രോഹിത്തിന്റെയും കോഹ്ലിയുടെയും സാന്നിദ്ധ്യം ഉണര്‍വേകും; ടെസ്റ്റ് പരമ്പര പരാജയത്തിന്റെ നാണക്കേട് മായ്ക്കാന്‍ ഇന്ത്യ; ടീമിനൊപ്പം സമ്മര്‍ദ്ദം കോച്ച് ഗംഭീറിനും; ഇന്ത്യ- ദക്ഷിണാഫ്രിക്ക ഏകദിന പരമ്പരയ്ക്ക് നാളെ തുടക്കം; നാഴികക്കല്ല് പിന്നിടാന്‍ രോഹിത്തും

റാഞ്ചി: ടെസ്റ്റ് പരമ്പരയിലെ സമ്പൂര്‍ണ പരാജയത്തിന്റെ നാണകേടുകള്‍ മായ്ച്ചു കളയാന്‍ ദക്ഷിണഫ്രിക്കക്കെതിരെ ഏകദിനപരമ്പരയില്‍ ഇന്ത്യ നാളെ ഇറങ്ങും.മൂന്നു മത്സരങ്ങളടങ്ങിയ ഇന്ത്യ - ദക്ഷിണാഫ്രിക്ക ഏകദിന പരമ്പരയ്ക്ക് ഞായറാഴ്ച തുടക്കമാവും.റാഞ്ചിയില്‍ ഉച്ചയ്ക്ക് ഒന്നരയ്ക്കാണ് കളി തുടങ്ങുക.

ഏകദിനത്തില്‍ ദക്ഷിണാഫ്രിക്കയ്ക്കെതിരായ കഴിഞ്ഞ 2 പരമ്പരകളിലെ വിജയത്തിലാണ് ഇന്ത്യയുടെ ആത്മവിശ്വാസം.എന്നാല്‍ 25 വര്‍ഷത്തിന് ശേഷം ടെസ്റ്റ് പരമ്പര സ്വന്തമാക്കാന്‍ കഴിഞ്ഞത് ദക്ഷിണാഫ്രിക്കയ്ക്ക് നല്‍കുന്ന ആത്മവിശ്വാസം ചെറുതല്ല.മൂന്ന് ഏകദിനങ്ങളുടെ പരമ്പരയ്ക്ക് റാഞ്ചിയില്‍ തുടക്കമാവുമ്പോള്‍ ടീമിനൊപ്പം കോച്ച് ഗൗതം ഗംഭീറിനും സമ്മര്‍ദ്ദമേറെയാണ്.

ആധികാരിക ജയത്തിലൂടെ മാത്രമേ വിമര്‍ശകര്‍ക്ക് മറുപടി നല്‍കാന്‍ കഴിയൂ. രോഹിത്തും കോഹ്ലിയും തിരിച്ചെത്തുന്നത് ഇന്ത്യന്‍ കാമ്പിന് ഉണര്‍വ് നല്‍കിയിട്ടുണ്ട്. വ്യാഴാഴ്ച റാഞ്ചിയിലെത്തിയ ഇന്ത്യന്‍ ടീം ഇന്നലെ സ്റ്റേഡിയത്തില്‍ കഠിന പരിശീലത്തിലായിരുന്നു.

പരുക്കേറ്റ ശുഭ്മന്‍ ഗില്ലിന് പകരം കെ.എല്‍.രാഹുലിന് കീഴിലിറങ്ങുന്ന ഇന്ത്യന്‍ ടീമില്‍ ടെസ്റ്റ് പരമ്പര കളിച്ച 8 താരങ്ങള്‍ മാത്രമാണുള്ളത്. ജസ്പ്രീത് ബുമ്രയ്ക്കും മുഹമ്മദ് സിറാജിനും വിശ്രമം അനുവദിച്ചതോടെ അര്‍ഷ്ദീപ് സിങ്, ഹര്‍ഷിത് റാണ, പ്രസിദ്ധ് കൃഷ്ണ എന്നിവരാണ് പേസ് ബോളിങ്ങിലെ പ്രതീക്ഷകള്‍. വൈസ് ക്യാപ്റ്റന്‍ ശ്രേയസ് അയ്യരുടെ അഭാവത്തില്‍ മധ്യനിര ബാറ്ററായി തിലക് വര്‍മയും ടീമിലുണ്ട്.

