'മുഖമുള്ളതും മുഖമില്ലാത്തതുമായ സൈബര്‍ കടന്നലുകള്‍ തന്റെ നേരെ പാഞ്ഞടുത്താലും നിലപാടില്‍ തരിമ്പും മാറ്റമുണ്ടാകില്ല; ബ്രിഗേഡുകളുടെ തെറിവിളികേട്ട് ഓടിയൊളിക്കുന്നവനല്ല ഞാന്‍; തെറിവിളികളോട് പരമ പുച്ഛം മാത്രം; ഇവര്‍ പാര്‍ട്ടിക്കാരല്ല മറിച്ച് പാര്‍ട്ടി വിരുദ്ധരാണ്; സൈബര്‍ ആക്രമണത്തില്‍ രാജ്മോഹന് ഉണ്ണിത്താന്‍
'മുഖമുള്ളതും മുഖമില്ലാത്തതുമായ സൈബര്‍ കടന്നലുകള്‍ തന്റെ നേരെ പാഞ്ഞടുത്താലും നിലപാടില്‍ തരിമ്പും മാറ്റമുണ്ടാകില്ല; ബ്രിഗേഡുകളുടെ തെറിവിളികേട്ട് ഓടിയൊളിക്കുന്നവനല്ല ഞാന്‍
കാസര്‍കോട്: രാഹുല്‍ മാങ്കൂട്ടത്തിലിനെ വിമര്‍ശിച്ച സംഭവത്തില്‍ തനിക്കെതിരെ ഉയര്‍ന്ന സൈബര്‍ ആക്രമണത്തില്‍ പ്രതികരണവുമായി കോണ്‍ഗ്രസ് നേതാവ് രാജ്മോഹന് ഉണ്ണിത്താന്‍. മുഖമുള്ളതും മുഖമില്ലാത്തതുമായ സൈബര്‍ കടന്നലുകള്‍ തന്റെ നേരെ പാഞ്ഞടുത്താലും നിലപാടില്‍ തരിമ്പും മാറ്റമുണ്ടാകില്ലെന്ന് അദ്ദേഹം ഫേസ്ബുക്ക് കുറിപ്പില്‍ വ്യക്തമാക്കി.
പാര്‍ട്ടി നേതൃത്വം ഒറ്റക്കെട്ടായെടുത്ത തീരുമാനത്തെ തള്ളിപ്പറയുന്ന പ്രതീതിയുണ്ടാക്കുന്ന തരത്തില്‍ കെ സുധാകരന്റെ ഭാഗത്ത് നിന്ന് പ്രതികരണമുണ്ടായപ്പോള്‍ അതിനെ രൂക്ഷമായി വിമര്‍ശിച്ചത് തനിക്ക് അടിയുറച്ച പാര്‍ട്ടി ബോധത്തില്‍ നിന്ന് പിന്നോട്ട് പോകുന്ന നിലപാട് ഇല്ലാത്തതിനാലാണ്. ബ്രിഗേഡുകളുടെ തെറിവിളികേട്ട് ഓടിയൊളിക്കുന്നവനല്ല താനല്ലെന്നും രാജ്മോഹന് ഉണ്ണിത്താന്‍ പറഞ്ഞു. ഫേസ്ബുക്കിലാണ് ഉണ്ണിത്താന്റെ പ്രതികരണം.
ഇവര്‍ പാര്‍ട്ടിക്കാരല്ല മറിച്ച് പാര്‍ട്ടി വിരുദ്ധരാണ്. ഇവര്‍ പ്രത്യേകം ചിലയാളുകളുടെ മാത്രം കൂലിയെഴുത്തുകാരാണെന്നും ഫേസ്ബുക്കിലെഴുതിയ കുറിപ്പില്‍ ഉണ്ണിത്താന്‍ പറയുന്നു.
ഉണ്ണിത്താന്റെ ഫേസ്ബുക്ക് പോസ്റ്റ് ഇങ്ങനെ:
പാര്‍ലമെന്റ് മുതല്‍ പാല്‍ സൊസൈറ്റിവരെയുള്ള തിരഞ്ഞെടുപ്പുകളില്‍ ഇടതുപക്ഷത്തിന്റെ ആയുധം സ്ത്രീ പീഡന വിഷയങ്ങളാണ് അവരുടെ കൊള്ളരുതായ്മകള്‍ മറച്ച് പിടിക്കാനുള്ള കുറുക്ക് വഴി. എന്നാല്‍ സര്‍ക്കാരിന്റെ തീവെട്ടി കൊള്ളയെയും ജന വിരുദ്ധതയെയും തുറന്ന് കട്ടേണ്ട സമയത്ത് ആരോപണ വിധേയര്‍ക്ക് വേണ്ടി മറ്റൊരു വഴിക്ക് സഞ്ചരിക്കുന്ന ആളുകളെ കാണുമ്പോള്‍ സഹതാപം മാത്രം.
