സൂപ്പര് ശരണ്യയെ തുണച്ചത് പതിവായി അനുഷ്ഠിക്കുന്ന റമസാന് വ്രതം; ഭക്ഷണം കഴിക്കാതെയും വെള്ളം കുടിക്കാതെയും ദിവസങ്ങളോളം പിടിച്ചുനില്ക്കാന് തന്റെ മകള്ക്ക് കഴിയുമെന്ന അമ്മയുടെ വിശ്വാസത്തിന് ആധാരം വ്രതം നോക്കല്; 'അമ്മേ എല്ലാം സെറ്റാണ്'; കുടകിലെ കൊടുംകാട്ടില് നിന്നും ശരണ്യ നാദാപുരത്തെ വീട്ടില്; ട്രെക്കിങ് തുടരുമെന്ന് ഉറച്ച നിലപാട്
കോഴിക്കോട്: കര്ണാടകയിലെ കുടക് വനമേഖലയില് ട്രെക്കിങ്ങിനിടെ കാണാതായി നാലാം ദിവസം കണ്ടെത്തപ്പെട്ട മലയാളി യുവതി ശരണ്യ (36) നാദാപുരത്തെ വീട്ടില് തിരിച്ചെത്തി. പുലര്ച്ചെ ഒരു മണിയോടെ ഇയ്യങ്കോട്ടെ വടക്കയില് വീട്ടിലെത്തിയ ശരണ്യയെ സ്വീകരിക്കാന് മാതാപിതാക്കളും ബന്ധുക്കളും നാട്ടുകാരും ഉള്പ്പെടെ വലിയൊരു സംഘം കാത്തുനിന്നിരുന്നു. കൊടുംകാട്ടില് ഒറ്റപ്പെട്ടുപോയ നാലു ദിവസത്തെ അതിജീവനത്തിന് ശേഷവും തന്റെ യാത്രാപ്രേമത്തിന് മാറ്റമില്ലെന്നും ട്രെക്കിങ് ഇനിയും തുടരുമെന്നുമാണ് വീട്ടിലെത്തിയ ശരണ്യ പ്രതികരിച്ചത്. മകളുടെ ആഗ്രഹങ്ങള്ക്ക് തടയിടില്ലെന്ന് മാതാപിതാക്കളും വ്യക്തമാക്കിയതോടെ വൈകാരികമായ നിമിഷങ്ങള്ക്കാണ് നാദാപുരം സാക്ഷ്യം വഹിച്ചത്.
കൊച്ചി ഇടപ്പള്ളിയിലെ ഐടി കമ്പനിയില് ജീവനക്കാരിയായ ശരണ്യയെ വ്യാഴാഴ്ച മുതലാണ് കുടകിലെ മടിക്കേരി വനത്തില് വെച്ച് കാണാതായത്. 16 അംഗ സംഘത്തോടൊപ്പം ട്രെക്കിങ്ങിന് പോയ ശരണ്യ കാടിനുള്ളില് ഒറ്റപ്പെട്ടു പോവുകയായിരുന്നു. വിവരം അറിഞ്ഞത് മുതല് സഹപ്രവര്ത്തകരും സുഹൃത്തുക്കളും വലിയ ആശങ്കയിലായിരുന്നു. കൊച്ചിയിലെ ടെക്കികളുടെ വാട്സാപ്പ് ഗ്രൂപ്പുകളില് ശരണ്യയ്ക്കായുള്ള തിരച്ചില് വലിയ ചര്ച്ചയാവുകയും സഹപ്രവര്ത്തകര് നേരിട്ട് കുടകിലെ വനമേഖലയിലേക്ക് എത്തുകയും ചെയ്തിരുന്നു. ഒടുവില് ഞായറാഴ്ച വൈകിട്ടാണ് ഒരു മരച്ചുവട്ടില് വിശ്രമിക്കുന്ന നിലയില് ശരണ്യയെ തിരച്ചില് സംഘം കണ്ടെത്തിയത്.
