മടിച്ചു നിന്നാല്‍ സിപിഎം കളംപിടിക്കും; രാഹുല്‍ മാങ്കൂട്ടത്തില്‍ വിഷയത്തില്‍ പുനര്‍വിചിന്തനത്തിന് കോണ്‍ഗ്രസ്; പാലക്കാട് മണ്ഡലത്തിലും നിയമസഭാ സമ്മേളനത്തിലും പങ്കെടുപ്പിക്കാന്‍ നീക്കം; 'രാഹുലിനെതിരെ ഉയര്‍ന്നത് കഴമ്പില്ലാത്ത ആരോപണങ്ങള്‍; സംരക്ഷണം ഒരുക്കു'മെന്ന് അടൂര്‍ പ്രകാശ്; ബലിയാടാക്കിയെന്ന വികാരം ശക്തമെന്ന് വിലയിരുത്തി യുഡിഎഫ്
മടിച്ചു നിന്നാല്‍ സിപിഎം കളംപിടിക്കും; രാഹുല്‍ മാങ്കൂട്ടത്തില്‍ വിഷയത്തില്‍ പുനര്‍വിചിന്തനത്തിന് കോണ്‍ഗ്രസ്
തിരുവനന്തപുരം: രാഹുല്‍ മാങ്കൂട്ടത്തില്‍ വിഷയത്തില്‍ യുഡിഎഫ് ശക്തമായ നിലപാടിലേക്ക് നീങ്ങുന്നു. ഇനിയും പ്രതിരോധത്തില്‍ ഊന്നി നിന്നാല്‍ സിപിഎം കളം പടിക്കുമെന്ന നിഗമനത്തില്‍ രാഹുലിനെ പ്രതിരോധിക്കാനാണ് കോണ്‍ഗ്രസ് ഒരുങ്ങുന്നത്. ഇതിലും ഗുരുതരമായ വിവാദങ്ങളില്‍ പെട്ടവരെ സിപിഎം സംരക്ഷിക്കുന്നത് ആയുധമാക്കി കൊണ്ടാണ് കോണ്‍ഗ്രസ് ശക്തമായ നിലപാടിലേക്ക് മാറുന്നത്. അണികളുടെ വികാരവും രാഹുലിന് അനുകൂലമായി മാറുന്നു എന്നാണ് കോണ്‍ഗ്രസ് വിലയിരുത്തുന്നത്. രാഹുലിനെ ബലിയാടാക്കിയെന്ന വികാരം കോണ്‍ഗ്രസ് അണികള്‍ക്കിടയില്‍ ശക്തമാണ്. സോഷ്യല്‍ മീഡിയയില്‍ അടക്കം രാഹുലിനെ പിന്തുണക്കുന്നവരുടെ എണ്ണവും കൂടി വരുന്നു.
ഇത് കൂടാതെ പോലീസ് കേസുകളുമായി രാഹുലിനെ വലയം ചെയ്യുന്നുണ്ട്. പരാതിക്കാര് പോലും ഇല്ലാത്ത പശ്ചാത്തലത്തിലാണ് ഇത്തരം നടപടികള്‍ എന്നതാണ് ശ്രദ്ധേയം. ഇതെല്ലാം പകപോക്കല്‍ നടപടിയാണെന്ന് കോണ്‍ഗ്രസ് വിലയിരുത്തുന്നു. അതുകൊണ്ടു തന്നെ ഇനിയും മടിച്ചു നില്‍ക്കാരെ രാഹുലിനെ പ്രതിരോധിക്കാനാണ് കോണ്‍ഗ്രസ് ഒരുങ്ങുന്നത്. യുഡിഎഫ് നേതാക്കളുടെ പ്രതികരണങ്ങളില്‍ നിന്നും ഇക്കാര്യം വ്യക്തമാണ്.
