് തുടങ്ങിയ സുധാകരന്റെ സ്വാധീന മേഖലകളില് വോട്ട് സമാഹരിക്കാന് സലാമിന് പ്രയാസം നേരിടുന്നുണ്ട്. സുധാകരന് തന്നെ എതിര്പക്ഷത്ത് എത്തിയതോടെ, സര്ക്കാരിനെതിരെയുള്ള ചെറിയ വികാരങ്ങള് പോലും വോട്ടായി മാറാന് സാധ്യതയുണ്ടെന്ന് റിപ്പോര്ട്ടുകള് സൂചിപ്പിക്കുന്നു.
എച്ച് സലാമിന്റെ കുറിപ്പിന്റെ പൂര്ണരൂപം
അമ്പലപ്പുഴയില് നോ കണ്ഫ്യൂഷന്..
അമ്പലപ്പുഴ മണ്ഡലത്തില് എല് ഡി എഫ് വിജയത്തില് ഒരു കണ്ഫ്യൂഷനും ഇല്ല. ഏറെ വാശിയേറിയ പോരാട്ടത്തില് അഭിമാനകരമായ വിജയം നേടും..
എല് ഡി എഫ് 62000 ലധികം വോട്ട് നേടും. BJP, UDF ഡീലിന്റെ ഭാഗമായി യു ഡി എഫ് സ്ഥാനാര്ഥി ജി സുധാകരന് നേടുന്ന ബി ജെ പി യുടെ വോട്ടിന്റെ അളവിനനുസരിച്ച് ഭൂരിപക്ഷത്തില് വ്യത്യാസം വരും.
5000 ല് കൂടുതല് BJP വോട്ട് യുഡിഎഫ് സ്ഥാനാര്ഥിക്ക് കിട്ടിയാല് എല് ഡി എഫ് 5000 വോട്ടിന്റെ ഭൂരിപക്ഷത്തില് വിജയിക്കും.
BJP 20000 ന് മുകളില് നേടിയാല് എല് ഡി എഫ് ഭൂരിപക്ഷം 10000 കടക്കും..
മാധ്യമങ്ങള്ക്ക് ഒരു കണ്ഫ്യൂഷനും വേണ്ട.
അമ്പലപ്പുഴ ഇടതോരം ചേരും..
രാഷ്ട്രീയ നെറിവ് കാണിക്കും..
വഞ്ചനയുടെ രാഷ്ട്രീയത്തോട് സലാം പറയും..
അമ്പലപ്പുഴയില് എല്ലാ ജാതി, മത വിഭാഗത്തിലുമുള്ള മനുഷ്യര് എല് ഡി എഫ് സ്ഥാനാര്ഥിയായ എനിക്ക് വോട്ട് ചെയ്തിട്ടുണ്ട്. ഇടതുപക്ഷക്കാരും ഇടതുപക്ഷം അല്ലാത്ത ഒരു വിഭാഗം മനുഷ്യരുടെയും വോട്ടുകള് ലഭിച്ചിട്ടുണ്ട്..
വിജയം ഉറപ്പ്..
എല് ഡി എഫ് തുടരും..
അമ്പലപ്പുഴ വളരും..
അമ്പലപ്പുഴയില് ഉയര്ന്നു വന്ന പ്രത്യേക രാഷ്ട്രീയ അന്തരീക്ഷത്തില് നേരും നെറിവുമാണ് ജീവിതത്തില് പ്രധാനമെന്ന് കരുതി വിവേകപൂര്വ്വം പിന്തുണച്ച എല്ലാ പ്രിയപ്പെട്ട വോട്ടര്മാര്ക്കും നന്ദി..
നമ്മുടെ വിജയത്തിന് വേണ്ടി ഊണും ഉറക്കവും ഉപേക്ഷിച്ച് രാപകല് ഒരു മാസക്കാലം പ്രവര്ത്തിച്ച എല് ഡി എഫ് പ്രവര്ത്തകര്ക്കും നേതാക്കള്ക്കും മനസ് നിറഞ്ഞ നന്ദി രേഖപ്പെടുത്തുന്നു..
എച്ച്. സലാം