ശരണ്യയെ കണ്ടെത്തിയ വിവരം അറിഞ്ഞതോടെ അമ്മ ഷൈലജയ്ക്ക് കരച്ചിലടക്കാനായില്ല. 'അമ്മേ പ്രശ്നമൊന്നുമില്ല, ഇവിടെ എല്ലാം സെറ്റാണ്' എന്ന് മകള് ഫോണിലൂടെ പറഞ്ഞപ്പോഴാണ് ദിവസങ്ങളായി ഉള്ളിലൊതുക്കിയ സങ്കടം കണ്ണീരായി പുറത്തുവന്നത്. വീട്ടിലെത്തിയ കര്ണാടക എംപി ശ്രേയസ്സ് എം. പട്ടേല് വഴി പൊലീസ് മേധാവിയെ ബന്ധപ്പെട്ടാണ് മാതാപിതാക്കള് മകളോട് സംസാരിച്ചത്. നാദാപുരത്തെ യുഡിഎഫ് സ്ഥാനാര്ഥി കെ.എം. അഭിജിത്തിനൊപ്പമാണ് എംപി വീട്ടിലെത്തി ആശ്വാസമേകിയത്. മകളെ തിരിച്ചുകിട്ടിയെന്ന അറിഞ്ഞത് മുതല് അയല്വാസികളും നാട്ടുകാരും ആ വീട്ടിലേക്ക് ഒഴുകിയെത്തുകയായിരുന്നു.
ഭക്ഷണം കഴിക്കാതെയും വെള്ളം കുടിക്കാതെയും ദിവസങ്ങളോളം പിടിച്ചുനില്ക്കാന് തന്റെ മകള്ക്ക് കഴിയുമെന്ന ഉറച്ച വിശ്വാസം അമ്മ ഷൈലജയ്ക്കുണ്ടായിരുന്നു. പതിവായി റമസാന് വ്രതം അനുഷ്ഠിക്കാറുള്ള ശരണ്യയുടെ ശാരീരികക്ഷമതയില് അമ്മയ്ക്ക് സംശയമില്ലായിരുന്നു. മുന്പും പല തവണ സാഹസിക യാത്രകള് നടത്തി പരിചയമുള്ളതിനാല് ഇത്തവണയും അവള് സുരക്ഷിതയായി മടങ്ങിയെത്തുമെന്ന് അമ്മ ഉറച്ചു വിശ്വസിച്ചു. എന്നാല് താലൂക്ക് കാര്ഷിക വികസന ബാങ്കില് നിന്ന് വിരമിച്ച അച്ഛന് ഗോപിക്ക് കഴിഞ്ഞ നാല് ദിവസങ്ങള് കടുത്ത ആശങ്കയുടെ നിമിഷങ്ങളായിരുന്നു.
ഏത് കൊടുംകാട്ടില് അകപ്പെട്ടാലും ശരണ്യ വഴി കണ്ടെത്തി പുറത്തെത്തുമെന്ന് സഹോദരന് ശ്യാമും സാക്ഷ്യപ്പെടുത്തുന്നു. സഹോദരിയെ കാണാതായ വിവരമറിഞ്ഞ് ബെംഗളൂരുവില് നിന്നും ഉടന് തന്നെ ശ്യാം കുടകിലെത്തി തിരച്ചില് സംഘത്തോടൊപ്പം ചേര്ന്നിരുന്നു. 'മുന്പും അവള് വനയാത്രകള് നടത്തിയിട്ടുണ്ട്. അതിനാല് തന്നെ അവള്ക്ക് അപകടമൊന്നും സംഭവിക്കില്ലെന്ന് എനിക്കുറപ്പായിരുന്നു' എന്ന് ബെംഗളൂരുവില് സോഫ്റ്റ്വെയര് എന്ജിനീയറായ ശ്യാം പറയുന്നു. ശനിയാഴ്ച മുതല് തിരച്ചില് ഊര്ജ്ജിതമാക്കിയെങ്കിലും ആദ്യ ഘട്ടത്തില് സൂചനകളൊന്നും ലഭിച്ചിരുന്നില്ല.
വനപാലകര്ക്കൊപ്പം ആന്റി നക്സല് സേനയും തിരച്ചിലില് പങ്കാളികളായിരുന്നു. ശരണ്യയുടെ വസ്ത്രങ്ങള് ഉപയോഗിച്ച് ഡോഗ് സ്ക്വാഡിനെ മണപ്പിച്ചാണ് പരിശോധന തുടങ്ങിയത്. ഓരോ ദിവസം പിന്നിടുന്തോറും ആശങ്ക വര്ദ്ധിച്ചെങ്കിലും ആധുനിക സംവിധാനങ്ങള് ഉപയോഗിച്ചുള്ള തിരച്ചില് തുടര്ന്നു. തെര്മല് ക്യാമറകളും ഡ്രോണുകളും ഉപയോഗിച്ച് കാടിന്റെ ഉള്പ്രദേശങ്ങളില് വിശദമായ പരിശോധനയാണ് നടന്നത്. സാധാരണക്കാര്ക്ക് പെട്ടെന്ന് വഴി തെറ്റാന് സാധ്യതയുള്ള ഇടങ്ങളിലെല്ലാം സംഘം പരിശോധന നടത്തി.