വിവിധ ഫോര്‍മാറ്റുകളിലായി ഇന്ത്യന്‍ ടീമിനൊപ്പം 52 മത്സരങ്ങള്‍ കളിച്ച യശസ്വി ജയ്സ്വാളിന് ഇതുവരെ ഒരു ഏകദിനത്തില്‍ മാത്രമാണ് ഓപ്പണറായി ഇറങ്ങാനായത്. ഇന്ത്യന്‍ ടോപ് ഓര്‍ഡറിലെ പ്രതിഭകളുടെ കൂട്ടയിടിയായിരുന്നു അതിനു കാരണം.

ശുഭ്മന്‍ ഗില്ലിന് പരുക്കേറ്റതോടെ രോഹിത് ശര്‍മയ്ക്കൊപ്പം ജയ്സ്വാള്‍ ഈ പരമ്പരയില്‍ ബാറ്റിങ് ഓപ്പണറായെത്തും. 2 വര്‍ഷത്തിനുശേഷം ഏകദിന ടീമില്‍ തിരിച്ചെത്തിയ ഋതുരാജ് ഗെയ്ക്വാദാണ് ബാക്കപ് ഓപ്പണര്‍. ക്യാപ്റ്റന്‍ കെ.എല്‍.രാഹുലും വൈസ് ക്യാപ്റ്റന്‍ ഋഷഭ് പന്തും പ്ലേയിങ് ഇലവനില്‍ ഒന്നിച്ചുണ്ടാകുമോ എന്നതിലാണ് ആകാംക്ഷ.ഹാര്‍ദിക് പണ്ഡ്യയുടെയും അക്‌സര്‍ പട്ടേലിന്റെയും അഭാവത്തില്‍ രവീന്ദ്ര ജഡേജയ്ക്കും വാഷിംഗ്ടണ്‍ സുന്ദറിനുമാണ് ഓള്‍റൗണ്ടര്‍മാരുടെ ചുമതല.

രോഹിത്തിനെ കാത്തിരിക്കുന്നത് നിരവധി നാഴികകല്ലുകള്‍

അതേസമയം, ദക്ഷിണാഫ്രിക്കയ്‌ക്കെതിരെ ആദ്യ ഏകദിനം നാളെ ആരംഭിക്കാനിരിക്കെ നിരവധി നാഴികക്കല്ലിന് അരികിലാണ് രോഹിത്. അന്താരാഷ്ട്ര ക്രിക്കറ്റില്‍ ഇരുപതിനായിരം റണ്‍സ് തികയ്ക്കുന്ന നാലാമത്തെ ഇന്ത്യന്‍ താരമെന്ന റെക്കോര്‍ഡാണ് രോഹിത്തിനെ കാത്തിരിക്കുന്നതില്‍ ഒന്ന്. 502 മത്സരങ്ങളില്‍ നിന്ന് രോഹിത് 19,902 റണ്‍സെടുത്തിട്ടുണ്ട്. ടെസ്റ്റില്‍ 4301 റണ്‍സും ഏകദിനത്തില്‍ 11,370 റണ്‍സും ട്വന്റി 20യില്‍ 4231 റണ്‍സുമാണ് രോഹിത്തിന്റെ സമ്പാദ്യം. 98 റണ്‍സ് കൂടി നേടിയാല്‍ രോഹിത് ഇരുപതിനായിരം റണ്‍സ് ക്ലബിലെത്തും.

സച്ചിന്‍ ടെന്‍ഡുല്‍ക്കര്‍, വിരാട് കോലി, രാഹുല്‍ ദ്രാവിഡ് എന്നിവരാണ് രോഹിത്തിന് മുന്‍പ് ഈ നേട്ടത്തില്‍ എത്തിയ താരങ്ങള്‍. സച്ചിന്‍ 34,357 റണ്‍സും കോലി 27,673 റണ്‍സും ദ്രാവിഡ് 24,064 റണ്‍സും നേടിയിട്ടുണ്ട്. ഇത് കൂടാതെ 3 സിക്‌സര്‍ കൂടി നേടിയാല്‍ ഏകദിന ക്രിക്കറ്റ് ചരിത്രത്തില്‍ ഏറ്റവും കൂടുതല്‍ സിക്‌സര്‍ നേടുന്ന താരമാകും രോഹിത്.351 സിക്‌സറുകളുമായി പാക്കിസ്ഥാന്‍ താരം ഷാഹിദ് അഫ്രീദിയാണ് മുന്നില്‍.രോഹിതിന് ഇപ്പോള്‍ 349 സിക്‌സറുകള്‍ ആണുള്ളത്