അര്‍ദ്ധസെഞ്ച്വറിയുമായി മുന്നില്‍ നിന്ന് നയിച്ച് വിനൂപ്; സഞ്ജുവില്ലെങ്കിലും ജയം തുടര്‍ന്ന് കൊച്ചി ബ്ലൂ ടൈഗേഴ്സ്; തൃശ്ശൂര്‍ ടൈറ്റന്‍സിനെ തകര്‍ത്തത് 6 വിക്കറ്റിന്; അഞ്ചാം ജയത്തോടെ പോയന്റ് പട്ടികയില്‍ ഒന്നാമത്
തൃശ്ശൂര്‍ ടൈറ്റന്‍സിനെ തോല്‍പ്പിച്ച് കൊച്ചി ബ്ലൂ ടൈഗേഴ്സ്
തിരുവനന്തപുരം: കേരള ക്രിക്കറ്റ് ലീഗില്‍ തൃശ്ശൂര്‍ ടൈറ്റന്‍സിനെ തോല്‍പ്പിച്ച് കൊച്ചി ബ്ലൂ ടൈഗേഴ്സ്.ആറുവിക്കറ്റിനാണ് കൊച്ചിയുടെ ജയം.തൃശ്ശൂര്‍ ടൈറ്റന്‍സ് ഉയര്‍ത്തിയ 173 റണ്‍സ് വിജയലക്ഷ്യം അഞ്ച് പന്തുകള്‍ ബാക്കി നില്‍ക്കേ നാലുവിക്കറ്റ് നഷ്ടത്തില്‍ കൊച്ചി മറികടന്നു.അവസാന ഓവറില്‍ സിക്‌സര്‍ പായിച്ച് സാലി സാംസണാണ് (17 പന്തില്‍ 25) ബ്ലൂ ടൈഗേഴ്‌സിനെ വിജയിപ്പിച്ചത്.വിനൂപ് മനോഹരന്‍ 42 പന്തില്‍ 65 റണ്‍സ് നേടി.ആദിത്യ വിനോദ് ടൈറ്റന്‍സിന് വേണ്ടി മൂന്ന് വിക്കറ്റ് നേടി.ജയത്തോടെ ഏഴു കളികളില്‍ 5 ജയവുമായി കൊച്ചി പോയന്റ് പട്ടികയില്‍ ഒന്നാമതെത്തി.
ഗംഭീര തുടക്കമാണ് ബ്ലൂ ടൈഗേഴ്‌സിന് ലഭിച്ചത്.ഒന്നാം വിക്കറ്റില്‍ വിനൂപ്-വിപുല്‍ ശക്തി (31 പന്തില്‍ 36) സഖ്യം 93 റണ്‍സ് കൂട്ടിചേര്‍ത്തു. 11-ാം ഓവറിലാണ് കൂട്ടുകെട്ട് പൊളിയുന്നത്.വിനൂപിനെ അജിനാസ് മടക്കി. വൈകാതെ വിനൂപും മടങ്ങി. ഏഴ് സിക്‌സും രണ്ട് ഫോറും ഉള്‍പ്പെടുന്നതായിരുന്നു വിനൂപിന്റെ ഇന്നിംഗ്‌സ്. മുഹമ്മദ് ഷാനു (8), ജോബിന്‍ ജോബി (9) എന്നിവര്‍ക്ക് തിളങ്ങാന്‍ സാധിച്ചില്ലെങ്കിലും ആല്‍ഫി ഫ്രാന്‍സിസ് ജോണിനെ (14) കൂട്ടുപിടിച്ച് സാലി, ബ്ലൂ ടൈഗേഴ്‌സിന് വിജയത്തിലേക്ക് നയിച്ചു.
നേരത്തെ ടോസ് നഷ്ടപ്പെട്ട് ആദ്യം ബാറ്റിംഗിനെത്തിയ ടൈറ്റന്‍സ് നിശ്ചിത ഓവറില്‍ ഒമ്പത് വിക്കറ്റ് നഷ്ടത്തില്‍ 172 റണ്‍സാണ് നേടിയത്.70 റണ്‍സ് നേടിയ ആനന്ദ് കൃഷ്ണനാണ് ടോപ് സ്‌കോറര്‍.ആനന്ദിന് പുറമെ അര്‍ജുന്‍ (14 പന്തില്‍ 39) മികച്ച പ്രകടനം പുറത്തെടുത്തിരുന്നു. മറ്റാര്‍ക്കും തിളങ്ങാനായില്ല. അഹമ്മദ് ഇമ്രാന്‍ (16), വരുണ്‍ നായനാര്‍ (2), ഷോണ്‍ റോജര്‍ (10), അക്ഷയ് മനോഹര്‍ (14), സിബിന്‍ ഗിരീഷ് (2), അജിനാസ് (0), സിജോ മോന്‍ (4) എന്നിവരാണ് പുറത്തായ മറ്റുതാരങ്ങള്‍. നിതീഷ് (3), ആദിത്യ വിനോദ് (1) പുറത്താവാതെ നിന്നു.
ശ്രീഹരി എസ് നായര്‍, കെ എം ആസിഫ് എന്നിവര്‍ മൂന്ന് വിക്കറ്റ് വീതം നേടി.