ട്രെക്കിങ്ങിനിടെ ശരണ്യയ്ക്ക് മാനസികമായ വിഷമങ്ങള് വല്ലതും ഉണ്ടായിരുന്നോ എന്ന് കര്ണാടക വനപാലകര് അന്വേഷിച്ചിരുന്നു. എന്നാല് ശരണ്യയുടെ ആത്മവിശ്വാസത്തെക്കുറിച്ച് വ്യക്തമായ ധാരണയുണ്ടായിരുന്ന കുടുംബം തിരച്ചില് തുടരാന് ആവശ്യപ്പെടുകയായിരുന്നു. കാടിനുള്ളില് ഭയപ്പെടാതെ ഇത്രയും ദിവസം കഴിഞ്ഞുകൂടിയ ശരണ്യയുടെ ധൈര്യത്തെ തിരച്ചില് സംഘവും പ്രശംസിച്ചു. മുന്പ് നടത്തിയ ട്രെക്കിങ്ങുകളെക്കാള് വലിയൊരു അനുഭവമായാണ് ഇതിനെ കാണുന്നതെന്ന് ശരണ്യയും പിന്നീട് സൂചിപ്പിച്ചു.
നാദാപുരം മേഖലയില് ശരണ്യയുടെ തിരിച്ചു വരവ് വലിയ ആഘോഷമായാണ് നാട്ടുകാര് ഏറ്റെടുത്തത്. കാണാതായ അന്ന് മുതല് ഇയ്യങ്കോട്ടെ വീട്ടില് ആളുകള് ഒത്തുകൂടിയിരുന്നു. ഓരോ വാര്ത്തയ്ക്കും വേണ്ടി കാത്തിരുന്ന നാട്ടുകാര്ക്ക് ശരണ്യയുടെ ശബ്ദം കേള്ക്കാന് കഴിഞ്ഞത് വലിയ ആശ്വാസമായി. സഹോദരന് ശ്യാമും അമ്മാവന് ഹരിദാസുമാണ് മകള് സുരക്ഷിതയാണെന്ന വിവരം ആദ്യം വീട്ടില് അറിയിച്ചത്. ഇതോടെയാണ് വീട്ടിലെ പിരിമുറുക്കം സന്തോഷത്തിന് വഴിമാറിയത്.
കാടിനുള്ളില് അകപ്പെട്ട സമയത്തും താന് പതറിയിരുന്നില്ലെന്നും മരത്തിന് താഴെ വിശ്രമിക്കുകയായിരുന്നുവെന്നും ശരണ്യ പറഞ്ഞു. ഇതിലും വലിയ വെല്ലുവിളികള് മുന്പും നേരിട്ടിട്ടുണ്ടെന്ന ശരണ്യയുടെ വാക്കുകള് അവളുടെ സാഹസികതയോടുള്ള അഭിനിവേശം വ്യക്തമാക്കുന്നു. ശരണ്യയുടെ മടങ്ങിവരവ് ഐടി മേഖലയിലുള്ള സുഹൃത്തുക്കള്ക്കും വലിയ ആവേശമാണ് നല്കിയത്. കാണാതായ സമയം മുതല് സോഷ്യല് മീഡിയയിലൂടെയും മറ്റും അവര് നടത്തിയ ക്യാമ്പയിനുകള് ഫലം കണ്ടതിന്റെ സന്തോഷത്തിലാണവര്.
ഇന്നലെ രാത്രി വൈകിയും ശരണ്യയുടെ വീട്ടില് സന്ദര്ശകരുടെ തിരക്കായിരുന്നു. അല്പം ക്ഷീണിതയാണെങ്കിലും മകള് കൂടെയുണ്ടെന്ന ആശ്വാസത്തിലാണ് ഗോപിയും ഷൈലജയും. സാഹസികത ഇഷ്ടപ്പെടുന്ന മകള്ക്ക് ഇനിയും യാത്രകള് നടത്താന് പൂര്ണ്ണ പിന്തുണ നല്കുമെന്നാണ് മാതാപിതാക്കള് പറയുന്നത്. ഒരു ചെറിയ ഇടവേളയ്ക്ക് ശേഷം ശരണ്യ വീണ്ടും ജോലിയില് പ്രവേശിക്കും. ട്രെക്കിങ് ഒരു ലഹരിയായി കൊണ്ടുനടക്കുന്ന ശരണ്യയ്ക്ക് ഈ അനുഭവം കൂടുതല് കരുത്ത് നല്കിയിരിക്കുകയാണ്.