കോണ്‍ഗ്രസ് പാര്‍ട്ടി ഒരു വിഷയത്തില്‍ ഒരു നിലപാടെടുത്താല്‍ ആ നിലപാടിനോടൊപ്പം നില്‍ക്കുകയെന്നതാണ് ഒരു പാര്‍ട്ടിക്കാരന്‍ അടിസ്ഥാനപരമായി ചെയ്യേണ്ടത്. പാര്‍ട്ടിയുടെ തീരുമാനങ്ങള്‍ വ്യക്കിപരമായി നമ്മള്‍ക്ക് കയ്‌പ്പേറിയതാകാം ഉള്‍ക്കൊള്ളാന്‍ കഴിയാത്തതുമാകാം പക്ഷെ എന്നും പാര്‍ട്ടിക്കൊപ്പം അടിയുറച്ച് നില്‍ക്കുക എന്നതാണ് എന്റെ ബോധ്യം.
അത്തരമൊരു ബോധ്യത്തില്‍ നിന്നാണ് കഴിഞ്ഞ ദിവസം എന്റെ പ്രതികരണം രാഹുല്‍ മാംങ്കൂട്ടത്തില്‍ വിഷയത്തില്‍ ഉണ്ടായത്.
ശ്രീ കെ സുധകാരനുള്‍പ്പെടെ പാര്‍ട്ടി നേതൃത്വം ഒറ്റക്കെട്ടായെടുത്ത തീരുമാനത്തെ തള്ളിപ്പറയുന്ന പ്രതീതിയുണ്ടാക്കുന്ന തരത്തില്‍ മുതിര്‍ന്ന നേതാവ് ശ്രീ കെ സുധാകരന്റെ ഭാഗത്ത് നിന്ന് പ്രതികരണമുണ്ടായപ്പോള്‍ അതിനെതിനെ രൂക്ഷമായി വിമര്‍ശിച്ചതും എന്റെ അടിയുറച്ച പാര്‍ട്ടി ബോധത്തില്‍ നിന്ന് പിന്നോട്ട് പോകുന്ന നിലപാട് എനിക്കില്ലാത്തതിനാലാണ്.
പാര്‍ട്ടിയാണ് പ്രധാനം അല്ലാതെ വ്യക്തികളല്ല. മുഖമുള്ളതും മുഖമില്ലാത്തതുമായ സൈബര്‍ കടന്നലുകള്‍ എന്റെ നേരെ പാഞ്ഞടുത്താലും എന്റെ നിലപാടില്‍ തരിമ്പും മാറ്റമുണ്ടാകില്ല. മടിയില്‍ കനമില്ലാത്തവന് വഴിയില്‍ പേടിക്കേണ്ടതില്ലല്ലോ. പറഞ്ഞ് പഴകിത്തേഞ്ഞ മഞ്ചേരി സദാചാര ആള്‍ക്കൂട്ടാക്രമണത്തിന് പിന്നില്‍ കമ്മ്യൂണിസ്റ്റ് പാര്‍ട്ടിക്കാരാണെന്നും അതിന്റെ ഉത്തരവ് എവിടെ നിന്നാണ് വന്നതെന്നതെന്നും പകലുപോലെ വ്യക്തമാണ്. അത് കോടതിക്കും ബോധ്യമായത്തിനാലാണ് കേസ് ചവറ്റുകുട്ടയിലേക്ക് വലിച്ചെറിഞ്ഞത്. അവിടെ എനിക്കെതിരെ ഒരു സ്ത്രീയുടെയും പരാതിയില്ല, ആള്‍ക്കൂട്ടക്രമണത്തിന്റെ ഇരയായിരുന്നു ഞാന്‍ അന്ന്. തലയുയര്‍ത്തിപ്പിടിച്ചാണ് ഞാനതിനെ നേരിട്ടത്.
ബ്രിഗേഡുകളുടെ തെറിവിളികേട്ട് ഓടിയൊളിക്കുന്നവനല്ല താനെന്ന് അത്തരക്കാര്‍ മനസിലാക്കിയാല്‍ അവര്‍ക്ക് നല്ലത്. ബ്രിഗേഡുകളുടെ ബ്രിഗേഡിയര്‍മാര്‍ക്കെതിരെ വാ തുറന്നാല്‍ ഊതിവീര്‍പ്പിച്ച ബലൂണുകള്‍ പൊട്ടി പോകുമെന്നും അത്തരക്കാര്‍ അത് ഓര്‍മിക്കുന്നതാകും നല്ലത്.