രാഹുല്‍ മാങ്കൂട്ടത്തിലിനെതിരെ ഉയര്‍ന്നത് കഴമ്പില്ലാത്ത ആരോപണങ്ങളെന്നാണ് യുഡിഎഫ് കണ്‍വീനര്‍ അടൂര്‍ പ്രകാശ് ഇന്ന് വ്യക്തമക്കിയത്. ആരോപണം ഉയര്‍ന്നപ്പോള്‍ തന്നെ യൂത്ത് കോണ്‍ഗ്രസ് നേതൃത്വത്തില്‍ നിന്ന് പാര്‍ട്ടി രാജിവെക്കാന്‍ ആവശ്യപ്പെട്ടു. രാഹുല്‍ നിയമസഭാ സമ്മേളനത്തില്‍ പങ്കെടുക്കും. രാഹുലിന് സംരക്ഷണം ഒരുക്കുമെന്നും അടൂര്‍ പ്രകാശ് പറഞ്ഞു. സിപിഎം രാഹുലിനെതിരെ രംഗത്തുവരുമ്പോഴാണ് രാഹുലിന് പിന്നില്‍ കോണ്‍ഗ്രസ് ശക്തമായി അണിനിരക്കാന്‍ ഒരുങ്ങുന്നത്.
തെരഞ്ഞെടുപ്പ് കാലത്ത് ഇത്തരം ആരോപണങ്ങള്‍ ഉണ്ടാകുമെന്നും എല്ലാവര്‍ക്കും നീതി ലഭ്യമാകണമെന്നും അടൂര്‍ പ്രകാശ് പറഞ്ഞു. മറുഭാഗത്തു ഇരിക്കുന്നവരിലും സമാന ആരോപണം നേരിടുന്നവര്‍ ഉണ്ടെന്ന് അദേഹം കൂട്ടിച്ചേര്‍ത്തു. നേരത്ത രാഹുല്‍ എംഎല്‍എ സ്ഥാനം രാജിവെക്കില്ലെന്ന് തറപ്പിച്ചു പറഞ്ഞ് കെപിസിസി അധ്യക്ഷന്‍ സണ്ണി ജോസഫും രംഗത്തുവന്നു.
രാഹുല്‍ മാങ്കൂട്ടത്തില്‍ എംഎല്‍എയുടെ പേരിലുണ്ടായ വിവാദങ്ങള്‍ കോണ്‍ഗ്രസിന് ക്ഷീണമുണ്ടാക്കിയെന്നാണ് കെപിസിസി അധ്യക്ഷന്‍ അഡ്വ. സണ്ണി ജോസഫ് ഇന്ന് വ്യക്തമാക്കിയത്. എന്നാല്‍, അത് പറയാന്‍ തങ്ങളെ എതിര്‍ക്കുന്ന ഒരു പാര്‍ട്ടിക്കും ധാര്‍മികമായോ നിയമപരമായോ അവകാശമില്ല. രാഹുല്‍ എംഎല്‍എ സ്ഥാനം രാജിവെയ്‌ക്കേണ്ടതില്ലെന്നും അങ്ങനെയൊരു കീഴ്വഴക്കമില്ലെന്നും അദ്ദേഹം പറഞ്ഞു.
കോണ്‍ഗ്രസ് നേതൃത്വത്തെ സംബന്ധിച്ച് പൊതുവില്‍ നല്ല അഭിപ്രായമാണ്. സംഘടനാ ശക്തിയോടൊപ്പംതന്നെ നേതൃമികവും വ്യക്തതയും കോണ്‍ഗ്രസിന്റെ മുതല്‍ക്കൂട്ടായിരുന്നു. രാഹുലിനെതിരായ ആക്ഷേപം വന്നതോടെ അതിന്റേതായ ക്ഷീണമുണ്ട്. എന്നാല്‍, ഇത് പറയാന്‍ ഇന്നത്തെ ഞങ്ങളെ എതിര്‍ക്കുന്ന ഒരു പാര്‍ട്ടിക്കും ധാര്‍മികമായോ നിയമപരമായോ അവകാശമില്ല എന്ന യാഥാര്‍ഥ്യം ബാക്കിനില്‍ക്കുന്നു.
