കേരളം ഒറ്റക്കെട്ടായി ഷാഫിയോടൊപ്പമുണ്ടാകും; ഷാഫി വടകരയില്‍ തന്നെ ഉണ്ടാകും; പ്രതിഷേധത്തിന്റെ പേര് പറഞ്ഞ് കൊടി സുനിമാരെ തെരുവിലിറക്കാനാണ് സി.പി.എമ്മിന്റെ തീരുമാനമെങ്കില്‍ കേരളത്തിന്റെ മണ്ണിലത് നടക്കില്ലെന്ന് പി കെ ഫിറോസ്
സിപിഎമ്മിന്റെ നീക്കം വിലപ്പോകില്ലെന്ന് പികെ ഫിറോസ്
കോഴിക്കോട്: വടകരയില്‍ എം.പി. ഷാഫി പറമ്പിലിനെ ഡിവൈഎഫ്‌ഐ പ്രവര്‍ത്തകര്‍ തടഞ്ഞതില്‍ ശക്തമായ പ്രതിഷേധവുമായി യൂത്ത് കോണ്‍ഗ്രസ് സംസ്ഥാന അധ്യക്ഷന്‍ പികെ ഫിറോസ്. പ്രതിഷേധത്തിന്റെ പേരില്‍ ക്രിമിനല്‍ സംഘങ്ങളെ തെരുവിലിറക്കാനാണ് സിപിഎമ്മിന്റെ തീരുമാനമെങ്കില്‍ കേരളത്തില്‍ അത് വിലപ്പോകില്ലെന്നും, കേരളം ഒറ്റക്കെട്ടായി ഷാഫി പറമ്പിലിനൊപ്പമുണ്ടാകുമെന്നും അദ്ദേഹം കൂട്ടിച്ചേര്‍ത്തു. ഷാഫി വടകരയില്‍ തന്നെ നിലയുറപ്പിക്കുമെന്നും അദ്ദേഹം വ്യക്തമാക്കി.
വടകര ടൗണിലാണ് ഡിവൈഎഫ്‌ഐ പ്രവര്‍ത്തകര്‍ ഷാഫി പറമ്പിലിനെ തടഞ്ഞത്. 'രാഹുല്‍ മാങ്കൂട്ടത്തിലിന് സംരക്ഷണമൊരുക്കിയില്ലേ' എന്ന മുദ്രാവാക്യമുയര്‍ത്തിയായിരുന്നു പ്രവര്‍ത്തകര്‍ ഷാഫിയുടെ കാറിനു മുന്നില്‍ മുദ്രാവാക്യം വിളിച്ചത്. തുടര്‍ന്ന് പുറത്തിറങ്ങിയ ഷാഫിക്കും പ്രവര്‍ത്തകര്‍ക്കുമിടയില്‍ പൊലീസ് സംരക്ഷണ വലയം തീര്‍ക്കുകയായിരുന്നു.
'തെറിപറഞ്ഞാല്‍ കേട്ടുനില്‍ക്കില്ല, ആരെയും പേടിച്ചുപോവുകയുമില്ല,' എന്ന് കാറില്‍ നിന്നിറങ്ങിയ ഷാഫി രൂക്ഷമായി പ്രതികരിച്ചു. 'നായ, പട്ടി എന്നൊക്കെ വിളിച്ചാല്‍ കേട്ടുനില്‍ക്കുമെന്ന് കരുതേണ്ട. സമരം ചെയ്യാനുള്ള അവകാശം മാനിക്കുന്നു. ധൈര്യമുണ്ടെങ്കില്‍ പിണറായി വിജയനെതിരെ സമരം ചെയ്യൂ,' എന്നും അദ്ദേഹം സമരക്കാരോട് പറഞ്ഞു. ഡിവൈഎഫ്‌ഐ പ്രവര്‍ത്തകര്‍ പ്രതിഷേധ മുദ്രാവാക്യവുമായി നിലകൊണ്ടതോടെ, പൊലീസ് വലയത്തില്‍ നിന്നിറങ്ങിയ ഷാഫി, കോണ്‍ഗ്രസ് പ്രവര്‍ത്തകര്‍ക്കൊപ്പം മാധ്യമപ്രവര്‍ത്തകരെ കണ്ട് പ്രതികരിച്ച ശേഷമാണ് മടങ്ങിയത്