ഇടത് -സംഘപരിവാര്‍ സൈബര്‍വെട്ടുകിളികളുടെ തുടര്‍ച്ചയായ ആക്രമണത്തെ തെല്ലും ഭയക്കാതെ അതിനെ ഗൗനിക്കാതെ പൊതുപ്രവര്‍ത്തനത്തില്‍ സജീവമായ എനിക്ക് ബ്രിഗേഡുകളുടെ തെറിവിളികളോട് പരമ പുച്ഛം മാത്രമാണുള്ളത്, ഇവര്‍ പാര്‍ട്ടിക്കാരല്ല മറിച്ച് പാര്‍ട്ടി വിരുദ്ധരാണ്.
ഇവര്‍ പ്രത്യേകം ചിലയാളുകളുടെ മാത്രം കൂലിയെഴുത്ത്കാരാണ്. അത്തരം കൂലിയെഴുത്ത്കാരോടാണ്, മഴ പെയ്യുമ്പോള്‍ നനഞ്ഞിട്ടില്ല
പിന്നല്ലേ മരം പെയ്യുമ്പോള്‍..
നേരത്തെ മാങ്കൂട്ടത്തിലിന്റെ സകല ചരിത്രവും അറിയാമെന്നും അതുകൊണ്ട് ഇനി സൈബര്‍ ആക്രമണം തുടര്‍ന്നാല്‍ പലതും പരസ്യമായി വിളിച്ച് പറയേണ്ടിവരുമെന്നും രാജ്മോഹന് ഉണ്ണിത്താന്‍ എംപി മുന്നറിയിപ്പു നല്‍കിയിരുന്നു. ആ പറയുന്നത് അവന്റെ അന്ത്യംകുറിക്കും' എന്നുമുള്ള താക്കീത് ഉണ്ണിത്താന്‍ നല്‍കി.
'മാങ്കൂട്ടത്തിലിനായി കോണ്‍ഗ്രസിന്റെ പ്രതിച്ഛായ കളങ്കപ്പെടുത്തി. കോണ്‍ഗ്രസ് മുഖപത്രമായ വീക്ഷണത്തില്‍ മാങ്കൂട്ടത്തിലിനെ ന്യായീകരിച്ചുള്ള എഡിറ്റോറിയല്‍ കേരളത്തിലെ പൊതുസമൂഹം പരമപുച്ഛത്തോടെ തളളിക്കളയും. കോണ്‍ഗ്രസില്‍ വ്യക്തിത്വമുളളവരെ സൈബര്‍ ആക്രമണത്തിലൂടെ കീഴ്പ്പെടുത്തി അവരുടെ വായടപ്പിക്കാനാണ് ശ്രമമെങ്കില്‍ കൂടുതല്‍ കാര്യങ്ങള്‍ ഞാന്‍ പറയും. എന്നെക്കൊണ്ട് പറയിപ്പിക്കരുത്. അനാവശ്യമായി പ്രകോപിപ്പിക്കരുത്. ഒരുപാട് കേസുകളുണ്ട്. ആ കേസുകളെക്കുറിച്ച് എല്ലാമറിയാവുന്ന ആളാണ് ഞാന്‍. സൈബര്‍ ആക്രമണം തുടര്‍ന്നാല്‍ വാര്‍ത്താസമ്മേളനം നടത്തി ഞാന്‍ എല്ലാം പറയും': രാജ്മോഹന് ഉണ്ണിത്താന്‍ പറഞ്ഞു.
കേരളത്തിലെ മുഴുവന്‍ കോണ്‍ഗ്രസ് നേതാക്കളേക്കാള്‍ ജനകീയ സ്വാധീനം തനിക്കാണെന്ന് വരുത്തിത്തീര്‍ക്കാന്‍ മാങ്കൂട്ടത്തില്‍ ഹീനമായ മാര്‍ഗങ്ങളുപയോഗിച്ച് പിആര്‍ വര്‍ക് നടത്തിയെന്ന് ഉണ്ണിത്താന്‍ കഴിഞ്ഞ ദിവസം പറഞ്ഞിരുന്നു. അതിന്റെ ഫലമാണ് ഇപ്പോള്‍ കിട്ടിയത്. വിഷയത്തില്‍ മാങ്കൂട്ടത്തിലിനെതിരെ ഉചിതമായ തീരുമാനം ഉചിതമായ സമയത്ത് കോണ്‍ഗ്രസ് എടുത്തു. ആ തീരുമാനം ശരിയായിരുന്നു. അയാള്‍ ഒറ്റയൊരുത്തനാണ് ആ തീരുമാനം ലംഘിച്ചതെന്നും ഉണ്ണിത്താന്‍ മുന്‍പ് വ്യക്തമാക്കിയതാണ്.