എംഎല്‍എ സ്ഥാനമെന്നത് ജനങ്ങള്‍ നല്‍കുന്നതാണ്. നമുക്ക് അങ്ങനെയൊരു കീഴ്വഴക്കമില്ല. കാരണം ഇത്തരം കേസുകളില്‍പ്പെട്ടിട്ടുള്ള എംഎല്‍എമാര്‍ നിലവില്‍ നിയമസഭയിലുണ്ട്. നിയമവ്യവസ്ഥ പരിശോധിച്ചാല്‍ ഇതിനെക്കാള്‍ ഗുരുതരമായ ബലാത്സംഗക്കേസുകളില്‍ പ്രതികളായിട്ടുള്ള എംഎല്‍എമാര്‍ നിയമസഭയിലുണ്ട്. അവരാരും രാജിവെച്ചിട്ടില്ല. കായുള്ള മരത്തിലാണ് കല്ലെറിയുക. രാഹുല്‍ മാങ്കൂട്ടത്തിലിനെതിരേ ഉയരുന്ന ആക്ഷേപത്തിന് പിന്നിലെ കാര്യമെന്നും അദ്ദേഹം കൂട്ടിച്ചേര്‍ത്തു.
അതിനിടെ, സിപിഎമ്മിന്റെയും ബിജെപിയുടെയും പ്രതിഷേധങ്ങളെ മറികടന്ന് രാഹുലിനെ പാലക്കാട്ടെത്തിച്ച് ഓണാഘോഷങ്ങളില്‍ പങ്കെടുപ്പിക്കാനുള്ള പദ്ധതിയിലാണ് ഒരു വിഭാഗം കോണ്‍ഗ്രസ് പ്രവര്‍ത്തകര്‍. ദീര്‍ഘനാള്‍ മണ്ഡലത്തില്‍നിന്ന് വിട്ടുനില്‍ക്കുന്നത് ആസന്നമായ തിരഞ്ഞെടുപ്പുകളില്‍ തിരിച്ചടിയാവുമെന്ന കണക്കുകൂട്ടലിലാണ് തിരക്കിട്ട ശ്രമം.
അതസേമയം രാഹുല്‍ മാങ്കൂട്ടത്തിലിനെതിരെ പ്രതിഷേധം ശക്തമാകുകയാണ്. രാഹുല്‍ മാങ്കുട്ടത്തില്‍ മണ്ഡലത്തിലേക്ക് വന്നാല്‍ തടയുമെന്ന് ബിജെപി നേതാക്കള്‍ വ്യക്തമാക്കി. രാഹുല്‍ മാങ്കൂട്ടത്തിലിനെ ഔദ്യോഗിക പരിപാടികളില്‍ പങ്കെടുക്കാന്‍ സമ്മതിക്കില്ലെന്ന് ബിജെപി നേതാവ് സി കൃഷ്ണകുമാര്‍ പറഞ്ഞു. എംഎല്‍എ എന്ന ഔദ്യോഗിക പദവിയുടെ പേരില്‍ പങ്കെടുക്കാനെത്തുമ്പോള്‍ തടയുമെന്നും ബിജെപി പറഞ്ഞു.
രാഹുലിന്റെ രാജി ആവശ്യപ്പെട്ട് പാലക്കാട്ടെ എംഎല്‍എ ഓഫീസിലേക്ക് നടന്ന ബിജെപി പ്രതിഷേധത്തില്‍ സംഘര്‍ഷമുണ്ടായി. പൊലീസ് ജലപീരങ്കി പ്രയോഗിച്ചു. പ്രവര്‍ത്തകര്‍ ബാരിക്കേഡിന് മുകളില്‍ കയറി.